ការបង្រៀនតាមរបៀបរបស់ព្រះអង្គសង្គ្រោះ
ការប្រុងប្រៀបខ្លួនទៅជួបនឹងព្រះ
ដោយ ដេវិន ជី ឌើរ៉ាន់
ទីប្រឹក្សាទីមួយគណៈប្រធានសាលាថ្ងៃអាទិត្យទូទៅ
ថ្នាក់សាលាថ្ងៃអាទិត្យដើរតួយ៉ាងសំខាន់នៅក្នុងការជួយពួកយើង ទាំងអស់គ្នា ឲ្យប្រុងប្រៀបខ្លួនទៅជួបនឹងព្រះ ។ តើអ្នកកំពុងដាក់ថ្នាក់សាលាថ្ងៃអាទិត្យជាអាទិភាពដែរឬទេ ?
នៅក្នុងព្រះគម្ពីរមរមន អាមូលេកប្រកាសនូវទេសនាកថាដ៏មានឥទ្ធិពលមួយអំពីដង្វាយធួននៃព្រះយេស៊ូវគ្រីស្ទ ( សូមមើល អាលម៉ា ៣៤ ) ។ ក្នុងចំណោមខគម្ពីរដ៏អស្ចារ្យជាច្រើននៅក្នុងជំពូកនេះ មានខគម្ពីរមួយដែលទាក់ចិត្តខ្ញុំគឺនៅពេលអាមូលេកថ្លែងថា « ដ្បិតមើលចុះ ជីវិតនេះគឺជាពេលវេលាសម្រាប់ឲ្យមនុស្សប្រុងប្រៀបខ្លួនទៅជួបនឹងព្រះ » ( អាលម៉ា ៣៤:៣២ ) ។
ដោយជឿថាគោលបំណងនៃជីវិតនេះគឺ « ដើម្បីប្រុងប្រៀបខ្លួនទៅជួបនឹងព្រះ » នោះយើងអាចសួរខ្លួនយើងនូវសំណួរទាំងនេះ ៖ តើខ្ញុំកំពុងធ្វើអ្វីខ្លះរៀងរាល់ថ្ងៃ រាល់សប្តាហ៍ និង រាល់ខែ ដើម្បីប្រុងប្រៀបខ្លួនសម្រាប់ឱកាសជួបជុំគ្នាដ៏អស្ចារ្យជាមួយព្រះវរបិតាសួគ៌របស់យើងនោះ ? តើខ្ញុំនឹងជ្រើសរើសចំណាយពេលវេលាដ៏មានតម្លៃដែលផ្តល់ដល់ខ្ញុំដោយរបៀបណា ?
តើយើងនឹងប្រុងប្រៀបខ្លួនយ៉ាងដូចម្ដេច ?
មានរបៀបជាច្រើនដែលយើងអាចចំណាយពេលវេលារបស់យើង ដើម្បីប្រុងប្រៀបខ្លួនទៅជួបនឹងព្រះ ។ ពីមួយសប្តាហ៍ទៅមួយសប្តាហ៍ ខ្ញុំជឿថា យើងអាចយល់ស្របថា ពេលវេលាដ៏សំខាន់បំផុតនៃសប្តាហ៍ គឺជាពេលចំណាយដើម្បីទទួលទានសាក្រាម៉ង់ ដោយរំឭកសេចក្តីសញ្ញាយើងជាមួយព្រះវរបិតាសួគ៌ និង សេចក្តីសង្ឃឹមដែលយើងទាំងអស់គ្នាអាចមាន ដែលជាលទ្ធផលនៃដង្វាយធួនរបស់បុត្រាទ្រង់គឺព្រះយេស៊ូវគ្រីស្ទ ។
ខ្ញុំក៏ជឿផងដែរថា ពេលវេលាដែលយើងចំណាយនៅក្នុងថ្នាក់សាលាថ្ងៃអាទិត្យ អាចមានឥទ្ធិពលយ៉ាងខ្លាំងលើការប្រុងប្រៀបខ្លួនរបស់យើងជាងអ្វីដែលយើងដឹងទៅទៀត ។ ប៉ុន្តែដើម្បីទទួលបានអត្ថប្រយោជន៍ពីឱកាសនោះ យើងត្រូវតែវាយតម្លៃពីរបៀបដែលយើងចូលរួមថ្នាក់សាលាថ្ងៃអាទិត្យ ។
គោលបំណងនៃថ្នាក់សាលាថ្ងៃអាទិត្យគឺដើម្បី « ពង្រឹងដល់សេចក្តីជំនឿរបស់បុគ្គលម្នាក់ៗ និង សេចក្តីជំនឿរបស់ក្រុមគ្រួសារ ទៅលើព្រះវរបិតាសួគ៌ និង ព្រះយេស៊ូវគ្រីស្ទតាមរយៈការបង្រៀន ការរៀន និងការរាប់អាន » ។១ ធាតុនៃការប្រែចិត្តជឿដ៏ចាំបាច់ទាំងនេះ មានសារៈសំខាន់នៅក្នុងការខិតខំប្រុងប្រៀបខ្លួនរបស់យើងទៅជួបនឹងព្រះ ។ យើងមានចិត្តរំភើបជាខ្លាំង ដែលគ្រូបង្រៀននៅទូទាំងសាសនាចក្រកំពុងធ្វើការកែលម្អសមត្ថភាពរបស់ពួកគាត់ក្នុងការបង្រៀនដោយប្រើ ការបង្រៀនតាមរបៀបរបស់ព្រះអង្គសង្គ្រោះ និង ការប្រជុំក្រុមប្រឹក្សាគ្រូបង្រៀន ។
ប៉ុន្តែការកែលម្អការបង្រៀនតែមួយមុខ វាមិនទាន់គ្រប់គ្រាន់នៅឡើយទេ ។ វាត្រូវផ្គួបគ្នានឹងកិច្ចខិតខំរបស់យើងដើម្បីរៀនតាមរបៀបរបស់ព្រះអង្គសង្គ្រោះ ។ ទ្រង់មានព្រះបន្ទូលថា យើងត្រូវតាំងចិត្តរៀនសូត្រ « ដោយការសិក្សា និង ដោយសេចក្ដីជំនឿផងដែរ » ( គ. និង ស. ១០៩:៧ ) ។ សេចក្តីជំនឿគឺជាគោលការណ៍នៃសកម្មភាព ។ យើងត្រូវតែ ធ្វើ ប្រសិនបើយើងចង់ ដឹង ( សូមមើល យ៉ូហាន ៧:១៧ ) ។
ថ្នាក់រៀននៅសាលាថ្ងៃអាទិត្យរបស់យើង អាចលើកកម្ពស់ការបង្រៀន និង ការរៀនសូត្របែបនេះបាន នៅពេលដែលថ្នាក់រៀនទាំងនោះគឺជាកន្លែងដ៏មានសុវត្ថិភាព ដើម្បីចែកចាយបទពិសោធន៍ ដែលយើងមាន និង ការបំផុសគំនិតដែលពួកគេបានទទួលអំឡុងពេលក្នុងសប្តាហ៍ ខណៈដែលពួកគេកំពុងរៀន និង អនុវត្តខគម្ពីរនៅក្នុងរៀបចំដើម្បីមករៀន ។ នៅពេលយើង « បង្រៀនគ្នាទៅវិញទៅមកអំពីគោលលទ្ធិនៃនគរ… ឲ្យទាំងអស់បានស្អាងឡើងទាំងអស់គ្នា » ( គ. និង ស. ៨៨:៧៧, ១២២ ) ។
រាប់ថ្ងៃឈប់សម្រាកទុកជាទីរីករាយចិត្ត
ថ្មីៗនេះ គណៈប្រធានទីមួយបានអញ្ជើញពួកយើងម្នាក់ៗឲ្យ « រាប់ថ្ងៃឈប់សម្រាកទុកជាទីរីករាយចិត្ត » ( អេសាយ ៥៨:១៣ ) នៅក្នុងជីវិតរបស់យើង ។ បទពិសោធន៍ប្រជុំបីម៉ោងនាថ្ងៃអាទិត្យជួយយើងឲ្យសម្រេចបាននូវគោលដៅនោះ ។
នៅក្នុងស្មារតីនេះ ខ្ញុំសូមសួរសំណួរមួយផ្សេងទៀត ៖ ជួនកាលហេតុអ្វីយើងជ្រើសរើសពុំចាប់យកឱកាសចូលរួមពេញលេញក្នុងថ្នាក់សាលាថ្ងៃអាទិត្យដូច្នេះ ?
នៅប៉ុន្មានឆ្នាំថ្មីៗនេះ ខ្ញុំបានឃើញ « ការដាក់ជំនួស » ជាច្រើនផ្សេងៗគ្នា ក្នុងម៉ោងថ្នាក់សាលាថ្ងៃអាទិត្យ រួមមានការសួរសុខទុក្ខនៅតាមផ្លូវដើរក្នុងសាលប្រជុំ ថ្នាក់ដឹកនាំវួដធ្វើការសម្ភាសន៍នានា ថ្នាក់ដឹកនាំស្តេកបំពាក់បំប៉នអ្នកនៅក្រោមឱវាទរបស់ពួកគេនៅក្នុងវួដ និង ថ្នាក់ដឹកនាំយុវវ័យរៀបរាប់ពីកម្មវិធីនានាដែលជាកង្វល់របស់ពួកគេ ។
ដោយសារការត្រូវការពេលវេលាដ៏ច្រើនរបស់ពួកគេ នោះខ្ញុំយល់ពីមូលហេតុដែលថ្នាក់ដឹកនាំប្រើពេលវេលានៃថ្នាក់សាលាថ្ងៃអាទិត្យ ដើម្បីធ្វើកិច្ចការផ្សេងៗ ។ ប៉ុន្តែវាជាពរជ័យអ្វីម្ល៉េះដល់អស់អ្នកដែលពាក់ព័ន្ធទាំងអស់ នៅពេលថ្នាក់ដឹកនាំវួដញែកពេលមួយម៉ោង ចូលរួមនៅក្នុងការពិភាក្សាដំណឹងល្អជាមួយសមាជិកនៃក្រុមជំនុំរបស់ខ្លួន ។
ខ្ញុំមានទំនុកចិត្តថា អ្នកធ្លាប់មានបទពិសោធន៍ផ្សេងទៀតនៃ « ការព្រងើយកន្តើយនឹងថ្នាក់សាលាថ្ងៃអាទិត្យ » ។ ដ្បិតដោយសារហេតុផលណាមួយ ឬ ហេតុផលផ្សេងទៀត ពួកយើងជាច្រើននាក់បានមានអារម្មណ៍ថា ជាច្រើនលើកច្រើនគ្រាយើងពុំបានប្រយោជន៍អ្វីច្រើនពីថ្នាក់សាលាថ្ងៃអាទិត្យដូចចិត្តយើងចង់បានឡើយ ។ ខ្ញុំបានរៀនថា បទពិសោធន៍ដ៏អស្ចារ្យនៃថ្នាក់សាលាថ្ងៃអាទិត្យរបស់ខ្ញុំ ត្រូវបានកំណត់កាន់តែច្រើនតាមរយៈការរៀបចំ និង ការចូលរួមរបស់ខ្ញុំ ដូចគ្រូបង្រៀនរបស់ខ្ញុំបានធ្វើផងដែរ ។ បងប្រុស ថាត អរ ខាលីស្ទើរ ប្រធានថ្នាក់សាលាថ្ងៃអាទិត្យទូទៅបានសរសេរថា « គ្រប់ពេលយើងសិក្សាព្រះគម្ពីរ មកថ្នាក់រៀនដោយមានការរៀបចំខ្លួនប្រសើរជាងមុនបន្តិច ចូលរួមការពិភាក្សាក្នុងថ្នាក់ សួរសំណួរ និង កត់ត្រាការបំផុសគំនិតដ៏ពិសិដ្ឋនានា នោះយើងប្រែក្លាយកាន់តែដូចជាព្រះ ហេតុដូច្នេះហើយវាបង្កើនសមត្ថភាពរបស់យើងដើម្បីដកពិសោធន៍នូវអំណរដែលទ្រង់មាន » ។២
ការរៀបចំ និង ការរក្សាម៉ោងរៀននាថ្នាក់សាលាថ្ងៃអាទិត្យ
ខ្ញុំសូមអញ្ជើញបងប្អូនឲ្យប្រឹងអស់ពីសមត្ថភាពខ្លួន ដើម្បីរៀបចំ និង រក្សាម៉ោងរៀននាថ្នាក់សាលាថ្ងៃអាទិត្យ ។ សមាជិកវួដ និង សាខាម្នាក់ៗ រួមទាំងថ្នាក់ដឹកនាំរបស់យើង គួរតែមានពរជ័យដ៏អស្ចារ្យនៃការប្រុងប្រៀបខ្លួនទៅជួបនឹងព្រះ អំឡុងពេលដ៏សំខាន់នេះរៀងរាល់សប្តាហ៍ ។