សំណួរ និង ចម្លើយ
ខ្ញុំមានការលំបាកក្នុងការសិក្សាព្រះគម្ពីរ ។ ហេតុអ្វីវាសំខាន់ដើម្បីសិក្សាព្រះគម្ពីរ ?
ចេញពីបាវចនាម៉្ញូឆលឆ្នាំនេះ យើងបានរៀនអំពីរបៀបដើម្បី « ឈានទៅ មុខដោយខ្ជាប់ខ្ជួននៅក្នុងព្រះគ្រីស្ទ » ( នីហ្វៃទី ២ ៣១:២០ ) ។ ខគម្ពីរនេះបង្រៀនថា ការឈានទៅមុខរួមមានទាំងការ « ទទួលទាននូវព្រះបន្ទូលនៃព្រះគ្រីស្ទ » ។ ហេតុអ្វីវាសំខាន់ ? នេះគឺជាវិធីមួយចំនួន ដែលការសិក្សាព្រះគម្ពីរជួយយើងឲ្យឈានទៅមុខ ៖
-
ប្រធាន ថូម៉ាស អេស ម៉នសុន បានបង្រៀនថា « ប្រសិនបើអ្នកសិក្សាព្រះគម្ពីរដោយចិត្តឧស្សាហ៍ព្យាយាម នោះអំណាចរបស់អ្នកដើម្បីចៀសវាងពីការល្បួង និង ដើម្បីទទួលការដឹកនាំពីព្រះវិញ្ញាណបរិសុទ្ធ នៅក្នុងកិច្ចការដែលអ្នកធ្វើនឹងរីកចម្រើនឡើង » ( « Be Your Best Self » Liahona ខែ ឧសភា ឆ្នាំ ២០០៩ ទំព័រ ៦៨ ) ។
-
អ្នកអាចទទួលបានទីបន្ទាល់ និង ពង្រឹងសេចក្តីជំនឿរបស់អ្នក ពេលអ្នកសិក្សាព្រះគម្ពីរប្រកបដោយការអធិស្ឋាន ។ ជាពិសេសការសិក្សាព្រះគម្ពីរមរមន និង ការទទួលបានទីបន្ទាល់នៃសេចក្តីពិតដ៏ពោរពេញរបស់វា នឹងជួយអ្នកឲ្យដឹងថា ព្រះយេស៊ូវគឺជាព្រះគ្រីស្ទ ថាយ៉ូសែប ស្ម៊ីធ គឺជាព្យាការី ហើយថាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយជាសាសនាចក្រពិត ។ ( អ្នកអាចរៀនបន្ថែមទៀតអំពីការសន្យាទាំងនេះនៅក្នុងបុព្វកថានៃព្រះគម្ពីរមរមន ) ។
-
អ្នកអាចទទួលបានការបំផុសគំនិត និង ចម្លើយផ្ទាល់ខ្លួនចំពោះសំណួររបស់អ្នកតាមរយៈព្រះគម្ពីរ ។ នៅពេលព្រះទាក់ទងជាមួយអ្នកតាមរយៈព្រះគម្ពីរ និង ព្រះវិញ្ញាណបរិសុទ្ធ នោះអ្នកអាចមានទំនុកចិត្ត និង កម្លាំងដើម្បីឈានទៅមុខទោះបីជាអ្នកជួបឧបសគ្គអ្វីក៏ដោយ ។
-
ប្រហែលជាហេតុផលសំខាន់បំផុតដើម្បីសិក្សាព្រះគម្ពីរនោះគឺថា ព្រះគម្ពីរបង្រៀនអំពីព្រះយេស៊ូវគ្រីស្ទ និង របៀបដែលអ្នកអាចធ្វើតាមគំរូ និង ការបង្រៀនរបស់ទ្រង់ ។ ការរស់នៅតាមគោលការណ៍ដែលអ្នករៀន នឹងជួយអ្នកឲ្យប្រែក្លាយដូចជាព្រះអង្គសង្គ្រោះ ។
ជាចម្លើយចំពោះសំណួររបស់ខ្ញុំ
ប្រសិនបើខ្ញុំមានសំណួរ ខ្ញុំដឹងថា ខ្ញុំអាចបើកព្រះគម្ពីរ ហើយស្វែងរកចម្លើយ ។ ព្រះគម្ពីរមានព្រះបន្ទូលរបស់ព្រះអម្ចាស់ និង គោលលទ្ធិរបស់ទ្រង់ដែលគ្មានការផ្លាស់ប្តូរ ។ ខ្ញុំដឹងថា ទោះខ្ញុំជួបឧបសគ្គធំប៉ុណ្ណាក្តី ព្រះគម្ពីរជួយផ្តល់ចម្លើយដល់ខ្ញុំជានិច្ច ។ ព្រះគម្ពីរក៏ឆ្លើយសំណួរអំពីគោលជំហររបស់សាសនាចក្រលើប្រធានបទជាច្រើន ។ ខ្ញុំដឹងថា ប្រសិនបើខ្ញុំអានព្រះគម្ពីរដោយយកចិត្តទុកដាក់ នោះវានឹងជួយខ្ញុំឲ្យមានព្រះវិញ្ញាណគង់នៅជាមួយខ្ញុំ ដែលជួយខ្ញុំឲ្យដឹងខុស និង ត្រូវ ។
អែមីលី អាយុ ១៧ ឆ្នាំ រដ្ឋ វ៉ាស៊ីងតោន ស.រ.អា.
បន្ទុករបស់ខ្ញុំបានស្រាល
មានគ្រាមួយក្នុងឆ្នាំសិក្សា ខ្ញុំបានចាប់ផ្តើមមានអារម្មណ៍ថាមានបន្ទុកដ៏ធ្ងន់ ដែលកើតមកពីភាពតានតឹងក្នុងជីវិត ។ អំឡុងពេលនៃគ្រាដ៏តានតឹងនោះ ខ្ញុំបានអធិស្ឋាន ហើយសិក្សាព្រះគម្ពីរមរមនអស់រយៈពេល ១០ នាទី ។ ពេលខ្ញុំបានអាន ខ្ញុំបានមានអារម្មណ៍យ៉ាងកក់ក្តៅក្នុងដួងចិត្តខ្ញុំ ។ ខ្ញុំបានមានអារម្មណ៍នៃក្តីស្រឡាញ់ លើកស្ទួយចិត្តឡើង ហើយមានភាពរីករាយទោះបីខ្ញុំមានការសាកល្បងក្តី ។ ខ្ញុំមានអារម្មណ៍សុខសាន្តជាខ្លាំង ជាអារម្មណ៍ដែលខ្ញុំមិនធ្លាប់មានពីមុន ។ ចេញពីបទពិសោធន៍នេះ ទីបំផុតខ្ញុំយល់ថា អ្វីដែលព្រះអង្គសង្គ្រោះមានបន្ទូល នៅពេលទ្រង់មានបន្ទូលថា « ខ្ញុំទុកសេចក្តីសុខនៅនឹងអ្នករាល់គ្នា គឺខ្ញុំឲ្យសេចក្តីសុខសាន្តរបស់ខ្ញុំដល់អ្នករាល់គ្នា » ( យ៉ូហាន ១៤:២៧ ) ។ ពីរបីសប្តាហ៍បន្ទាប់មកទៀត ខ្ញុំបានមានបទពិសោធន៍នេះជាច្រើនដង ហើយវាបំផុសគំនិតខ្ញុំឲ្យឈានទៅមុខតាមរយៈការពុះពាររបស់ខ្ញុំ ។
ក្លូអេ ខេ អាយុ ១៨ ឆ្នាំ វីស្កុនសិន ស.រ.អា.
អំណាចដើម្បីផ្លាស់ប្ដូរ
ពីមុនខ្ញុំពិតជាគ្មានទីបន្ទាល់អំពីព្រះគម្ពីរមរមនឡើយ ប៉ុន្តែនៅពេលខ្ញុំបានអធិស្ឋានដោយស្មោះសរសម្រាប់ការណែនាំពីព្រះវិញ្ញាណបរិសុទ្ធ នោះខ្ញុំមានអារម្មណ៍អស្ចារ្យយ៉ាងខ្លាំងអំពីព្រះគម្ពីរមរមន ។ ខ្ញុំមានគោលបំណងរួចជាស្រេច ដើម្បីដឹងថាព្រះគម្ពីរនោះពិត ដូច្នោះខ្ញុំបានចាប់ផ្តើមអាន និង សិក្សាដោយគិតគូរពីវា ។ មួយបន្ទាត់ម្ដងៗ មួយសិក្ខាបទម្ដងៗ នោះខ្ញុំបានទទួលវិវរណៈផ្ទាល់ខ្លួនថា ព្រះគម្ពីរនោះគឺជាព្រះគម្ពីរពិត ( សូមមើល នីហ្វៃទី ២ ២៨:៣០ ) ។ ខ្ញុំស្រឡាញ់ព្រះគម្ពីរមរមន ។ ខ្ញុំរក្សាការបង្រៀននានាដែលខ្ញុំទទួលបានអំឡុងពេលសិក្សាព្រះគម្ពីរ ។ ព្រះគម្ពីរមរមនមានអំណាចមួយដែលអាចនាំយើងឲ្យផ្លាស់ប្តូរកាន់តែប្រសើរឡើង ។
អារៀល ខានដាវ៉ាន់ ធី អាយុ ១៨ ឆ្នាំ ប្រទេសហ្វីលីពីន
សេចក្តីស្រឡាញ់របស់ព្រះ
ឧទាហរណ៍តាមរយៈព្រះចេស្តា និង ការបង្រៀននៅក្នុងព្រះគម្ពីរ ខ្ញុំអាចងាយនឹងទទួលឥទ្ធិពលពីព្រះវិញ្ញាណបរិសុទ្ធ ។ ព្រះគម្ពីរមានព្រះចេស្តាមកពីព្រះ ក្នុងរបៀបមួយដែលព្រះអាចណែនាំ និង បង្រៀនពួកយើង ។ ដូច្នេះនៅពេលអ្នកមានអារម្មណ៍ឯកោ ឬ គេបោះបង់ចោល សូមអានព្រះគម្ពីរ ។ បន្ទាប់មកសូមចងចាំថា ព្រះវរបិតាគង់នៅស្ថានសួគ៌បានរក្សាទុកនូវអ្វីៗទាំងនោះជាពិសេស សម្រាប់អ្នក ប្រយោជន៍ឲ្យអ្នកអាចដឹងថា ទ្រង់ស្រឡាញ់អ្នក ។
ស្កត អេច អាយុ ១៩ ឆ្នាំ វីស្កុនសិន ស.រ.អា.
ភាពល្អ និង ពន្លឺ
ខ្ញុំបានចាប់ផ្តើមអានព្រះគម្ពីរមរមនជាលើកដំបូង នៅពេលខ្ញុំគ្រប់អាយុចូលក្នុងក្រុមប៊ីហៃ ។ ខ្ញុំបានអានវាតាំងពីដើមរហូតដល់ចប់ ហើយបានគិតថាវាចប់ហើយ ។ ប៉ុន្តែខ្ញុំគិតខុសទាំងស្រុង ។ ជីវិតរបស់ខ្ញុំហាក់ដូចជាខ្វះអ្វីម៉្យាង ។ ដូច្នោះខ្ញុំបានសម្រេចចិត្តចាប់ផ្តើមអានព្រះគម្ពីរម្តងទៀត ម្តងនេះខ្ញុំបានផ្តោតចិត្តទុកដាក់កាន់តែខ្លាំង ។ នៅពេលខ្ញុំធ្វើបែបនេះ ជីវិតរបស់ខ្ញុំបានពោរពេញដោយពន្លឺដែលបំភ្លឺភាពស្រអាប់ដែលខ្ញុំមានតាំងពីខ្ញុំបានឈប់អានវាមក ។ ខ្ញុំបានយល់កាន់តែច្រើនថែមទៀត ហើយកាន់តែចូលចិត្តវាឡើង ។ សូមអានវាគ្រប់ពេលវេលា នោះអ្នកកំពុងធ្វើឲ្យប្រាកដថាខ្លួនអ្នកមានជីវិតមួយដែលមានភាពល្អ និង ពន្លឺ ។
ខេលី អិម អាយុ ១៥ ឆ្នាំ រដ្ឋយូថាហ៍ ស.រ.អា.
យកឈ្នះលើសេចក្តីល្បួង
ការសិក្សាព្រះគម្ពីរជួយខ្ញុំឲ្យរស់នៅតាមដំណឹងល្អនៅសាលារៀន ។ ខ្ញុំទើបតែចាប់ផ្តើមចូលរៀននៅអនុវិទ្យាល័យ ហើយមានរឿងអាក្រក់ៗ និង ការល្បួងជាច្រើន ។ នៅពេលខ្ញុំមានគ្រាដ៏លំបាកក្នុងការទប់ទល់នឹងការល្បួង នោះខ្ញុំព្យាយាមអានរឿងក្នុងព្រះគម្ពីរ ដើម្បីស្វែងរកចម្លើយចំពោះបញ្ហាខ្ញុំ ។ វាជួយបណ្តេញការល្បួង ហើយងាកបែរទៅរកដំណឹងល្អ ។
ប្លែក ស៊ី អាយុ ១២ ឆ្នាំ រដ្ឋ អៃដាហូ ស. រ. អា.
ព្រះចេស្ដានៃព្រះគម្ពីរ
នេះជាលើកដំបូងដែលខ្ញុំព្យាយាមអានព្រះគម្ពីរមរមន ។ ជំពូកដែលខ្ញុំពេញចិត្តនោះគឺ នីហ្វៃទី ២ ២៥–៣៣ ។ មកទល់នឹងពេលនេះ ព្រះគម្ពីរបានពង្រឹងខ្ញុំខ្លាំងបំផុត ។ ចម្រៀងថ្នាក់កុមារបទ « អំណាចនៃព្រះគម្ពីរ » ពុំដែលមានភាពច្បាស់លាស់ចំពោះខ្ញុំជាងពេលនេះឡើយ ។ ខ្ញុំសូមថ្លែងទីបន្ទាល់អំពីភាពពិតពេញលេញនៃព្រះគម្ពីរមរមន ហើយផ្តល់យោបល់យ៉ាងខ្លាំងដល់អ្នក ឲ្យសិក្សាព្រះគម្ពីររៀងរាល់ថ្ងៃ ។
សារ៉ាយ ជេ អាយុ ១៣ ឆ្នាំ រដ្ឋអារីហ្សូណា ស.រ.អា.