Tij Folem Wei blong Sevya
Wan Elefen Insaed long Klasrum
Ol kaonsel miting blong ol tija oli no stap jenisim wei blong tij; oli stap jenisim wei we yumi stap lanem samting.
Mzwakhe Stole i stap fesem wan jalenj. Olsem wan Sandei Skul Presiden blong wod, hem i gat wan responsabiliti we God i givim long hem blong helpem wei blong lanem mo tijim gospel insaed long wod.1
Be ol memba blong wod blong hem long Johanesbeg, long Saot Afrika, oli kam long ol defren bakgraon mo oli wantem ol defren samting. Sam, oli skul gud; sam oli no skul gud. Plante long olgeta memba, oli bin tijim olgeta se olsem ol studen, oli mas lisin nomo, i no blong oli toktok. Sam narawan, oli faet agensem wan kalja blong andastanem se tugeta, ol man mo ol woman oli mas wok blong tij insaed long jos mo insaed long hom.
“Mifala i gat ol pipol we oli stap toktok long ol defren lanwis tu,” brata Sitole i talem. “Be Spirit i wantem blong toktok long wanwan long olgeta.”
Taem we oli statem ol kaonsel miting blong ol tija mo Teaching in the Savior’s Way long las yia, ol wod mo ol branj raon long Jos oli stat blong holem ol kaonsel miting blong ol tija blong toktok raon, blong lanem, mo blong praktisim wanem nao i minim blong tij long wei blong Sevya.
Long taem ia nao Brata Sitole i stat blong luk olsem wanem ol kaonsel miting blong ol tija oli save blesem wod blong hem. Oli save lukluk long ol jalenj blong kalja, oli save mekem moa pipol i tekpat insaed long klas, mo ol defren tingting blong ol memba i save kam ol blesing.
Olsem plante narafalawan raon long wol, Brata Sitole i luksave se Lod i no stap yusum ol kaonsel miting blong ol tija blong jenisim nomo wei we yumi stap tij; Hem i stap yusum ol miting ia tu blong jenisim wei we yumi stap lanem samting.
Wan Elefen wetem Wan Defren Samting
Wan long ol samting we Brata Sitole i bin faenem, i we taem ol tija oli givim moa paoa long ol studen blong tekpat blong lanem samting, evriwan i stap lan long ol defren lukluk blong ol narawan.
Brata Sitole i kam blong andastanem hemia long wan kaonsel miting blong ol tija, taem we wan memba blong wod i serem parabol blong ol blaen man mo elefen, be long wan defren wei. Parabol ia i tokbaot sikis man we oli blaen, mo wanwan i tokbaot elefen long wan defren wei (leg i olsem wan pos, tel i olsem wan rop, longfala maot blong hem i olsem paep blong wota, mo ol nara wei bakegen) from se wanwan i tokbaot wan defren pat.2
“Be traem tingting se elefen ia i ripresentem ol tijing blong gospel,” Brata Sitole i talem. “Nao yumi nidim blong mekem se wanwan memba blong klas oli serem lukluk blong olgeta, blong mekem se, tugeta, yumi kam blong andastanem gud olsem wanem gospel i blesem yumi evriwan.”
From hemia nao ol tija insaed long wod blong Brata Sitole oli sidaon raon long wan tebol long taem blong kaonsel miting blong ol tija—blong mekem se storian i save gohed gud. “Hemia i mekem yumi tingbaot se yumi evriwan i save toktok i semmak nomo,” hem i talem.
Folem Nid blong Olgeta
Long Tokio, Japan, Natsuko Soejima i gat tu tingting long hemwan se bae hem i save tij gud o no. Hem i talem: “Bisop i singaotem mi blong mi kam wan Sandei Skul tija blong ol yut. Mi talem long bisop se bambae mi fraet. Be hem i talem se hemia i wan koling we i kam long God, mekem se mi akseptem.”
Olsem wan grup, klas ia i mekem hem i fraet smol from ol jalenj we wanwan i givim. Tu long ol yut ia oli gat problem long sora, we tufala i no harem gud samting. Sam memba blong klas, we oli aot long nara kantri oli kam long Japan, oli toktok Inglis nomo. Hem i tokbaot tu se hem mo ol memba blong klas blong hem, yia blong olgeta i defren.
Nao, insaed long wan kaonsel miting, Sista Soejima i faenem ansa blong hem. Hem i eksplenem se “mifala i tokbaot blong lavem wanwan memba blong klas, blong lanem nem blong wanwan long olgeta, blong stap prea from olgeta, wan afta wan, mo stap tij—wetem Spirit we i lidim hem—folem nid blong olgeta, mekem se mi stat blong mekem hemia nao. Hem i mekem tu wan samting we hem i bin lanem insaed long kaonsel miting: “Mi yusum wan lanwis we i sendem lav.”
?Risal blong hemia? “Hat blong mi i jenis. Mi stat blong gat laekem ol studen blong mi. Mi kea long olgeta we oli no stap kam mo stap prea from olgeta tu. Taem wan lesen i finis, mi stat blong rere long nekiswan, blong gat taem blong tingting long ol wei blong tij. Mi stap fulap tumas wetem glad.”
Ol Ansa we Oli Ansarem Wan Stret Samting
Brad Wilson, wan presiden blong Sandei Skul long Minesota, long Amerika, i mekemsua se insaed long kaonsel miting blong ol tija, ol tija oli no aot kasem taem we oli tokbaot olsem wanem bae oli jenisim olgetawan from ol samting we oli bin lanem.
Brata Wilson i talem: “Mifala i folem aotlaen we oli givim insaed long buk ia Teaching in the Savior’s Way. “Mifala i tokbaot eksperiens blong ol tija, afta, mifala i toktok raon long wan long ol topik we oli givim i stap. Olsem wan we i lidim miting, mi askem ol kwestin mo talem sot ol tingting we oli bin kamaot. Afta, mifala i praktis long olsem wanem blong putum long aksen. Mifala i seraot long ol smol grup mo toktok raon long: ‘?Wanem nao bae mi mekem i defren from samting we i kamaot long miting tedei?’”
Ron Goodson, wan tija blong kworom blong ol dikon insaed long semfala wod i talem se hem i sapraes blong luk olsem wanem Brata Wilson i tijim kaonsel. Hem i talem: “Mifala i tokbaot olsem wanem nao Sevya bae i tij”. Afta, taem yu stap filim Spirit, yu stap tingting: ‘Hemia i wan samting we mi mas traem wetem klas blong mi.’ Blong tingting abaot Sevya i jenisim wei we yu stap tij. I nomo se, ‘mi gat wan lesen blong rere long hem,’ be i moa abaot ‘?Wanem nao ol dikon ia oli nidim mo olsem wanem bae mi save help blong givim hemia long olgeta?’”
Hem i tingbaot se insaed long jenol blong hem, hem i bin raetem: “Mi bin go long kaonsel miting blong ol tija tedei, mo hemia nao mi nidim blong mekem.” Jenol blong hem i fulap long ol not olsem ia. Naoia, hem i stap rere bifo taem: “Stat eli mo bambae yu kasem ol toktok blong Spirit truaot long wik.” Hem i stap askem ol dikon wanem i stap hapen insaed long laef blong olgeta: “Mi wok gud moa blong helpem olgeta taem mi save gud olgeta.” Mo hem i stap invaetem ol dikon blong help blong tij: “Taem oli mekem olsem, oli lanem samting i gud moa tu.”3
Mi Gohed blong Singsing
“Insaed long kaonsel miting blong mifala, mifala i bin tokbaot olsem wanem miusik i save invaetem Spirit,” Jocelyn Herrington, wan Praemeri tija i talem, we hem i stap long semfala Minesota wod. “Samtaem afta, mi bin stap tijim ol Sanbim. Mi tingting: ‘Bae mi singsing taem bae oli stap kala, mo bae i naes.’ Mi stat blong singsing, mo evriwan i stop mo stap lisin. Mekem se mi gohed blong singsing. I tekem Spirit i kam, mo taem mi finis, evriwan i kwaet i stap, oli wet se bae mi toktok. Mifala i bin tokbaot hemia tu long kaonsel miting blong mifala tu, blong serem testemoni taem we janis i kam. Mekem se mi bin serem testemoni blong mi wetem ol toktok we oli save andastanem.”
Sista Herrington i talem se hem i glad tumas se ol tija blong Praemeri oli stap insaed long ol kaonsel miting ia. Hem i talem: “Yumi stap tokbaot blong tijim ol bigman, be Brata Wilson bae i talem se: ‘?Olsem wanem blong tijim ol yut? ?Olsem wanem blong tijim ol pikinini?’ Hem i mekem mifala i tingting bigwan long hemia, se i gat evri kaen yia blong ol pipol ia we yumi stap tokbaot.”
Stat long Wan Kaonsel i go long Nara Kaonsel
Adam Martin, wan Sandei Skul presiden long Kalgari, Albeta, Kanada i talem se hem i laekem ol tingting we oli kam long kaonsel blong wod. “Presiden blong Rilif Sosaeti, o blong Kworom blong ol Elda bae i talem: ‘Bae mifala i wantem se ol tija blong mifala oli lukluk moa long hemia,’ mekem se mifala i tokbaot hemia long kaonsel miting blong ol tija,” hem i talem.
Taem oli jes statem ol kaonsel miting blong ol tija, ol tija oli no bin save gud wanem bae i kamaot long ol miting ia, mekem se hem i invaetem wanwan tija mo i presentem ol lesenbuk blong trening we oli stap long teaching.lds.org. Hem i talem: “Naoia i olsem wan balong we i rol i go. “Oli save se i wan ples blong tokbaot ol samting we oli stap gogohed.”
Wan miting we i jes pas i lukluk nomo long olsem wanem blong folem Spirit. “Mifala i tokbaot fasin blong rere gud be no wari blong tijim evri samting insaed long buk,” hem i talem. “Wan sista i talem se, oltaem, hem i filim nid blong tokbaot evri samting insaed long lesen. Mifala i bin luk laet long hem taem mifala i tokbaot blong folem insperesen taem tija i stap lidim storian.”
Faenem Ol Ansa Tugeta
Wanwan situesen blong tij i tekem ol janis, ol jalenj, mo samfala blesing. From hemia nao ol kaonsel oli wok. From se oli letem ol tija, wetem help blong Spirit, blong oli lukaotem mo faenem ol ansa long ol stret jalenj blong olgeta.
Geoffrey Reid, wan Stek Sandei Skul presiden long Arisona, YSA, i talem se ol kaonsel miting blong ol tija oli wok gud moa taem ol tija oli andastanem se stamba tingting blong olgeta i blong givim advaes: “Afta nao, oli luksave se oli save helhelpem olgeta.”
Hem i talem se stek i stap lukluk nomo blong helpem ol tija blong oli aot blong askem olgetawan: “?Mi stap mekem gud o no?” i go long “?Olsem wanem nao oli kasem mesej ia?”
Marisa Canova, wan tija blong Praemeri insaed long stek, i talem se folem wan toktok blong Spirit we hem i bin filim insaed long kaonsel blong ol tija, naoia, hem i stap leftemap tingting blong klas blong Ol Valien blong oli prea from wanwan long olgeta. Hemia i bin wok gud, be maet bae i no wok long sem wei long wan adalt klas. “Blong stap prea from evri memba insaed long wan bigfala klas blong Sandei Skul, maet i bigwan tumas,” hem i talem. “Laki, ol tija oli talem: ‘?Olsem wanem nao bae yumi mekem hemia long klas blong mifala?’ Mo mifala i faenem ol ansa tugeta.
“Wanem mi laekem tumas abaot ol kaonsel miting blong ol tija i we oli givim mifala taem blong tingtingbak long olsem wanem mifala i stap mekem, mo wanem mifala i stap mekem,” hem i talem. “Hem i help blong gat sapot mo tingting we i kambak, mo filim se evriwan i wok from wan semfala gol nomo. Mi laekem ol defren lukluk we plante pipol oli tekem i kam long tebol. I helpem mi blong tingting long ol samting we, sapos mi stap miwan, bae mi no tingting long olgeta.”
Taem yumi tekpat mo serem samting insaed long ol kaonsel miting blong ol tija, visen blong yumi long saed blong elefen ia we oli singaotem “tijing blong gospel,” i stat blong kam klia moa. Olsem Brata Stole long Afrika, plante memba raon long Jos oli faenem se paoa blong yumi blong tij folem ol wei blong Sevya oli kam antap; i no jenisim nomo wei we yumi stap tij, be tu, wei we yumi lanem samting.