Ol Ansa we Oli Kam long Ol Lida blong Jos
Olsem Wanem blong Save Yuwan
Aot long wan Fes tu Fes taem long Maj 2017 wetem Presiden Henry B. Eyring mo Elda Jeffrey R. Holland.
Ol dia yang fren blong mifala. Tingting blong mifala i blong yufala i save yufalawan, we yufala i no dipen long wan narawan, se God blong heven i ril i stap, se Hem i save yufala, mo we Pikinini blong Hem i bin pem praes from ol sin blong wol.
Hop blong mifala i blong yufala i kasem, blong yufalawan, wan testemoni we i no seksek, se gospel blong Jisas Kraes i bin kambak long wol ia blong wan las taem. Misin blong Josef Smit i spesel evriwan, be yet, prea we hem i bin givim wetem tingting we i stap daon, i wan eksampol we i helpem yu mo mi. Josef i go long bus blong prea wetem fet se bae wan God we i gat lav bae i ansarem prea blong hem mo givim spel long tingting blong hem we i fasfas. Hem i kam blong save se taem wan i ridim toktok blong God mo taem hem i kasem wan witnes, se hemia nao i tru. Josef i bin prea tu wetem tingting ia we, i no blong lisin nomo, be blong obei wanem i kamaot nomata praes blong pem from. Hem i bin komitim hem blong tekem aksen folem wanem God bae i talem long hem.
Wetem semfala spirit ia, mi wantem sendemaot wan jalenj i go long ol yut blong Jos. Jalenj ia, i olsem: Kam blong save yuwan se olgeta samting ia oli tru. Yu save mekem hemia taem yu folem eksampol blong Josef Smit: stadi long ol skripja, letem ol toktok ia oli draon insaed long hat blong yu, tingtingbak long olgeta bakegen mo bakegen, mo afta, askem God wetem wan tingting blong wantem folem tingting blong Hem—blong stap tru blong mekem tingting blong Hem.
Nomata we jalenj ia i ring olsem wan simpol invitesen, mi promesem yufala se bae i nidim blong yufala i wok from. Mi no save promesem se ol ansa blong yu bae oli kam long wan dei nomo, o wan wik, be mi save promesem se God bae i toktok long yu long wei blong Hem, mo folem taem blong Hem, sapos yu askem Hem wetem fet. Taem yu akseptem mo tekem aksen folem invitesen ia, bambae yu luk se ol ansa oli kam, be tu, bae yu faenem wan rod blong folem blong kasem save long saed blong spirit we bae i blesem yu long laef blong yu.