Mekem Raes Kek Bisnis blong Mi I Stap Gro
Lordita Yagomyom
Misamis Oksidentol, Filipin
Pikja i kam long Carolyn Vibbert
Mi bin wantem sendem boe blong mi i go long misin, be blong salem 1 kilo blong bibingka (raes kek) long wan wik, hem i no inaf blong save sapotem hem long wan misin.
Boe blong mi i bin helpem famli long saed blong mane mo hem i stap wari tumas we bae mifala i stap olsem wanem, mekem hem i no wantem go. I bin had tumas evri dei blong famli blong mi i mekem mane. Mi glad tumas long 25 yia boe blong mifala from stret mo gud fasin blong hem blong wantem givim seves long Lod, be mi luksave se bae mifala i nidim sam merikel blong mekem drim ia blong go long wan misin i kamtru.
Mi joenem wan grup blong indipenden laef. Taem mi mekem samting miwan mo praktisim fet blong mi, mi save se famli blong mi bae i gat blesing. Long wan miting, mi tingting strong blong go long wan pablik maket. Long ples ia, mi bin luk plante woman oli salem ol lokol kaekae. Mi mekem bisnis wetem wan woman. Mi talem long hem se bae mi livim kaekae blong mi long moning blong hem i salem mo bae mi pikimap mane long en blong dei. Bisnis ia, mitufala i glad long hem. I no longtaem afta, plante moa oli wantem pem kaekae long mi. Bisnis blong mi i gro, mo mi kasem 10 moa kastoma long taem ia we mi stap long grup blong indipenden laef.
Mi bin lanem blong seperetem mane blong miwan, mo mane blong bisnis mo pem wan salari i kam long miwan bakegen. Mi bin lanem blong stop blong spendem taem blong mekem ol samting we man i no stap pem, mo lukluk nomo long wanem mi save winim mane long hem. Mi bin lanem tu blong salem samting long sosol media. Aksen patna blong mi long indipenden laef grup i bin helpem mi blong krietem wan Facebook akaon. Afta long hemia, mitufala i lan abaot fasin blong givim wan mak mo putum samting insaed long plastik o katen. Long en, bisnis blong mi i gro kasem poen ia we hasban blong mi i save lego strong wok blong hem, mo wok wetem mi.
Wan i bin askem mi se bisnis blong mi i go olsem wanem. Mi praod blong talem se naoia, mi stap salem 12 kilo blong raes kek.
Hem i talem: “12 kilo long wan wik, !hemia i gud tumas!”
Mi talem: “No brata. “Mi stap salem 12 kilo long wan dei.”
Afta long hemia, boe blong mi i talem se hem i hapi se bisnis blong mi i inaf blong pem evri samting we mifala i nidim.
Hem i talem: “I luk olsem se mi save go long wan fultaem misin.”
Naoia, hem i stap long misin long Filipin San Pablo Misin. Mi glad tumas from indipenden laef wok ia. Lod i bin tru taem Hem i bin talem se: “Hem i stamba tingting blong mi blong mi lukluk long ol sent blong mi” (D&C 104:15).