Papa long Heven I Kea long Bisnis blong Mi
Buyisile
Suma, Kwasulu-Natal, Saot Afrika
Pikja i kam long Allen Garns
Olsem wan singgel mama blong faef pikinini, mi bin filim hevi responsabiliti blong stap lukaotem famli blong mi. Mi mi wan haosgel, be wok blong mi i no givim inaf mane blong lukaotem famli blong mi. Mi joenem wan grup blong indipenden laef blong mekem se mi save lanem olsem wanem blong mekem situesen blong mi i kam gud moa.
Mi kasem insperesen long grup blong “Statem mo Mekem Bisnis i Gro” mo mi disaed se bae mi somap mo salem ol basket we i save holem hot blong putum ol slo kuka insaed long olgeta. Mi stap somap ol bag ia let long naet afta we mi kambak hom long wok blong mi long deitaem.
Mi bin stap wok let long wan naet blong flatem wan bigfala oda blong nekis moning, nao masin blong somap i stop blong wok. Hem i medelnaet, mekem i no gat man blong riperem masin. Masin ia i kam wetem ol smol tul blong hem, mo mi mi neva riperem wan masin blong somap bifo. Mi no save nating se bae mi stat wea.
Nao, mi tingbaot lesen insaed long lesenbuk, Fandesen blong Mi we taetol blong hem i “Praktisim Fet long Jisas Kraes.” Long tetaem ia, mi bin save se mi bin nidim blong putum tras blong mi long Lod. Mi foldaon long ni blong mi, mo askem strong: “Papa long Heven, plis yu helpem mi blong mi riperem masin ia blong mekem se mi save flatem oda ia blong kastoma blong mi blong hem i pikimap long moning. Papa long Heven, !plis helpem mi!”
Afta, mi gat strong filing blong tekem skrudraeva long tul bokis ia mo yusum blong pusum wan pat blong masin blong somap. Mi mekem, mi dipen fulwan long fet blong mi. Mi holemtaet win blong mi taem mi onem masin bakegen. !Hem i wok!
Mi bin save somap long taem blong givim oda blong mi. Mi faenemaot se i olsem wanem blong gat Papa long Heven mo Jisas Kraes olsem ol bisnis patna. Mi save se bae Hem i gohed blong blesem mi taem mi stap lukaotem ol janis blong yusum wanem we mi bin lanem long grup blong indipenden laef.