Stretem Raorao insaed long Mared blong Yu
Hem we i raet i stap long Yuta, YSA.
Ol gudfala blesing oli kam fulap, taem wan i save stretem ol raorao long wan ples we i gat lav long hem.
Ol foto pikja oli kam long Sally Wern Comport
Matt mo Margret (oli jenisim evri nem) oli ofem televisen afta long las sesen blong jeneral konfrens. I gat insperesen insaed long ol mesej, mo oli bin laekem tumas gudfala win we i bin protektem hom blong tufala long wiken ia.
Be Mat mo Magret nao, tufala i bin harem nogud tumas from se, i no 24 aoa yet afta, be tufala i stap raorao blong disaed se wan ekstra mane we Mat i kasem long wok, bae tufala i sevem, o bae tufala i spendem long klos blong skul blong ol bigfala pikinini. Tufala i stap raorao yet, nao Mat mo Magret tufala i go wanwan mo mekem ol narafala wok, mo filim se narawan i no andastanem narawan.
Blong mekem se i gat wan mared we i stap longtaem mo i hapi, ol kapol oli mas lanem olsem wanem blong stretem ol raorao, blong mekem se wanwan i filim se narawan i andastanem narawan, mo ol desisen we oli mekem, tufala tugeta nao i agri long olgeta.
Ol Woning mo Daereksen long Saed blong Spirit
Ol skripja mo ol toktok blong ol profet mo ol aposol, oli givim fulap woning abaot fasin blong stap raorao. Long 3 Nifae, yumi ridim: “hem we i gat spirit blong rao i no blong mi, be hem i blong devel, we i papa blong rao” (3 Nifae 11:29). Elda M. Russell Ballard blong Kworom blong Olgeta Twelef Aposol i bin tijim se Setan “i wok blong pusum wan hip blong raorao bitwin wan papa mo wan mama. Hem i stap switim ol pikinini blong ol i no obei long papa mo mama blong olgeta. … Setan i save se wei we i moa gud blong stopem wok blong Lod i blong daonem wok blong famli mo blong karemaot ol tabu fasin insaed long hom.”1
Ol tingting oli defren, ol fasin o bakraon oli defren, be yumi gat fulap ples blong go long hem blong helpem yumi blong save olsem wanem blong gohed wetem evri samting. Doktrin mo tijing we oli tijim long Sandei wosip mo long ol buk blong Jos oli save helpem yumi mo yumi save askem help long ol profesenol olsem we yumi nidim. Ol kapol oli save lanem ol wei blong stretem raorao. Insperesen i save mekem se ol hat oli jenis mo mekem wanwan i kam sopsop insaed.
Presiden Thomas S. Monson i givim woning ia: “Sam long ol bigfala janis blong yumi blong soemaot lav blong yumi bae i stap insaed long ol wol blong haos blong yumi. Lav i mas stap insaed long stret hat blong famli laef, be yet, samtaem, lav ia i no stap ia. I save gat tumas fasin blong no save wet longtaem, tumas toktok, tumas faet, tumas krae.”2
Taem ol trabol oli stap gohed mo oli kam blong prapa spolem laef blong famli, ol narafala trabol we oli moa strong oli save kam antap, olsem fasin we tingting i no open, selfis fasin, wantem win oltaem, mo hae tingting. Presiden Gordon B. Hinckley (1910–2008) i bin tijim se: “Blong wan longfala taem, mi bin filim se wan samting we i wok gud mo kipim mared i hapi, hem i taem wan i stap wari se kompanion blong hem bae i stap gud mo gat wan gudlaef. Long plante taem, fasin blong stap selfis i samting ia we i mekem se i gat raorao, hasban mo waef i seperet, divos mo hat we i brok.”3
Elda Marvin J. Ashton (1915–94) blong Kworom blong Olgeta Twelef Aposol i talem tu: “Taem wan i luk ol nogud filing mo nogud samting we i kamaot long raorao, i gud blong hem i askem hemwan: ‘?From wanem mi stap tekpat long hemia?’ …
“… hem i impoten blong luksave se yumi jusum fasin we yumi wantem folem. Long rus blong raorao, i gat tu problem ia we i stap longtaem finis i kam, we hem i hae tingting.”4
Nomata wanem i stamba tingting, yumi nidim blong lanem ol niufala skil mo mekem hat blong yumi i sofsof taem ol problem i stap gohed.
Ol Stamba blong Raorao
I gat plante stamba blong raorao, we i stat wetem ol samting nating i go kasem ol nogud fasin blong stap toktok. Antap long hemia, blong winim fasin blong stap selfis mo tingting we i no open, ol kapol oli stap fesem ol nara stamba blong raorao we oli stap long evri ples, olsem:
-
Ol niufala kapol oli stap lan blong stretem olgeta folem ol niufala stael blong laef
-
Ol samting we oli defren bitwin ol man mo ol woman
-
Kros we i kamaot taem wan i taed tumas
-
Ol tingting we oli defdefren abaot fasin blong lukaotem ol pikinini mo lukaotem mane
-
Ol pikinini oli lanem blong yusum fridom blong joes
-
Ol samting we wan i laekem o no laekem we i defren long narawan
-
Lusum kontrol from tingting i fasfas tumas
-
No stap andastanem samting o no gat skil ia blong stretem raorao
Ol Woning long saed blong Bigfala Kros
Ol raorao insaed long mared o famli oli kamkamaot from i no gat kontrol taem wan i kros bigwan. Sapos yumi no lukaotgud, yumi save gohed blong tokbaot wan taem blong kros mo stap gohed blong tingting long wei we narawan i mekem nogud long yumi long taem ia. Moa yumi tokbaot mo tingting long hemia, bae yumi faenem moa risen blong tokbaot nogud tingting ia blong yumi. Samting ia i stopem yumi blong stap kwaet, mo taem wan nara kros i kam antap afta long faswan we oli no stretem yet, nao yumi lusum kontrol mo fasin blong yumi i save lidim yumi blong bosta.
Eksampol, long wan taem blong karem kaonsel, Marilyn i tokbaot se i bin had tumas blong ledaon long bed afta we hem mo hasban blong hem i singsingaot long tufala. Hem i talem: “Mi save se mi mi raet. “Mi save se bae hem i onem laet mo bae i talem sore, be hem i neva mekem. Moa mi tingbaot hemia, moa mi harem se mi kros. Taem mi harem se hem i stat blong pulum win, mi no save tekem nomo—mi jiamaot long bed mo mi singaot moa long hem, mo afta, mi go long rum daon. ?Yu save bilivim hemia, se hem i no talem sore nating afta long hemia? Eksperiens blong Marilyn i wan gudfala eksampol long wanem blong no mekem taem yumi kros i stap.
Ol fasin, iven ol sotmaen fasin, oli had blong lego. Be ol hasban o waef oli save lanem ol skil blong help. Hemia sam gudfala praktis blong yusum:
7 Tingting blong Mekem Tingting i Kamdaon
Givim jalenj long tingting kwiktaem. Long eksampol blong yumi, Marilyn i save talem nomo long hemwan: “mi luk se mi raet, be mi mi mekem i go bigwan tumas. Rilesensip wetem hasban blong mi i moa impoten long mi bitim blong stap raorao wetem hem.”
Letem ol filing o tingting blong yu oli kamdaon bifo yu traem blong stretem wan problem. Wet se ol hot filing blong yu we oli stap gohed, oli kam kwaet.
Faenem wan nara samting blong mekem. Jusum blong tingting long wan nara samting, o go wokbaot.
Raetemdaon ol tingting blong yu. Long sam, hemia i help blong yu luksave samting we i stap.
Talemaot ol filing blong yu long ol gudfala wei. Blong yu singsingaot abaot ol filing blong yu bae i no helpem yu blong “kamaot long sistem we i stap.” Moa yu singaot wetem kros, moa bae ol filing blong yu bae oli kam strong moa.
Lisin long sam kwaet miusik o ridim sam buk we i save leftemap tingting blong yu.
Stat bakegen. Luk yuwan long stat blong raorao, o wanem samting yutufala i no bin agri long hem. Stadi i soem se ol fas tri o faef minit olsem blong wan storian, i putumdaon fandesen blong wanem bae i hapen afta. Talem: “Hemia i wan rong rod. Statem bakegen.”
Ol Step blong Stretem Raorao
Strengthening Marriage, wan buk blong LDS Family Services i talem se i gat trifala step blong stretem ol raorao: (1) talemaot ol defren tingting o lukluk, (2) lukluk gud long ol poen we oli stap, mo (3) jusum ol ansa we bae i stret long tingting blong evriwan.5 Olgeta step ia oli stanap long wan wei blong toktok mo fasin blong serem tingting, we evriwan i wok tugeta mo oli tokbaot ol poen we wanwan i gat wari long hem.
1. Talemaot Ol Defren Tingting o Lukluk
Wanwan man o woman i serem ol lukluk blong olgeta long wan wei we i ones mo i no atakem narawan. Samtaem, toktok we oli givim wetem tingting i save stretem problem taem we i kam klia se wanem we oli no bin agri long hem long stat, i from wan i no andastanem narawan. Eksampol, wan waef we i ting se hasban blong hem i selfis mo stap talem se bae waef i mas go long wan skul basketbol gem wetem hasban blong hem be i no blong tufala i go aot long wan dina, bae oli save andastanem se hasban ia i no intres tumas long basketbol be i wari long wan we i plei we i stop blong kam long klas blong Sandei Skul blong hem.
2. Lukluk Gud long Ol Poen we Oli Stap
Ol kapol oli lukluk long ol poen we oli stap long wan level we i dip moa. Samting blong lukluk nomo long hem i blong andastanem mo akseptem poen blong narawan. Sapos yumi gohed long eksampol blong basketbol, waef ia, we i andastanem wari blong hasban blong hem from studen ia, i save bilivim tu se hasban blong hem i stap gat wan fasin blong oltaem putum nid blong ol nara pipol fastaem long nid blong mared blong tufala. Long kes olsem, i mas gat wan storian wetem moa dip tingting i mas tekples, mo long storian ia, wanwan i talemaot ol filing blong hem long wan gudfala wei, mo nao, wanem we i kam agens bae i kamaot, mo fasin blong wokwan i tekples.
3. Jusum Ol Ansa we Bae i Stret long Tingting blong Evriwan
Ol kapol oli stap saksakem tingting, mo tugeta, tufala i disaed tugeta long wan ansa. Lukluk i mas stap long wanem nao wanwan i save mekem blong lukluk long ol poen we oli stap, be i no long wanem narawan i save mekem. Ol kaen rod ia blong tokbaot samting i save testem waes blong wan, mo fasin blong wan blong save wet longtaem, be wetem taem, i save mekem se wanwan i biliv se i oraet blong save talemaot ol filing mo wanwan i gat tras se bae wanwan i lukluk long wanem wanwan i wantem. Kapol ia i save agri blong spendem wan Fraedei naet tugeta long wan basketbol gem, wan Fraedei naet we hasban hemwan i go long basketbol gem, mo tufala nara Fraedei naet we tufala kapol i go wokbaot o mekem samting tugeta. I no impoten tumas long olsem wanem nao kapol ia i jusum blong spendem Fraedei naet, be i impoten se kwaliti blong mekem desisen ia i stret long tingting blong tufala tugeta.
Ol Risal blong Stap Stretem Raorao
Ol gudfala blesing oli kam fulap, taem wan i save stretem ol raorao long wan ples we i gat lav long hem. Hemia i tekem tu sekiuriti; blong wan i save gro we i lidim man i kasem pis insaed long hem; fet we i kam antap; fasin we i kam gud moa; mo stret mo gud fasin blong yuwan.
Taem oli stretem ol raorao, nao oli save folem ol niufala wei. Doa i open nao blong ol hasban mo waef oli talem ol gudfala tingting mo oli soem sapot. Sista Jean B. Bingham, Rilif Sosaeti Jeneral Presiden, i talem: “Ol toktok oli gat bigfala paoa we oli save mekem yu sapraes; oli save bildimap man, mo i save pulumdaon man. Yumi evriwan i save tingbaot ol nogud toktok we oli pulum yumi kamdaon, mo ol nara toktok we oli talem wetem lav we i leftemap spirit blong yumi i go antap evriwan. Blong jusum blong talem nomo samting we i gud abaot—mo long—ol narawan, i stap leftemap mo mekem olgeta raon long yumi oli kam strong moa, mo i stap helpem ol narawan blong folem rod blong Sevya.”6
Ol kapol we oli mekem ol progres ova wan longfala taem blong save stretem ol raorao, oli kasem ol bigfala praes. Wan hasban we i gat hadtaem long rilesensip blong hem i talem: “I had long mi blong mi lukluk i gobak, mo luk se i bin olsem wanem bifo mo biliv se hemia i bin ril. ?Olsem wanem nao bae mi save tritim waef blong mi long wei we mi bin mekem? Mi tangkyu tumas long Spirit blong i kasem tingting blong mi, mo long waef blong mi from longfala tingting blong hem we hem i bin soemaot long mi.”
Las Toktok
Blong winim ol raorao i nidim blong man i wokhad from mo i stap folem samting oltaem. Nekis samting we bae yu talem o mekem, i save statem wan fasin blong toktok o mekem samting we i moa gud insaed long mared blong yu. Yu tu, yu save kakae ol frut blong Spirit olsem we Ol Man blong Nifae oli bin gotru long hem: “Mo i bin hapen se i no bin gat eni rao long graon, from lav blong God we i bin stap insaed long ol hat blong ol pipol.
“Mo i no bin gat ol tingting blong wantem samting blong narafala man, o ol rao, o ol faet, … ; mo i tru we i no save gat wan pipol we i moa hapi.” (4 Nifae 1:15–16).