Kam blong Respektem Miwan tru long Fasin blong Dipen long Miwan
José Alberto Navas (olsem we oli talem long Miriam Sweeney)
San José, Kosta Rika
Mi bin mared, mi bin gat tri pikinini, mo mi no bin gat wok. Mi no gat wok nating mo hemia i bin mekem se mi no gat hop. Mi wari long sefti blong famli blong mi, mo mi stop blong biliv long miwan.
Waef blong mi, Karla, i leftemap tingting blong mi blong go long ol indipenden laef grup. Mi sem tumas blong talem se mi no gat wok, be hem i leftemap tingting blong mi blong go long grup ia blong mi save lukaot long famli blong mifala.
Mi no wantem traem, be mi mekem. Taem mi bin stap long grup ia, mi luksave se Inglis blong mi i save kam wan gudfala samting long wol blong wok. Mi bin stadi Inglis long misin blong mi, be mi save tokbaot relijin nomo. Mi joenem ol Inglis klas blong Jos blong mekem mi save toktok moa gud long lanwis ia. Taem mi kambak long Inglis klas blong mi, wan dei, Karla i givim telefon long mi.
“?Huia?” Mi askem.
“Mi no save,” hem i ansa. “Oli stap toktok Inglis.”
Hem i wan ofisa we i stap lukaot long ol wokman blong wan long ol bigfala kampani blong Kosta Rika, we i askem blong intaviu long mi. Mi sek, be intaviu ia i bin gohed gud. Afta long hemia, mi bin lanem se Karla nao i setemap intaviu ia.
Mi kasem wok ia, mo mi tingbaot olsem wanem nao indipenden laef grup ia i bin helpem mi. Afta, mi tingting long olsem wanem mi save yusum gud moa wanem we mi bin lanem. Mi stat blong lukaotem wan wok we i gud moa mo mi bin kasem wan. Afta, mi wok blong statem bisnis blong miwan blong bildim haos.
Mi no save tingting se weaples nao famli blong mi mo mi bae i stap long hem sapos i no bin gat stat we mitufala i bin kasem long indipenden laef wok ia. Mi lan blong gat fasin blong putum tingting i stap daon, mo blong askem Lod blong givhan long mi. Mi bin lanem tu blong letem olgeta we oli wantem helpem mi blong oli blesem laef blong mi. Mifala i bin gat fulap blesing tumas. Naoia, mi gat respek long miwan, mo mi save blesem famli blong mi wetem mane ia we mi stap winim. Mi save se Spirit i blesem yumi taem yumi gat tingting i stap daon.