Ol Kwestin mo Ansa

“Antap long prea mo skripja stadi, ?wanem nao i bes rod blong mekem testemoni blong mi i kam strong moa?”

Testemoni blong yu, maet bae i no kam fulwan long wan taem. Bae i gro wetem wan eksperiens long saed blong spirit folem wan narawan—olsem ol skripja oli talem: “tijing folem tijing, rul folem rul,” (2 Nifae 28:30). Afta, yu mas fidim mo mekem testemoni blong yu i kam strong moa, semmak olsem wan sid we i stap gro (luk long Alma 32:28–43). Mo olsem we wan plant i no save laef wetem wota nomo, i no gat wan wei we i “beswan” blong mekem testemoni blong yu i kam strong moa. Yu nidim plante defren wei.

Prea mo skripja stadi oli ol gudfala wei blong fidim testemoni blong yu. Taem yu stap stadi long gospel mo prea wetem tru hat blong yu blong save sapos wan samting i tru, Tabu Spirit bae i helpem yu blong filim trutok blong gospel (luk long Moronae 10:4–5).

Yu save mekem testemoni blong yu tu i kam strong moa taem yu obei long olgeta komanmen. Taem yu stap laef folem wan prinsipol blong gospel—olsem blong livim kakae, blong kipim Sabat dei i tabu, o blong tekem sakramen—yu stat blong kasem wan testemoni long olsem wanem mo from wanem hem i tru, be i no se hem i tru nomo. Jisas i talem se taem yu jusum blong “mekem folem tingting blong hem,” bambae yu “[save doktrin]” (Jon 7:17).

Wan nara wei blong fidim testemoni blong yu, i blong serem testemoni blong yu. Presiden Boyd K. Packer (1924–2015), Presiden blong Kworom blong Olgeta Twelef Aposol i talem se: “!Wan testemoni, i blong faenem hem taem yu serem testemoni ia!” (“The Candle of the Lord,” Ensign, Jen 1983, 54; Tambuli, Julae 1983, 34). Yu save serem testemoni blong yu long Jos, mo seminari, long hom mo wetem ol fren blong yu. Taem yu mekem olsem, Tabu Spirit i save testifae long yu se wanem yu serem i tru.

Taem yu stap mekem testemoni blong yu i strong long plante defren wei, bambae hem i gro mo bae i kam dip moa, mo bae yu filim pis mo glad.

Wok wetem Ol Misinari

Misinari wok i bes wei, long mi, blong mi mekem testemoni blong mi i kam strong moa. Evri taem mi wok wetem ol misinari, mi filim lav blong Kraes.

Joy D., 19 yia, Leiti, Filipin

Traehad blong Stap Wan Disaepol

Yu save mekem testemoni blong yu i kam strong moa taem yu traehad oltaem blong stap wan tru disaepol blong Jisas Kraes. Taem yumi obei long ol komanmen blong God, i mekem se yumi strong long ol testemoni blong yumi, mo hemia i mekem ol testemoni blong yumi oli kam strong moa bakegen, mo i mekem yumi rere from kingdom blong God (luk long D&C 76:79). Yu save mekem testemoni blong yu tu i kam strong moa taem yu serem testemoni blong yu.

Elda Mule Simon, 23 yia, Demokratik Ripablik blong Kongo Lubumbasi Misin

Lisin long Tabu Spirit

Blong stap go long jos, stap ridim ol skripja, stap lisin long ol toktok blong konfrens, mo ol narawan moa bae oli helpem yu nomo blong mekem testemoni blong yu i kam strong moa sapos yu lisin long Tabu Spirit. Bambae Hem i testifae abaot trutok long yu. Lisin oltaem long Tabu Spirit, from se Hem i stap ia, mo bae i helpem yu blong mekem testemoni blong yu i kam strong moa.

Alyssa B., 16 yia, Vijinia, YSA

Go long Wan Misin

Blong go long wan misin bae i mekem ol testemoni blong yu mo blong ol narawan we yu stap tijim oli kam strong moa. Long wan misin, bae yu lan blong dipen fulwan long Lod, be i no long paoa blong yu. Wan misin bae i mekem yu kam strong moa, mo taem yu stap givim seves long Lod mo mekem wok blong Hem, bambae i mekem testemoni blong yu i kam strong moa.

Elda Bailey Peaali’I Williams, 19 yia, Singapua Misin

Serem Wanem we Yu Save se I Tru

Mi bin lanem we wan long gudfala wei blong mekem testemoni blong mi i kam strong moa i blong serem testemoni ia wetem ol narafala man. Evri taem we mi serem wanem we mi biliv se i tru—nomata se i simpol mo i smol—mi filim i gud tumas insaed long jes blong mi, mo semtaem, mi kasem strong konfemesen insaed long hat blong mi se olgeta samting we mi bin talem, !oli tru tumas! Long ol narafala toktok, mi filim se testemoni blong mi i bin kam strong moa.

Douglas S., 20 yia, São Paolo, Brasil

Blong Kam Moa Olsem Kraes

Yu save mekem testemoni blong yu tu i kam strong moa taem yu obei long olgeta komanmen. Mi bin mekem testemoni blong mi i kam strong moa taem mi talemaot klin lav blong Kraes mo taem mi bin givim seves long ol narawan olsem we Sevya i bin mekem.

Kyung Jin P., 17 yia, Seul, Saot Koria

Serem Testemoni blong Yu

Wan nara wei blong fidim testemoni blong yu, i blong serem testemoni blong yu. Samtaem, taem yu serem testemoni blong yu, yu faenem testemoni blong yu. Yu save livim kakae tu blong save yuwan sapos wanem we oli tijim yu i tru. Mi mekem tufala samting ia, mo oli bin helpem mi bigwan blong mekem testemoni blong mi i kam strong moa.

Porter S., 12 yia, Aedaho, YSA

Givim Seves long Ol Nara Man

Antap long prea mo skripja stadi, mi ting se bes wei blong mekem testemoni blong yu i kam strong moa, hem i tru long seves. Taem yumi givim seves long ol narawan, yumi soem long God se yumi kea long ol pikinini blong Hem. Mo tu, yumi save kasem Spirit taem yumi stap mekem wok blong God. Mi save plante taem, mi bin kasem kamfot tru long ol hadtaem mo ol ansa long ol kwestin taem mi stap givim seves.

Caroline J., 18 yia, Yuta, YSA

Ol ansa ia oli blong help mo blong gat tingting, oli no ol ofisol toktok we oli kam long Jos abaot doktrin blong Jos.

Fidim Testemoni blong Yu

Presiden Henry B. Eyring

“Semmak olsem wan plant we i stap gro, testemoni i wan samting we yumi mas fidim, sapos no, bae i go drae. … Fasin blong stap obei long ol komanmen i pat blong kaekae we yu mas fidim testemoni blong yu wetem.”

Presiden Henry B. Eyring, Fas Kaonsela long Fas Presidensi, “A Living Testimony,” Liahona, Mei 2011, 125.

Kwestin we I Stap Kam

?Olsem wanem mi save invaetem Spirit i kam insaed long hom blong mi taem ol pipol oli stap faet o stap raorao?

Sendem ansa blong yu, mo sapos yu wantem, wan gud kwaliti foto bifo 15 Novemba 2017, i go long liahona.lds.org (klik “Submit an Article”) o sendem long imel long [e-mail]

Plis putum ol infomesen ia i kam wetem: (1) ful nem, (2) deit we yu bon long hem, (3) wod o branj, (4) stek o distrik, (5) leta blong yu blong givim raet, mo, sapos yu no gat 18 yia yet, papa o mama blong yu i mas raetem leta i kam blong givim raet (oli akseptem tu tru long imel) blong pablisim ansa mo foto blong yu.

Bae oli save jekem mo oli save katemaot sam pat blong ol ansa blong oli stret gud mo oli klia blong man i andastanem.