Wokbaot blong Jane
Hem we i raet i stap long Teksas, YSA.
Niu Yok, YSA, 1843.
Jane Manning i bin stap lukluk sip i flot stat long haba i go kasem Lek Eiri. Hem i filim se ol drim blong hem oli stap flot i go wetem tu.
Wan yia i pas, hem i bin joenem Jos blong Jisas Kraes blong Ol Lata-dei Sent, mo hem i disaed blong muv blong stap wetem ol narafala Sent long Nauvu. Mama blong hem mo seven nara memba blong famli oli bin travel wetem hem i go daon long Eri Kanal i go kasem Bufalo, Niu Yok. Be taem oli kasem Bufalo, oli no bin save go long bot from kala blong skin blong olgeta.
“?Bae yumi mekem wanem naoia?” brata blong hem, Isaac, i askem long kwaet fasin.
Kwestin ia i ring i go long kolkol ea i go. Nauvu i stap 1287 kilometa longwe. Oli save givap mo gobak hom, o oli save traem blong go long wan nara taem. …
!Be Jane i no save wet! Hem i bin save se Buk blong Momon i tru. God i stap toktok bakegen tru long ol profet. Hem i nidim blong kasem Nauvu blong stap wetem famli blong hem.
Jane i pulum solda blong hem i go antap, mo i luk i go long Wes. “Yumi wokbaot.”
Mo oli bin wokbaot. Kasem taem we sus blong olgeta oli brokbrok evriwan. Kasem taem we leg blong olgeta, skin i open mo blad i ronaot long olgeta mo oli mas prea blong oli kam oraet. Samtaem, oli bin slip aotsaed, mo kolkol i hevi tumas nao i olsem se i sno. Sam pipol oli tok nogud long olgeta mo talem se bae oli putum olgeta oli go long kalabus from oli ting se oli ol slef we oli ronwe long Masta blong olgeta. Oli no bin save se famli Mannings i wan fri blak famli. Mo oli wokbaot i go, oli singsing ol hym blong pasem taem.
Bae oli kam kolosap long Nauvu taem we oli kasem wan reva.
“I no gat brij,” Isaac i talem.
Jane i sakem hed blong hem blong agri wetem hem. “Bae yumi mas wokbaot i go krosem reva nao.” Taem hem i wokbaot i go long reva, wota i kasem angkol blong hem. Sloslo, hem i muv i go fored. Wota i go kasem ni blong hem, mo afta i go kasem wes blong hem. !Taem hem i kasem medel blong reva, wota i kasem nek blong hem finis! Laki nomo, i no go dip moa, mo evri Manning famli i krosem gud reva ia.
Nao oli kasem Nauvu. Jane i save luk ol naes laemston wol blong Nauvu Tempol antap long wan hil i lukluk i go daon. Nomata i no finis yet, hem i laekem tumas. Nao wan i poenem olgeta i go long haos we Profet Josef i bin stap laef long hem.
Wan tolfala woman wetem dak hea i stanap long veranda ia. “!Kam insaed, kam insaed!” hem i singaot long olgeta. “Mi mi Ema Smit.”
Ol nekis minit afta, mi no tingbaot gud. Jen i mit wetem profet, mo hem i setemap ol jea raon long rum blong ful famli Manning. Jane i draon insaed long jea wetem glad mo i lisin taem Josef Smit i presentem olgeta long evriwan, wetem fren blong hem, Dokta Bernhisel. Nao Josef i tanem hem i go long Jane: “Yu yu hed blong smol grup ia, i tru?” hem i askem.
“!Yes, i tru!” Jane i ansa.
Josef i smael. “!God i blesem yu! Naoia, mi wantem harem stori blong wokbaot blong yufala.”
Jane i tokbaot leg blong olgeta we i gat ol soa, mo we oli slip long sno, mo oli krosem reva. Evriwan i lisin kwaet nomo. “Be i no nogud tumas,” Jen i talem long en. “Mifala i gohed we mifala i glad, i singsing long ol hym, mo talem tangkyu long God from bigfala gud fasin blong Hem mo sore blong Hem blong blesem mifala, blong protektem mifala, mo hilim ol leg blong mifala.”
Blong smol taem, evri samting i kwaet wantaem. “?Wanem tingting blong yu long hemia Dokta?” Josef i talem mo semtaem i slapem ni blong man ia. “?Yu no ting se hemia i fet?”
“Sapos i mi, mi fraet se bae mi arier mo mi gobak long hom blong mi” Dokta Berhnisel i talem.
Josef i agri long hed blong hem mo i lukluk Jane mo famli blong hem: “God i blesem yufala. Yufala i ol fren blong mi.”