Stap Kam Ol Tru Disaepol

I Kam long Presiden Henry B. Eyring

Fas Kaonsela long Fas Presidensi

Long evri sakramen miting, yumi gat spesel janis blong mekem promes long Papa long Heven se bambae yumi tingbaot Sevya oltaem mo bambae yumi obei long ol komanmen blong Hem (luk long Moronae 4:3; 5:2; D&C 20:77, 79). Blong stap tingbaot Hem, bae i kam long yumi olsem nomo taem yumi stap tekem nem blong Hem long yumiwan. Yumi stap mekem hemia long plante wei, speseli taem yumi givim seves long ol narawan long nem blong Hem, taem yumi ridim ol tabu toktok blong Hem, mo taem yumi prea blong save wanem nao Hem i wantem yumi blong mekem.

I bin hapen long mi taem mi bin baptaesem wan yang man. Mi bin save se ol wokman we Sevya i odenem oli bin singaotem mi olsem wan misinari blong tijim gospel blong Hem, mo blong testifae abaot Hem mo tru Jos blong Hem. Misinari kompanion blong mi, mo mi, i bin promesem yang man ia se bambae hem i kam klin tru long paoa blong Atonmen blong Jisas Kraes taem bae hem i sakem sin wetem fet long Sevya, mo taem bae hem i kasem baptaes long han blong wan long ol wokman blong Sevya we i gat raet blong mekem hemia.

Taem mi leftemap yang man ia aot long ol wota blong baptaes blong ples blong baptaes, hem i toktok slo long sora blong mi: “mi mi klin, mi mi klin.” Long tetaem ia, mi bin tingbaot we Jon Baptaes i bin baptaes Sevya insaed long Jordan Reva. Moa long hemia, mi bin tingbaot se mi bin stap mekem wok blong sevem man we i kam long wan Sevya we i laef bakegen long ded mo i stap laef—wetem help blong Tabu Spirit, olsem we i bin hapen long Jon.

Long mi mo wanwan long yumi, blong stap tingbaot Sevya i moa bitim blong stap dipen long wan memori blong save mo eksperiens wetem Hem. Yumi save mekem ol joes evri dei we oli stap pulum yumi kolosap long Hem naoia.

Simpol joes ia, maet hem i blong ridim ol skripja. Taem yumi mekem olsem, yumi save kasem ol filing ia blong stap kolosap long Hem. Long mi, mi stap kam kolosap long Hem plante taem, taem we mi stap ridim Buk blong Momon. Long ol fas minit we mi ridim ol japta blong 2 Nifae, mi harem long maen blong mi ol voes blong Nifae mo Lihae we tufala i tokbaot Sevya olsem se tufala i savegud Hem. Yumi filim wan filing ia se yumi kolkolosap long yumi.

Long yu, maet ol nara ples insaed long ol skripja oli save pulum yu i go kolosap long Hem. Be nomata long wanem ples o long wanem taem yufala i stap ridim toktok blong God, bambae yufala i kam antap long tingting blong yufala blong stap tekem nem blong Hem, long evri dei laef blong yufala.

Tingting ia blong wantem mekem hemia bambae i jenisim wei we yu givim seves insaed long Jos blong Lod. Bambae yu prea long Papa long Heven blong kasem help blong mekem i kam gud moa wanem we yu luk se i wan smol koling. Help we bambae yu askem, i paoa ia blong fogetem yuwan mo lukluk moa long wanem we Sevya i wantem blong olgeta ia we Hem i singaotem yu blong helpem.

Long seves blong mi blong helpem ol pikinini blong mi, mi bin filim han blong Hem, mo we Hem i stap kolosap taem mi bin prea blong save olsem wanem blong helpem olgeta blong oli faenem pis ia we gospel nomo i stap tekem i kam. Long ol kaen taem olsem nao, mi no lukluk tumas long hamas mi mekem gud olsem wan papa, be mi kea fulap long sakses mo gudlaef blong ol pikinini blong mi.

From mi bin wantem blong givim, long olgeta we mi stap givim seves long olgeta, wanem we Sevya i wantem givim long olgeta, nao hemia i lidim mi long ol prea we mi stap plis long Papa long Heven, wetem tru hat, long nem blong Jisas Kraes. Taem yumi stap prea long wei ia—long nem blong Sevya, wetem fet long Hem—Papa i stap ansa long yumi. Hem i stap sendem Tabu Spirit blong lidim yumi, gaedem yumi, mo leftemap tingting blong yumi. From se, oltaem, Spirit i stap olsem witnes blong Sevya (luk long 3 Nifae 11:32, 36; 28:11; Ita 12:41), nao, paoa blong yumi blong lavem Lod wetem ful hat blong yumi, ful maen mo ful paoa blong bodi i kam antap (luk long Mak 12:30; Luk 10:27; D&C 59:5).

Blesing ia blong stap tingbaot Hem evri dei mo naoia bambae oli kam sloslo mo oltaem taem yumi wok blong Hem, stap kakae toktok blong Hem, mo stap prea wetem fet long nem blong Hem. Mo taem bae yumi stap tingbaot, bambae hemia i tanem yumi i kam ol tru disaepol blong Lod Jisas Kraes insaed long kingdom blong Hem long wol ia—mo afta, wetem Papa blong Hem insaed long wol blong glori we i stap kam yet.