Sera mo MRI
Hem we i raet i stap long Kolorado, YSA.
Maet bae Tabu Spirit i save helpem Sarah blong i no fraet tumas.
“Taem Kraes i kam long wol, Hem i bin promesem se bae Hem i sendem Tabu Spirit blong kamfotem yumi, Hem i fren blong yumi we i tru mo i no save finis” (luk long Children’s Songbook, 105).
“I luk olsem se Sarah bae i nidim blong kasem wan MRI blong bak blong hem (MRI i olsem blong pas long masin blong Xrei),” Dokta Frank i talem. Hem i smael long Sarah “Bae mi putum wan apoenmen blong mekem wan tumoro. Bae mi kambak i no longtaem.”
Bak blong Sarah i bin stap soa blong longtaem nao. Taem hem i bin wekap long moning ia, i soa tumas mekem se hem i no save stanap stret, mo hem i no save wokbaot. Sarah mo mama blong hem i bin go blong Dokta Frank blong faenemaot wanem i rong.
“?Wan nara MRI? Sarah i askem, mo i lukluk i go long mama blong hem. Hem i bin kasem wan MRI bifo. Hem i tingbaot se hem i bin fraet tumas insaed long bigfala paep ia we i stap tekem pikja blong insaed long bodi blong hem.
“Mi sore Sarah,” Mama i talem. “Be ol pikja ia bae oli helpem Dokta Frank blong luk se wanem i rong wetem bak blong yu. Mi save se yu save mekem. Mo bambae mi stap ia long saed blong yu.” Mama i holem strong han blong Sarah.
“Be yu no save kam insaed wetem mi,” Sarah i talem. Hem i benem hed blong hem mo wota i ron folem fes blong hem. Mama i save stap wetem hem insaed long rum, be taem hem i stap insaed long paep blong masin, bae hem i stap hemwan nomo.
Mama i putum han blong hem raon long Sarah. “Hemia i tru be ?yu save se huia i save stap ia blong kamfotem yu?”
Sarah i tingbaot wan nem we hem i harem oli singaotem Tabu Spirit long hem: Spirit blong Givhan. Maet bae Tabu Spirit i save helpem Sarah blong i no fraet tumas.
“?Tabu Spirit?” Sarah i askem.
Mama i sakem hed blong hem blong agri. “Yes. Yu save prea blong Tabu Spirit i save helpem yu. Papa mo mi bae i prea from yu tu.”
Hemia i givim wan gudfala tingting long Sarah. “?Mi save askem Papa i givim wan blesing?”
Mama i smael. “Yes, i oraet nomo. Mi save se bae hem i laekem blong mekem hemia.”
Long naet ia, Papa i putum han blong hem antap long hed blong Sarah, mo i givim hem wan prishud blesing. Taem hem i blesem Sarah se bae Tabu Spirit i givhan long hem, wan naes wom filing i kam long hem. Filing ia i stap wetem hem ful naet.
Long nekis dei, Sarah i ledaon long bed ia we bae i go insaed long bigfala paep blong MRI masin. Hem i stap ripitim ol toktok we Papa blong hem i bin talem long hem long blesing: Tabu Spirit bambae i stap ia blong i givhan long yu. Sarah i holemtaet strong han blong Mama blong hem. Afta nao, nes i pusum hem i go insaed long paep.
MRI masin i mekem sam fani noes, mo i tekem ol pikja blong bak blong hem. Sarah i mas ledaon we i no muv nating blong mekem se ol pikja oli klia gud. Hem i bin fraet blong smol taem, be afta, wom filing ia i kambak bakegen. I olsem se Mama nao i stap holem hem long han blong hem. O hem i stap long wan naes blangket. Hem i bin save se evri samting bae i oraet. !Hem i sek, be MRI ia i finis finis!
Insaed long ofis blong hem, Dokta Frank i soem ol pikja blong bak blong Sarah long Sarah mo mama blong hem. “Yu mekem gud. Yu ledaon kwaet evriwan,” Dokta Frank i talem taem hem i stap nildaon long saed blong bed blong hem. “Olgeta pikja ia blong bak blong yu i soem se bae oli nidim blong operetem yu blong yu save wokbaot gud moa.”
Sarah i solemdaon spet blong hem.
“Bae i gud blong mifala i mekem operesen ia kwiktaem,” Dokta Frank i talem mo lukluk mama blong Sarah. Afta i lukluk Sarah. “Maet bae i tekem samfala wik afta blong yu filim gud bakegen, be afta we mi luk yu tedei, mi save se bae yu mekem i oraet nomo.”
Sarah i traem blong tingting long evri samting we bae hem i save mekem afta we Dokta Frank i mekem gud bak blong hem. Bae mi save ron mo swim mo jiam insaed long wan bigfala hip blong ol lif. Hem i wantem mekem olgeta samting ia tumas. Be !blong go long operesen, i wan samting we i mekem hem i fraet moa bitim wan MRI! Nao Sarah i tingbaot ol prea blong hem, mo spesel blesing blong hem. Papa long Heven i bin sendem Spirit blong Givhan i kam long hem. Bambae Spirit i helpem hem bakegen.
Hem i lukluk Dokta Frank. “?Afta bae mi save jiam insaed long wan bigfala hip blong ol lif?” hem i askem.
Hem i laf. “Afta bae yu save jiam insaed long wan bigfala hip blong ol lif.”