Faef Lesen blong Ol Yang Adalt: I kam long Ol Yang Aposol

I Kam long Matthew C. Godfrey

Jos Histri Dipatmen

?Wanem nao yumi save lanem tedei aot long ol eksperiens blong samfala long ol fas Aposol blong Restoresen?

Oli bin gat bitwin 23 mo 25 yia, be yet, oli bin help blong jenisim wol. Ol fas Aposol blong Jos we i kambak oli bin yangfala. Sam oli filim se oli no inaf. Sam oli mekem ol mistek. Be evriwan i bin jenisim wan samting. Hemia ol faef lesen we yumi save lanem aot long eksperiens blong olgeta.

1. Yu No Nid blong Filim se Yu Gud Inaf blong Stap Gud Inaf

Heber C. Kimball i bin filim se hem i no inaf taem hem i kasem koling blong hem long Kworom blong Olgeta Twelef Aposol long Febwari 1835. Hem i jes kam insaed long Jos i no tri yia yet, mo hem i jes kasem 33 yia.

“Hemia i longwe long tingting blong mi,” Heber i bin talem afta.¹ Be hem i glad blong akseptem koling, mo long odinesen blesing blong hem, hem, oli talem long hem se “plante milian man” bae “oli jenisim laef blong olgeta wetem hem olsem wan tul.”²

Olsem wan Aposol, hem i go long tufala misin long Inglan. Hem i bin helpem ol grup blong ol pipol blong oli jenisim laef blong olgeta. Laen blong ol pipol ia, ating i kasem ol milian tedei. Long Heber, blong gogohed iven taem hem i filim se hem i gat smol blong givim i blesem hem mo plante narafala man.

2. Oli Talem Huia Yumi Folem Ol Desisen blong Yumi, I No Ol Situesen

Tomas B. Mars i bin ronwe long hom blong hem long Niu Hampsae taem hem i gat 14 yia. Hem i bin wok olsem wan fam boe long Vemon; olsem wan weita long Albani, Niu Yok; long wan hotel long Niu Yok Siti; mo afta, olsem wan wokman long Long Aelan. Ol situesen blong hem oli olbaot kasem taem hem i mitim mo maredem Elisabet Godkin.

Hem mo Elisabet, Spirit i bin lidim tufala blong go long Wes Niu Yok. Longwe, tufala i bin harem abaot Buk blong Momon. Tomas i bin luk ol kopi blong ol fas 16 pej taem oli kamaot long printa, mo printa i letem hem blong ridim ol pej ia. Hem i bin biliv se buk ia i kam long God, nao Tomas i bin jusum blong joenem Jos. Hem i bin baptaes long 3 Septemba 1830.³

Tomas i bin prijim gospel long ol defren ples. Hem i bin gotru long hadtaem taem we oli bin ronemaot ol Sent aot long Jakson Kaonti, Misuri, long Novemba 1833. Fastaem, hem i bin wan memba blong Misuri hae kaonsel taem kaonsel ia i bin oganaes long Julae 1834. Afta long koling blong hem olsem wan Aposol, taem hem i gat 34 yia, hem i bin stap olsem Presiden blong Kworom blong Olgeta Twelef Aposol. Nomata we hem i bin difendem Josef Smit agensem ol man we oli bin agensem hem, Tomas i bin foldaon mo i lusum bilif blong hem. Long 1838, hem i jusum blong i aot long Jos.⁴

Aot long Tomas Mars, yumi save lanem se ol situesen we oli olbaot, oli no nid blong holemtaet yumi blong kasem ol blesing blong gospel—o blong yumi blesem laef blong ol narawan.

3. Lukaot: I No Gat Wan we I Gud Tumas blong I Save Foldaon

Laeman Jonson, hem nao i yangfala moa long olgeta we oli bin singaotem olgeta—23 yia mo 4 manis long tetaem ia. Oli bin odenem hem olsem wan hae pris sam dei nomo afta we hem i kasem 20 yia long 1831 mo hem i bin go long samfala misin blong Jos finis. Taem hem i bin stap long ol misin ia, hem i prijim wan toktok we oli tingbaot se hem i “wan long ol strong testemoni abaot misin blong Josef Smit mo bigfala wok blong ol las dei ia.”⁵

Sore tumas, seves blong Laeman olsem wan Aposol i no bin stap longtaem. Long taem blong hadtaem blong mane long Ketlan, Ohaeo, long 1837, hem i tanem hem agensem Josef Smit. Jos i eskomuniketem Laeman long 1838.

I nomata hamas hem i save prij gud, i nomata wanem ofis we hem i bin gat insaed long Jos, Laeman i bin foldaon. Brigham Yang i bin talem se, afta, Laeman i bin talem se hem i wantem gohed blong biliv long gospel: “Mi bin fulap long glad mo hapines. … Mi bin hapi long dei mo long naet. … Be naoia, hem i tudak nomo, i soa long bodi, i mekem mi harem nogud, i rabis long evri samting.”⁶

4. Fasin blong Stap Obei I No Minim se Bae I Isi, be bae I Gud Inaf

Afta we oli odenem Parli P. Prat olsem wan Aposol, Oliva Kaodri, wan long olgeta we oli bin jusum blong help blong jusum ol Aposol i bin givim wan spesel wok long Parli, i talem long hem se “bae hem i gat ol semfala hadtaem blong mekem seves blong hem, semmak olsem hemia blong ol Aposol blong bifo oli bin gat.” Hem i talem se Parli bae i fesem “ol strong ples blong tudak mo ol nogud kalabus,” be ol situesen ia bae oli no stopem hem, from se ol tes blong hem bae i letem hem blong “kasem glori” we Lod i putum i stap blong hem.⁷

Laef blong Parli i folem kaen laef ia. Long sam taem, hem i bin fesem wan pua laef evriwan. Oli bin jikim hem taem hem i bin stap prijim gospel. Hem i go long kalabus long 1838 mo 1839 folem ol rong we oli putum long hem aot long ol hadtaem we ol memba blong Jos oli bin fesem long Misuri. Be yet, Parli i bin luk tu ol blesing we Oliva i bin promesem hem. I no longtaem afta we hem i aot long kalabus, hem i raetem: “Mifala evriwan i oraet, mo mifala i kam antap long wei blong Lod, afta long evri hadtaem blong mifala.”⁸

5. Hamas Yia Yu Gat I No Impoten Tumas Olsem Fet

Orson Prat, brata blong Parli, i sekenwan we i yangfala moa long ol Aposol. Oli odenem hem taem hem i bin gat 23 yia, hem i olfala moa long Laeman Jonson long sam wik nomo. Seves we Orson i bin givim finis long Jos i wan gudfala eksampol long olsem wanem nao ol yang adalt oli save kam wan paoa blong mekem gud.

Orson i bin baptaes long 19 Septemba 1830—long namba 19 yia blong hem. I no longtaem afta, Josef Smit i bin kasem wan revelesen we i talem se Orson i boe blong God, se hem i gat blesing from se hem i bin biliv, mo hem i responsabiliti blong hem blong prijim gospel (luk long D&C 34:3–6). Folem hemia, Orson i bin go long plante defren misin, mo wan wetem Laeman Jonson long 1832, we long tetaem ia, tufala i bin baptaesem kolosap 100 man mo tufala i bin odenem plante elda.

Taem oli bin singaotem Orson i kam wan Aposol, hem i no bin stap long Ketlan. Long 23 Epril 1835, long taon blong Kolombas, hem i harem se oli wantem hem blong go long wan miting long Ketlan long 26 Epril.

Hem i no save stamba tingting blong miting, be hem i aot wantaem i go long miting ia. Hem i no bin save se oli bin singaotem hem i kam wan Aposol, nao hem i wokbaot i go insaed long miting ia taem we kongregesen i bin “stap prea mo wantem se bae hem i kasem ples ia blong miting.”⁹ From se hem i filim sapot blong ol Sent, Orson i bin akseptem koling ia.

Olsem wan Aposol, hem i bin rere long wan pepa we oli bin raetem long hem, fas stori blong Fas Visen blong Josef Smit. Olsem wan paeonia long 1847, hem i raetemdaon evri samting we i bin hapen long wokbaot i go long Wes. Hem i bin raetem tu plante pamflet blong ol misinari mo hem i stap difendem strong Buk blong Momon.

Tedei I Defren … ?I Tru?

Long plante wei, ol yang adalt oli defren tedei, we oli no semmak olsem olgeta long 1835. Be yet, ol lesen ia oli save helpem ol yang adalt tedei long wok blong olgeta blong laef wetem ful paoa blong olgeta. Hemia wan sot lis:

Sapos yu filim se yu no naf, gohed blong muv fored i go.
Evriwan i gat ol jalenj. Yu save winim ol jalenj blong yu.
Bambae yu hapi moa sapos yu stap aktiv long Jos.
Mekem folem komitmen blong yu. Stap obei mo fetful. Bae ol blesing oli kam.
Yu gat wan impoten samting blong givim. Lod i stap dipen long yu.