Holem Strong
Hem we i raet i stap long Yuta, YSA.
Ol fren oli gat bigfala pat blong soemaot sapos i isi—o i had—blong laef folem ol standet blong yumi.
Mi bin groap wetem ol fren we oli memba blong Jos, mo mi bin glad tumas blong kasem baptaes mo kam wan memba. Taem mi muv long nara ples long kantri blong go long yunivesiti, mi stat blong tekem ol lesen long ol misinari. Sore tumas, fos we i kam long ol niufala fren blong mi i mekem se i had blong folem ol standet blong gospel. Ol fren blong mi long skul oli spendem fulap taem blong mekem pati mo dring alkol. Mi neva bin traem alkol bifo, be ol fren blong mi oli stap fosem mi oltaem blong dring.
Mi bin save se gospel i tru, be temtesen we i kam long ol fren i had blong stanap agensem.
Mi stat blong prea long Papa long Heven blong kasem paoa blong mekem stret desisen. Mi no daonem ol standet blong mi yet, be mi bin fraet se bae mi no gat paoa blong ronwe long alkol long nekis taem we bae oli wantem givim long mi. Mi misim ol fren blong mi we oli gat ol semfala tingting.
Wan Satedei naet, mi go long wan pati wetem olgeta we mifala i slip tugeta. Kwiktaem, evri fren blong mi oli stap dring mo stap fosem mi blong traem alkol blong fas taem.
Mi fesem temtesen. Mi tekem glas blong bia we oli givim long mi. Mi pulum i kam kolosap long maot blong mi, mi no glad long miwan, be mi glad blong evri fren blong mi oli lukluk mi. Nao Nik, wan boe we oli save gud hem from hem i save dring, i wokbaot i kam long mifala.
“?Yu dring o yu no dring samting ia?” hem i askem.
“No yet,” mi ansa.
Nao Nik i ansa: “Sapos yu dring, bae yu rigret o harem nogud from long ful laef blong yu.”
Mi sek wantaem. Mi save se hem i talem stret samting. Mi no wantem dring. Mi wantem blong joenem Jos. Mi givimbak glas ia mo mi aot long pati, mi glad tumas we mi no mekem wan rong joes.
Long nekis moning, mi go long jos, mi faenem ol misinari, mi putum wan taem blong mi baptaes. Stat long dei ia i go, mi stap longwe long ol pati we i gat alkol long hem. Mi faenem sam niu fren long Jos we oli gat ol semfala valiu mo standet. Mi stap gud fren wetem ol pipol we oli stap serem rum wetem mi, be mi talemaot ol standet blong mi i klia. Taem oli kam blong save se ol valiu blong mi oli impoten, oli bin respektem mi mo oli bin stop blong fosem mi. Oli bin luksave mo oli bin respektem ol valiu ia taem mi aot long rum taem oli stap wajem ol muvi we i no stret, o taem oli stap lisin long ol miusik we i no stret.
Testemoni blong mi i kam strong moa tru long eksperiens ia, mo bambae mi traehad blong no stap daonem ol standet blong mi from nomo se ol fren blong mi oli fosem mi from. Mi save tu se bes wei blong fesem ol had desisen i blong save ol standet blong yu mo blong holem strong stat long stat.
Mi save se Papa long Heven i bin ansarem ol prea blong mi blong mi kasem paoa blong stanap agensem temtesen. Mi talem tangkyu se Tabu Spirit i bin leftemap tingting blong mi blong mekem stret desisen. Mi save se ol standet blong Jos oli stap ia blong protektem yumi, mo mi glad se taem mi jusum blong folem ol standet ia, i bin helpem mi blong jusum blong joenem Jos.