Yumi Tokbaot Kraes
Hem i No Let blong Gat wan Seken Janis
Woman we i raetem hemia i stap long Vijinia, YSA.
Papa blong wan long ol studen blong mi we i stap gat hadtaem i talem olsem long gel blong hem: “Hem i no let tumas blong yu win.” Lod i stap givim semfala mesej long yumi.
Foto pikja i kam long Kelley McMorris
Sandra i bin wan studen long strong Inglis klas blong mi. Plante wik raon long yia, hem i no bin mekem ol homwok o projek blong hem. Hem i sidaon long tebol blong hem mo i drim nomo. Hem i stap givim ol eskius blong no finisim ol wok blong hem, mo hem i no soem se hem i gat fasin o stap mekem inaf wok blong winim kos ia we i strong tumas.
Kaonsela blong hem mo mi i disaed blong putum wan taem wetem Sandra, papa blong hem, mo samfala tija blong hem blong faenemaot wanem rod nao bae hem i folem: ?Bae hem i dropaot long strong kos ia, o bae i gobak long nomol kos we i stap? Be moa impoten i kwestin ia we i no gat wan i askem we i stap long tingting blong mifala evriwan: ?Bae mifala i save faenem wan rod blong helpem Sandra blong hem i win?
Mi biliv se Sandra i kasem fulap janis blong win, be, hem i jusum blong i no win, nao mi go long miting ia wetem spirit we i slak evriwan. Long sikret, mi hop se bae hem i disaed blong dropaot long klas blong mi blong mekem se bae mi nomo wari long hem. Mi filim se mi bin mekem evri samting we mi save mekem, mo i let finis nao.
Long miting, bodi lanwis blong Sandra i soemaot se, hem tu, i gat tu tingting long paoa blong hem blong winim klas ia. Ae blong hem i lukluk tebol nomo taem mi stap talem olsem wanem hem i no mekem gud nating long Inglis klas. Taem we histri tija blong hem i konfemem se Sandra i no stap mekem gud long klas blong hem tu, bodi blong Sandra i draon insaed long jea blong hem mo mi save luk wota blong ae blong hem i ron long fes blong hem.
Wetem lav mo sore, mi eksplenem long hem mo papa blong hem se sapos Sandra i wantem winim ol kos blong hem, bambae hem i mas jenisim fasin ia blong hem we i draonem hem insaed long hol ia, mo bambae ol samting oli had long hem.
Wan Mesej we I Kam long Papa blong Hem
Kaonsela i lukluk papa blong Sandra, wan man we i no skul tumas, we i no filim gud long skul miting ia. Kaonsela i askem hem sapos hem i gat eni kwestin blong askem long ol tija. Papa ia i talem se hem i no gat kwestin mo i talem tangkyu long wanem mifala i stap mekem blong Sandra. Be afta, hem i talem se hem i gat wan samting blong talem long gel blong hem.
Hat blong mi i fraet. Mi bin pat blong wan konfrens bitwin ol papa mo mama wetem ol tija, we ol papa mo mama oli tok strong long ol pikinini blong olgeta long fored blong ol tija mo ol kaonsela blong olgeta, mo poenem fingga long olgeta from oli les, oli no lukaotgud, mo oli no gat strong tingting. Mi mekem miwan mi rere blong harem hemia bakegen.
Wanem we mi bin harem i mekem mi sapraes. Papa blong Sandra, we i gat tingting i stap daon, i tanem hem long gel blong hem we i gat 16 yia, we i sem bigwan mo i sore long hemwan, mo i talem long gel se: “Hem i no let tumas. Hem i no let blong yu save winim skul blong yu. Rili, hem i no let tumas.”
Mi aot long miting ia, mi glad tumas long aksen blong lav blong hem, be mi wari se hem i no luksave nating wanem nao gel blong hem bae i mas mekem blong pasem klas long tetaem ia. I luk se i no posibol. Mi kasem toktok afta se hem i disaed blong lego histri klas mo i no Inglis klas blong mi.
Samtaem afta, long dei ia, mi bin nildaon long prea, mi tingting long ol rong blong miwan, mo mi bin askem Papa blong mi long Heven blong Hem i fogivim mi; mi bin luksave hamas samting mi bin lanem aot long papa blong Sandra. Ol filing ia we mi filim se mi no sef o mi no naf long wanwan taem long laef blong mi oli mekem mi mi askem miwan sapos mi klin inaf, o sapos mi naf blong kasem wan seken janis. Long ol taem olsem, Lod, semmak olsem papa blong Sandra, oli bin jusum blong no spolem mi, be oli leftemap tingting blong mi: “Hem i no let tumas, gel blong mi. Hem i no let tumas.”
Mesej blong Gospel
?Hamas taem nao yumi bin stap bilivim mesej blong enemi se i nomo gat hop long yumi? Be ol profet oli stap talem defren samting. Aesea i talem: “Yufala i mas kambak long Hae God ia we i God blong yumi. Hem i gat sore long yumi, mo i kwik blong fogivim yumi, i tekemaot ol sin blong yumi” (Aesea 55:7). Momon i ademap witnes blong hem: “Be evri taem we oli bin sakem sin mo bin lukaotem blong kasem fogivnes, wetem tru tingting, oli bin fogivim olgeta” (Moronae 6:8). Glad blong gospel ia, i we i neva let tumas. Folem hamas taem yumi stap lukaotem blong kasem fogivnes, bambae fasin we Lod i pemaot man i letem yumi blong save stat long niu stat bakegen.
Sandra, wetem strong tingting blong stat bakegen, sloslo i bin mekem ol bigfala jenis. Blong jenis, i no bin isi—i nidim blong wok had evri dei blong winim ol nogud fasin blong hem—be hem i luk risal blong hadwok blong hem taem ol mak blong hem oli kam gud moa.
Long lukluk blong gospel, las mak we yumi gat bae i no lukluk long hamas taem yumi bin foldaon, o hao dip yumi bin digim hol we yumi stap long hem. Be, Lod bae i jajem laef blong yumi folem wanem rod nao yumi stap go from, olsem wanem yumi bin sakem sin, mo hamas nao yumi bin dipen long Atonmen blong Lod.
Long smol save blong mi, mi bin gat tu tingting long paoa blong Sandra blong winim ol mistek we hem i bin mekem bifo. Be long nara saed, Papa blong yumi we i stret evriwan i neva lusum hop long paoa blong ol pikinini blong hem se, tru long Kraes, bae oli save kam stret evriwan mo bae Kraes i save sevem olgeta. I nomata se yumi go longwe olsem wanem; oltaem, bambae Hem i lukaotem wan ia. Lod i stap plis long yumi blong nomo stap wokbaot olbaot olsem ol strenja wetem sin, be blong yumi stap lukaotem Hem wetem hop mo stap glad long ol blesing blong bigfala Atonmen blong Hem. I tru, hem i neva let tumas.