Stap Givim Help wetem Wan Pensel
I bin stat taem stek blong mi i bin setemap wan projek blong helpem ol rifuji. Mi laekem projek ia tumas, mekem se mi askem mama blong mi blong talemaot long skul tija blong mi; mo tija blong mi i bin wantem blong mekem wan samting wetem ol pikinini long klas 4. Blong setem eksampol long projek ia, sista blong mi, Maddie, mo mi i bin go noknok long doa blong askem ol donesen.
Dei i kam blong presentem projek i go long ol narafala pikinini blong klas 4. Mi seksek smol. Yes, i tru, mi fraet bigwan, be mi traem bes. Mi talem long ol narafalawan long klas 4 wanem nao mifala i nidim blong mekem ol skul kit blong ol rifuji. Mi talem long olgeta olsem wanem mifala i bin go noknok long doa, mo givim wan jalenj blong traem mekem i gud moa bitim mi blong putum tugeta sam mane. !Tugeta, mifala i bin mekem ova long 100 kit! Mifala i putum ol notbuk, ol pensel, mo ol nara saplae blong skul. Mifala i ademap wan not blong talem: “Welkam long Jemani.”
Mama blong mi mo mi i tekem ol kit i go long rifuji kamp. Mi no save talem se kamp ia i naes, be i bin gat wan ples blong pleplei mo wan ples olsem wan skul. I bin gat wan tren we i stap pas long saed blong kamp we i mekem bigfala noes, mo ol pikinini oli talem long mi se noes blong tren i olsem ol jet plen we oli stap flae long Siria, mo ol nara ples olsem. Ating long ol pikinini ia, noes ia i olsem ol bom, we oli stap harem long homples blong olgeta.
Mi mitim samfala pikinini long kamp we oli sem yia olsem mi, mo wan i Daniel, we i save plei gud long jes gem. Mi no bin save plei jes gem agensem hem, be mi mi laekem jes gem tumas, be oli bin invaetem mi blong plei long babifut mo pingpong. Ol boe ia oli talem long mi se oli tingbaot hom blong olgeta mo oli wantem tumas blong aot long kamp mo gobak long skul bakegen.
Afta we mifala i plei long babifut mo pingpong, mifala i givimaot ol kit ia. Mi bin filim gud se mi bin save mekem wan samting we i kaen long olgeta pikinini ia we oli stap laef long ol kamp ia.