Kasem Taem Yumi Mit Bakegen
Helpem Wan Tedei
I Kam long Presiden Thomas S. Monson
I kamaot long: “What Have I Done for Someone Today?” Liahona, Nov. 2009, 86.
Yumi Ol Han blong Lod. Hem i stap dipen long yumi.
SMOL PAT BLONG PIKJA IA KRAES I STAP HILIM SIKMAN LONG BETSEDA, by Carl Heinrich Bloch, BRIGHAM YANG YUNIVESITI MIUSIOM BLONG ART nao i glad blong givim
Mi mi save stret se hem i tingting blong wanwan memba blong Jos blong givim seves mo blong helpem olgeta we oli stap long nid. Long baptaes blong yumi, yumi bin mekem kavenan “blong karem ol hevi samting blong wan wan long yufala, blong mekem se oli nomo hevi,” [Mosaea 18:8]. ?Hamas taem i tajem hat blong yu taem yu bin witnesem nid blong wan narawan? ?Hamas taem nao yu bin gat tingting se yu nao bae yu man blong help? Mo hamas taem nao, we, dei afta dei, taem laef i stap go, yu bin livim ol narawan blong oli help, mo stap filim se “i oraet, bae wan i lukluk long nid ia.”
Yumi lus fulap long evri samting we i bisi long laef blong yumi. Be sapos yumi stop smol taem, mo luklukgud long wanem yumi stap mekem, yumi save faenem se, plante taem, yumi stap spendem taem blong yumi blong lukluk long ol samting we oli no impoten tumas sapos yumi lukluk long bigfala pikja, mo yumi no wantem save long ol samting we oli impoten moa. …
Raon long yumi, i gat fulap long olgeta ia we oli nidim help blong yumi, gudfala toktok blong yumi, sapot blong yumi, kamfot blong yumi, mo kaen fasin blong yumi—hemia long ol memba blong famli, ol fren, olgeta we yumi save olgeta, o ol strenja. Yumi ol han blong Lod long wol ia, wetem komanmen blong givim seves mo blong leftemap ol pikinini blong Hem. Hem i stap dipen long wanwan long yumi. …
Mi wantem tumas se ol toktok blong wan hym we yumi save gud i go insaed long sol blong yumi … :
?Wanem nao mi mekem we i gud tedei?
?Mi bin helpem wan man long nid?
?Mi mekem man i laf mo mekem wan man i glad?
Sapos no, mi no win nating.
I gat trabol blong man, we i nomo hevi
From se mi wantem serem samting;
?Sikman mo olgeta we oli wari, oli kasem help o no?
?Taem oli nidim mi, mi mi stap o no?
(“Have I Done Any Good?” Hymns, no. 223.)
… Bae yumi askem kwestin ia long yumiwan … : “?Wanem nao mi mekem we i gud long wol tedei?” Advaes blong mi long ol memba raon long wol, i blong yufala i faenem wan we i stap gat wan hadtaem, o i sik, o i stap hemwan, mo mekem wan samting blong hem tedei.