Stat long Paris I Go Kasem Saporo
Mifala i bin laef long ol defren saed blong wol, be !mifala i bin gat semmak filing taem oli bin bildim ol tempol kolosap long mifala!
Nem blong mi, Rejel. Mi stap laef kolosap long Paris Franis Tempol.
Tempol i impoten tumas long famli blong mi. … Bifo oli bildim Paris Tempol, bae mifala i mekem ol famli trip i go long Frankfet, Jemani Tempol plante taem long wan yia. !Bae i tekem mifala 10 aoa blong draev i go mo kambak!
Mifala i lavem blong lukluk taem oli stap bildim tempol blong mifala. Evri wik, afta long jos, papa mo mama bae i draevem mifala i pasem tempol blong luk olsem wanem oli stap bildim tempol. Faswan, oli brekemdaon wan olfala bilding, mo oli digim wan bigfala hol. Afta, oli stat blong bildim tempol i go antap we antap. !I no longtaem afta, haos blong Lod i stanap!
Ol sista mo brata blong mi oli glad tumas se bae oli go long tempol wan dei. Bigfala sista blong mifala, Esta, hem faswan nao we bae i mekem ol baptaes. Mifala evriwan i wet wetem tingting blong taem blong mifala blong go. !Mifala i lavem tempol mo stap hapi se mifala i gat wan long stret taon blong mifala!
Nem blong mi i Koshi. Mi stap laef kolosap long Saporo Japan Tempol. Mi laekem blong sidaon long wan windo long haos blong mi mo stap lukluk we oli stap bildim tempol.
Long taem blong open haos, mi bin invaetem gudfala fren blong mi blong kam wetem mifala. Hem i ting se evri samting insaed i naes tumas.
Mi laekem blong tingting long tempol dedikesen olsem betdei blong tempol. Dei ia tu i betdei blong mi. !Mo hemia blong Presiden Monson tu! Papa mo mama blong mi, mo mi i bin save go insaed long tempol taem oli bin dediketem.
Mi talem tangkyu blong save laef kolosap long tempol. Taem we mi gat ol dei we oli had long skul, mi save wokbaot i go raon long graon blong hem taem mi stap go hom. Mi filim lav we Papa long Heven i gat long mi taem mi stap long ples ia. Mi stap wet from taem ia we bae mi save go insaed blong mekem ol baptaes, mo afta, blong mi mared long ples ia.