“Bae Yumi Dipen long Yumiwan mo Kam Indipenden”
Taem we ol Lata-dei Sent raon long wol oli stap akseptem ol prinsipol mo ol doktrin blong wok blong Jos blong Indipenden Laef, oli stap karem ol blesing blong wan “moa bigfala hop, pis mo progres.”
Bifo hem i kam wan memba blong Jos, Pita i bin spendem plante taem blong hem olsem wan adalt blong ronron from sakses long saed blong mane. Taem yumi stap lukluk hem aotsaed, bae yu luk se hem i kasem hemia finis. Yes i tru, hem i bin gat mo stap ranem plante kaen bisnis.
Taem wan lokol lida blong Jos long Wes Midlan, Inglan, i askem Pita blong joenem wan grup blong hom faenens we oli stap givim tru long wok blong indipenden laef we Jos i gat, hem i gat tu tingting, se kos ia bae i tijim eni samting long hem o nogat. Taem Pita i stat blong joenem grup ia, nao hem i kam blong luksave kwiktaem se hem i gat fulap samting moa blong lanem.
“Kos ia i no abaot mane nomo; hemia haf stori blong hem nomo,” hem i talem. “Samting we i moa impoten long mi, i blong lanem blong gat fet long Papa long Heven—olsem wanem Hem i stap givim yumi ol blesing long wol ia mo i openem doa long tru fasin blong dipen long yumiwan sapos yumi stap folem daereksen we Hem i givim long saed blong spirit.”
Olsem wan memba blong grup blong hom mane, Pita i bin lanem fulap skil blong praktisim, olsem blong raetemdaon evri mane we wan i spendem, krietem mo laef folem wan bajet, katemdaon kaon, mo sevem mane blong fiuja. Taem tufala i bin yusum olgeta skil ia, wetem fasin blong praktisim fet long Jisas Kraes mo blong wokhad, Pita mo waef blong hem i pembak wan bigfala kaon.
“Mi filim se mi laet mo fri moa, mo mi no gat fraet we i kam wetem ol kaon, o fasin blong no stap oganaes long saed blong mane,” hem i talem. “Mi filim se mi gat moa blesing we oli kam long Papa long Heven long wan wei we mi neva bin filim bifo. Mi bin lanem olsem wanem blong askem samting long Hem tru long prea, mo blong lisin long ol ansa blong Hem taem we mi bin nidim help wetem ol samting long hom.”
Wok blong Kam blong Dipen long Yumiwan
Fasin blong stap dipen long yumiwan i moa bitim blong gat wan gudfala wok, hivimap kaekae i stap, o putum mane i stap long bank. Be, hem i “paoa, komitmen, hadwok blong lukluk long ol samting long saed blong wol mo long saed blong spirit we yumiwan mo famli i nidim long laef. Taem ol memba blong Jos oli kam blong dipen long olgetawan, bae oli gat moa paoa tu blong givim seves mo kea long ol narawan”1 from bae oli tekem wok olsem wan stamba rul prinsipol insaed long laef blong olgeta.
Presiden Thomas S. Monson i tijim: “Fasin blong dipen long yuwan i kamaot long wok blong yumi, mo i stamba blong evri narafala praktis blong wan gudlaef. Hem i wan stamba tul long gudlaef long saed blong spirit, mo tu, long saed blong wol ia. … ‘Bae yumi wok from samting ia we yumi nidim. Bae yumi kam blong dipen long yumiwan mo kam indipenden. Fasin blong sevem man, bae yumi no save kasem sapos i no tru long prinsipol ia nomo. Fasin blong sevem man i wan bisnis blong wanwan man o woman, mo yumi mas wok blong yumi stap sef long saed blong ol samting blong wol ia, mo tu, long saed blong ol samting long saed blong spirit.’”2
Anda long daereksen blong ol lokol prishud lida, moa long 500,000 Lata-dei Sent long moa long 100 kantri oli bin tekpat long wok ia blong indipenden laef stat long 2014. Naoia, Jos i stap statem wok ia raon long Not Amerika.
Wok ia, insaed long hem i gat ol kos mo ol risos “blong helpem ol memba blong Jos blong oli lanem mo putum long praktis ol prinsipol blong fet, edukesen, hadwok, mo tras long Lod. Blong akseptem mo stap laef folem olgeta prinsipol ia,” Fas Presidensi i talem se “hemia bae i mekem yumi gat moa paoa blong kasem ol blesing blong wol ia we Lod i bin promesem long yumi.”3
Hapi mo wetem Hop
Maria Edilene Romão i bin lusum hop. Hem i no save faenem wan wok, hem i wan singgel mama, mo hem i gat plante pikinini blong fidim.
Long tetaem ia nao tufala memba blong wod blong hem long Santa Katarina, Brasil, i bin invaetem hem blong kam long wan divosen blong Indipenden Laef. Long en blong divosen ia, Maria i bin joenem wan grup blong helpem hem blong faenem wan wok.
Hem i tingbaot: “Hem i fas taem long laef blong mi we mi bin biliv long wan fiuja we bae mi save lukaotgud long famli blong mi. Mi bilivim se grup ia blong indipenden laef bae i save helpem mi mo jenisim laef blong mi.”
I bin hapen olsem.
Long ol nekis 12 wik, Maria i putum tingting blong hem i go long grup ia, ol stadi blong hem, mo ol komitmen blong hem. Hem i wok wetem wan niu paoa ia i go from ol gol blong hem. Hem i praktis long ol defren teknik blong mekem intaviu from wok. Afta long tu wik, hem i kasem wan intaviu blong wan gudfala wok. Intaviu ia i helpem hem blong kasem wan wok.
Maria i talem: “Laef blong mi i jenisim evriwan.” Maria i nomo stap hadwok blong fidim famli blong hem. “Naoia mi mi hapi, mi glad tumas, mi gat longfala tingting mo mi gat hop. Mi biliv se Papa long Heven i stap laef, i stap lavem mi. Mi save se taem mi praktisim fet blong mi long Jisas Kraes, mi kasem ol blesing.”
“Tul we I Nambawan”
Fasin blong dipen long yuwan i wan rod blong kasem wan moa hae ples; Elda Robert D. Hales blong Kworom blong Olgeta Twelef Aposol i bin talem: “Stamba gol blong yumi i blong kam olsem Sevya, mo gol ia i gat moa paoa taem yumi givim seves we i no selfis long ol narafala man. Paoa blong yumi blong givim seves i kam antap, o i save kam daon folem hamas nao yumi save stap dipen long yumiwan.”
Elda Hales i ademap, “taem yumi save kam kasem poen we yumi gat inaf, nao yumi save mekem olsem Sevya blong givim seves mo blesem ol narafalawan.”4
Sergio Galbuchi i bin lanem trutok ia hemwan taem hem i statem bisnis blong hem i no longtaem afta we stek presidensi i bin singaotem hem olsem wan stek indipenden laef speselis. Wetem ol tul blong faet olsem fet, ol skil, mo save we hem i bin kasem olsem wan memba blong komiti, Sergio mo waef blong hem, Silvia, i bin openem wan smol stoa long Buenos Aeres, we i salem “ol hankraf mo ol tes” blong Ajentina.
“Mi ting se blong kam blong dipen long miwan i wan wei blong praktisim fet,” Sergio i talem. Long stat, hem mo Silvia i no bin luk sakses we tufala i stap hop from, mekem se fet i stap nomo long medel blong hadwok blong tufala. Be taem tufala i stap wet blong luk frut blong mane blong tufala, tufala i wokhad mo tufala i bin blesem ol kastoma wetem ol prodak blong tufala mo tu, wetem ol misinari wok blong tufala.
“Mifala i kam blong save plante pipol,” Sergio i talem. “Mo mitufala i bin gat janis blong givim sam kopi blong Buk blong Momon.”
Long stat, stek indipenden laef komiti i faenem 10 memba long stek blong Sergio we oli bin nidim help blong save kam blong dipen long olgetawan. Be afta, ol bisop tu oli kam insaed.
“Naoia, mifala i save 35 pipol we oli stap long nid,” Sergio i talem, taem wok ia i stap gogohed. “Bisop blong olgeta i bin invaetem olgeta wanwan blong oli tekpat long ol grup.”
Fet blong olgeta i gro bigwan, oli bin mekem ol jenis we oli bin nidim blong mekem, mo oli lanem ol niufala skil.
“Evri taem mi toktok wetem ol prishud lida, mi traem blong talemaot long olgeta se hemia i nambawan tul we mi kasem long Fas Presidensi,” Sergio i talem bakegen. “Hem i moa gud bitim eni mane we oli save givim blong helpem wan, mo ol tijing blong hem oli moa klia bitim plante long ol samting we mi bin lanem taem mi bin studen long yunivesiti.”
Moa impoten, olgeta we oli komplitim ol 12 wik kos blong indipenden laef oli kam ol moa gud disaepol blong Jisas Kraes, mo oli lanem olsem wanem blong yusum skil blong olgeta blong bildimap kingdom blong God.
“Indipenden laef grup ia i no jes stap lukluk long bisnis blong mifala; hem i lukluk tu long rilesensip blong mifala wetem God mo ol narawan,” Sergio i talem. “Mifala i kam ol moa gud disaepol blong Jisas Kraes long ol trifala manis ia we mifala i bin spendem long grup ia. Yes long en, maet wan bisnis i save helpem mifala blong dipen long mifalawan, be stamba tingting biaen i blong givim seves.”
Blong Gro mo Blong Mekem Samting
Presiden Joseph F. Smith (1838–1918) i talem: “Oltaem i bin wan strong tijing wetem ol Lata-dei Sent se wan relijin we i no gat paoa blong sevem ol pipol long ol nid blong olgeta long wol ia, mo mekem olgeta oli gat gudlaef mo stap hapi long wol ia, bae man i no save dipen long relijin ia blong sevem olgeta long saed blong spirit, blong mekem olgeta oli kam olsem god long laef we i stap kam.”5
Nao, yumi no mas sapraes se, taem yumi mekem man i kam strong long saed blong ol samting blong wol we i nid, nao, yumi stap mekem olgeta oli kam strong tu long saed blong spirit. Elda David mo Sista Theresa Nish, we tufala i bin givim seves olsem ol indipenden laef misinari long Solomon Aelan, oli bin luk hemia i wok long medel blong ol memba blong Jos longwe.
“Ol pipol oli gro long saed blong spirit mo oli go moa long tempol, hemia from ol prinsipol, ol skil, mo ol fasin we oli stap tijim insaed long My Foundation mo gudfala eksplenesen we i stap insaed long My Path to Self-Reliance,” we oli stap long ol fas buklet. “Ol lesen ia oli stap helpem ol pipol blong progres long saed blong spirit mo long saed blong wol, mo i stap lidim olgeta blong oli dipen long olgetawan long saed blong spirit mo long saed blong wol.”
Cheryl Red, wan klas lida blong indipenden laef long Yuta, YSA, i eksplenem olsem wanem ol prinsipol long saed blong spirit blong program ia i bin helpem hem blong progres long saed blong wol: “Mi bin luksave se ol prinsipol ia mo ol fandesen ia, yumi save yusum long ol defren saed blong laef blong yumi. Ol woksop ia oli bin helpem mi blong lukluk moa long ol responsabiliti blong mi olsem wan waef mo olsem wan mama. Mi save se mi gat ol tul blong andastanem moa olsem wanem blong yusum mane blong famli. Mi luk olsem wanem we, blong wok tugeta wetem hasban blong mi blong yusum gud mane, long wan wei, i wan bisnis. Yumi nidim olgeta tul ia blong ol famli blong yumi oli gat sakses.”
Raon long Jos, visen ia we i stap go long evri ples i mekem se i gat moa fasin blong stap fetful, moa paoa long saed blong spirit. Olsem wan risal, ol memba oli mekem moa komitmen blong kam long Jos, blong pem taeting blong olgeta, mo stap klin inaf blong go long tempol.
“Hemia i pulum tingting blong mi,” wan niu memba, George Echevarria we i pat blong wok blong indipenden laef i talem. George, i stap draevem wan taksi long Peru, mo hem i talem se program ia i helpem hem blong kasem wan testemoni blong gospel, mo semtaem, i fulumap hem wetem wan tingting blong wantem mekem hemwan i kam gud moa. Naoia, hem i hop se bae hem i kam wan man blong wok long lektrik, we bae hem i stap riperem ol smol moto-taksi we hem i bin stap draevem blong plante yia i kam.
“Yumi no mas sidaon mo wet se ol samting bae oli hapen long yumi,” hem i talem. “Yumi mas gat tingting mo mekem samting yumiwan.”
“Laef blong Yu bae I Gat Blesing”
Ol Lata-dei Sent raon long wol oli stap kasem ol blesing we Lod i bin promesem taem we oli stap wok strong wetem strong tingting blong lanem, laef folem, mo yusum ol prinsipol blong fasin blong dipen long yumiwan long saed blong spirit mo long saed blong wol. Evriwan i save tekem gud samting aot long hemia, be wok ia i bin blesem olgeta we oli nidim blong kam strong moa long saed blong lukaotem olgetawan long saed blong wol mo long saed blong spirit. Pepetuol Edukesen Fand i sapotem wok ia blong dipen long yumiwan taem hem i stap helpem olgeta we oli gat wan plan blong kasem skul trening blong save go long skul.
Ol skripja oli promesem se bae yumi kasem help blong Lod taem yumi wok from fasin blong dipen long yumiwan. Hem i talem: “Hem i stamba tingting blong mi blong mi lukluk long olgeta sent blong mi” (D&C 104:15).
Taem Fas Presidensi i stap givim tingting blong hem long stamba tingting ia, hem i talem: “Revelesen ia i wan promes we i kam long Lod se bambae Hem i putum ol rod oli stap blong yumi kasem ol blesing long saed blong ol samting long wol, mo bae i openem doa blong yumi save kam blong dipen long yumiwan; hemia i paoa blong yumi save lukluk long yumiwan bakegen long saed blong ol samting blong yumiwan, mo tu, blong ol memba blong famli.”
Taem yumi stap stadi, praktisim, mo tijim olgeta prinsipol ia long ol memba blong famli, Fas Presidensi i promesem: “Bae laef blong yufala i gat blesing. Bae yufala i lanem olsem wanem blong tekem aksen long rod ia blong dipen moa long yufalawan. Bambae yufala i gat blesing blong kasem moa hop, moa pis mo moa progres.”6