Brekem Fasin blong “Yangfala blong Tedei”
Fogetem wanem we wol i stap talem. ?Olsem wanem nao Papa long Heven i stap luk yu? Yu save laef folem visen blong Hem wetem ful paoa blong yu.
Wol i gat fulap samting blong talem abaot ol yangfala tedei. Maet yu save samfala toktok we oli stap talem abaot ol yangfala, o yu bin harem wan i stap komplen abaot “ol pikinini blong tedei.” I gat plante stadi tu mo statistik abaot yufala—fasin blong yufala long sosol media, wanem yufala i stap pem, mo iven oli stap tokbaot sapos yufala i save tingting long wan samting longtaem o no.
Be Presiden Russel M. Nelson, Presiden blong Kworom blong Olgeta Twelef Aposol, i talem se hem i no glad tumas taem hem i harem se ol man blong stadi oli tokbaot stadi blong olgeta abaot ol yangfala pipol. Hem i talem: “Luk, mi no intres long wanem ol topman oli gat blong talem abaot yufala, be wanem nomo we Lod i talem long mi abaot yufala.”1
Lod i no nid blong gat ol stadi, o ol kaen toktok blong tokbaot yufala blong save yufala. Hem i no luk yufala olsem ol namba, o olsem wan we i hevi wetem ol toktok we “wol” i stap tokbaot yufala wetem.
Hem i lavem yu, i no from huia yu tedei, be tu, from huia yu we yu gat glori mo laet mo yu gat paoa mo tingting blong kam, Presiden Dieter F. Uchtdorf, Seken Kaonsela long Fas Presidensi i talem.2
God i no stap luk yu nomo. Hem i lavem yu.
?Yu wantem blong brekem daon fasin ia blong wol? Traem luk yuwan long wei we Papa long Heven mo ol wokman we Hem i jusum oli stap luk yu. ?Yu wantem sakemaot ol toktok blong tokbaot yufala? !Naoia i taem blong stanap mo mekem! Taem Hem i gat 12 yia, Kraes i talem long papa mo mama blong Hem long wol ia se Hem i nidim “blong mekem wok blong Papa blong Hem” (Luk 2:49).
Hem i no bin yangfala tumas, mo i semmak wetem yufala. So nekis kwestin, hem i olsem ia: ?Olsem wanem nao bae yu stap go mekem bisnis blong Papa blong yu long Heven?
Bisnis blong Hem i blong mekem se man i nomo save ded mo i kasem laef we i no save finis (luk long Moses 1:39); mekem se yu save go mekem bisnis blong Papa blong yu taem yu mekem evri samting blong kasem ful paoa we yu save gat, mo taem yu kam wan we i stap helpem ol narafala pipol blong kasem ful paoa we oli save kasem.
!Naoia i taem blong tekem responsabiliti from fiuja blong yu! ?Wanem nao yu save mekem naoia blong meksua se yu stap kam huia we Papa long Heven i save se yu save kam, i no long ol taem we oli no save finis nomo, be tu, long laef ia?
?Yu yu wantem mared long tempol? Disaed naoia se bambae yu stap klin evriwan long tingting, long toktok mo long ol wok blong yu. ?Yu yu luk se yu save stadi long yunivesiti? Developem ol gudfala stadi skil naoia. ?Yu yu wantem go long wan misin? Ademap Prijim Gospel blong Mi long gospel stadi blong yu (speseli japta 3). ?Yu yu wantem luklukgud long wan famli blong yu? Lanem olsem wanem blong mekem mo folem gud wan bajet.
Yu save lukluk tu long ol samting we oli stap mekem yu yu hapi naoia. ?Yu yu lavem matematik? ?O plei long piano? ?O raetem ol stori? !Gohed blong mekem! Luk sapos i gat ol wei we yu save kam antap long olgeta samting ia: ol klas long skul, ol lesen onlaen, ol kompetisen, ol woksop, mo ol narawan moa.
!Brekem fasin we wol i bildimap mo sakemaot ol kaen toktok ia blong wol! Tekem fiuja blong yu long han blong yu. ?Wanem nao yu stap mekem blong kam bes? Letem mifala i save mo imel i kam long liahona@ldschurch.org o livim wan mesej long LDS Youth Facebook o long ol Instagram pej.