Wan Fasin Olsem Hemia blong Kraes
I Kam long Elda David A. Bednar
Blong Kworom blong Olgeta Twelef Aposol
I kam long wan toktok we hem i bin givim long wan simposiom blong Relijin long Brigham Yang Yunivesiti–Aedaho long 25 Jenuware 2003.
Jisas, we i bin safa long evri samting, i bin gat moa lav mo sore long yumi evriwan we i no stap safa tumas.
Laet blong Wol, i kam long Howard Lyon
Elda Neal A. Maxwell (1926–2004) i bin tijim wan prinsipol we i bin stap long maen blong mi bigwan, mo i bin stap long medel blong ol stadi blong mi, long taem we mi stap tingting i gobak, mo long taem we mi stap tingting hevi. Hem i talem: “!Bae i no save gat wan Atonmen sapos i no from fasin blong Kraes!”1 Stat long taem ia we mi harem toktok ia we i tok stret mo i go dip insaed long mi, mi bin traem blong lanem moa mo blong andastanem moa abaot toktok ia “fasin.” Mi bin tingting hevi long rilesensip we i stap bitwin fasin blong Kraes mo Atonmen blong Hem—mo rilesensip ia i minim wanem long wanwan long yumi olsem disaepol blong Hem.
Fasin blong Lod Jisas Kraes
Maet fasin we i toktok moa abaot fasin blong wan, hem i paoa blong hem blong luksave mo save givim ansa long ol nara pipol we oli stap gotru long jalenj o stap fesem agens we i stap hevi long olgeta. Fasin i kamkamaot, eksampol, long paoa blong luksave safaring blong ol nara pipol taem we yumiwan bakegen, yumi stap safa; i stap tu long paoa blong luksave hanggri blong ol narawan taem yumiwan yumi hanggri i stap; i stap long paoa blong go aot mo givim lav mo sore long ol narawan we oli trabol long spirit, taem we yumiwan, i stap fesem hadtaem long saed blong spirit. Olsem ia nao, fasin i kamkamaot taem yumi lukluk mo go aot blong helpem ol man, be nomol fasin bae i blong yumi lukluk long yumiwan nomo mo tanem yumi i gobak long yumiwan. Sapos kaen paoa ia, i stamba blong gudfala fasin, nao Sevya blong wol i eksampol we i stret evriwan, we Hem i soem wan fasin we i strong olsem mo i gat lav long hem.
Ol Eksampol blong Fasin blong Kraes
These Twelve Jesus Sent Forth, i kam long Walter Rane
Long rum antap long naet blong Las Sapa, stret naet ia we bambae Hem i fesem safaring ia we i moa bigwan evriwan we i bin tekem ples long evri wol we Hem i bin krietem, Kraes i bin tokbaot Spirit blong Givhan mo pis:
“Mi mi talemaot ol tok ia long yufala long taem ia we mi mi stap yet wetem yufala.
“Mo Spirit ya blong Givhan, we hem i Tabu Spirit, we bambae Papa blong mi i save sanem i kam long nem blong mi, hem bambae i save tijim yufala long olgeta samting. Bambae hem i save mekem yufala i tingbaot olgeta samting ya bakegen, we mi mi stap talem long yufala.
“Mi givim pis long yufala mo pis ia we mi givim long yufala i no olsem pis we ol man long wol oli save givim. Yufala i no letem tingting blong yufala i trabol, yufala i no fraet.” (Jon 14:25–27).
Taem Hemwan i luksave se bambae Hem i gotru long wan hadtaem we i bigwan tumas mo bae Hem i no gat kamfot mo pis, mo long wan taem we hat blong Hem i trabol mo i fraet, nao Masta i tanem Hem long ol nara man mo i givim olgeta ol stret blesing we oli bin save mekem Hem i kam strong moa.
Long bigfala prea blong Hem long bihaf blong ol narafala man, we Jisas i bin givim bifo Hem i go wetem ol disaepol blong Hem oli krosem krik Kedron i go long Garen blong Getsemane, nao Masta i bin prea from ol disaepol blong Hem, mo “from ol man ia we bambae oli save biliv long mi from tok blong olgeta;
“Blong olgeta evriwan oli save stap wan nomo. … olsem laef blong yu i joen gud long laef blong mi, …
“… Laef blong mi i joen gud long laef blong olgeta, mo laef blong yu i joen gud long laef blong mi. Mo long sem fasin, mi mi prea blong olgeta oli save kam wan nomo long evri samting, blong ol man blong wol ia oli save luksave we yu yu sanem mi mi kam, mo we yu lavem olgeta ia stret olsem we yu lavem mi. …
“Mi mi mekem olgeta ia oli save yu. Mo bambae mi mekem olsem bakegen, blong oli save lavem mi olsem we yu yu lavem mi, mo blong laef blong mi i i save joen gud long laef blong olgeta” (Jon 17:20, 21, 23, 26).
Mi stap askem miwan ol semfala kwestin ia oltaem taem mi bin stap tingting hevi long hemia mo long ol nara samting we i bin tekem ples kolosap long taem ia we Hem i safa insaed long garen, mo taem ia we oli bin salem Hem: ?Olsem wanem nao bae Hem i save prea from gudlaef mo yuniti blong ol narawan stret bifo bae Hem i fesem wan bigfala harem nogud? ?Wanem nao i mekem se bae Hem i lukaotem kamfot mo pis long olgeta we nid blong olgeta i no bigwan olsem blong Hem long tetaem ia? Long taem we Hem i stap olsem wan samting blong wol ia, Hem i bin krietem trabol i kam long Hemwan, be ?olsem wanem nao Hem i save putum ful tingting blong Hem nomo long situesen mo ol wari blong ol narafala man? ?Olsem wanem nao Masta i bin save lukluk i go aot, be sapos i wan nara man, bae hem i lukluk i gobak long hemwan nomo? Wan toktok we i kam long Elda Maxwell i givim ansa long wanwan long ol strong kwestin ia:
“Fasin blong Jisas Kraes i bin impoten tumas blong hem i sapotem Hem blong save mekem atonmen ia blong Hem. Sapos i no bin gat bigfala naes mo stret fasin blong Jisas, bae i no save gat wan bigfala mo stret atonmen. Fasin blong Hem i olsem ia nao, we Hem i ‘i fesem temtesen blong evri kaen’ (Alma 7:11), yet Hem i ‘no folem’ ol temtesen ia (luk long D&C 20:22).”2
Jisas, we i bin safa long evri samting, i bin gat moa lav mo sore long yumi evriwan we i no stap safa tumas. Long en, hamas we Hem i bin safa mo gat lav mo sore i joen wetem hamas lav Hem i gat long hem we Hem i stap givim seves long hem.
Wok Strong blong Lukaotem Jareti
Long laef long wol ia, yumi save askem blong gat blesing mo developem ol defren fasin olsem hemia blong Kraes. Yes, i posibol blong yumi, olsem ol man we i save fesem ded, blong traehad, long stret mo gud fasin, blong kasem ol presen long saed blong spirit we oli go wetem paoa ia blong go long ol narafala man mo lukluk long ol nara pipol we oli stap gotru long jalenj o stap fesem agens we i stap hevi long olgeta. Yumi no save kasem kaen paoa ia taem yumi stap wantem nomo, o stap talem nomo long tingting se bae yumi go mekem. Be, yumi dipen long, mo yumi nidim “ol gudfala wok, mo sore, mo gladhat blong Tabu Mesaea” (2 Nifae2:8). Be “tijing folem tijing, rul folem rul,” (2 Nifae 28:30) mo “wetem taem” (Moses 7:21), yumi save go long ol narafala man taem we nomol fasin blong man i blong tanem yumi i gobak long yumiwan bakegen.
Mi wantem givim tingting se, yu mo mi, i mas stap prea, stap wantem tumas, stap traehad tumas, mo stap wok blong developem wan fasin olsem hemia blong Kraes sapos yumi hop blong kasem presen long saed blong spirit ia, we i jareti—klin lav blong Kraes. Jareti, o bigfala lav, i no wan fasin we yumi kasem nomo sapos yumi traehad mo tingting strong long hem. Yes, yumi mas ona long ol kavenan blong yumi, mo stap laef klin inaf blong mekem se yumi save mekem evri samting blong kwalifae from presen ia; be long en, presen ia blong jareti i kontrolem yumi—yumi no kontrolem hem (luk long Moronae 7:47). Lod i talemaot, sapos yes o no, mo wetaem, bae yumi kasem evri presen long saed blong spirit, be yumi mas mekem evri samting long paoa blong yumi blong wantem, blong wantem tumas, blong invaetem, mo blong kwalifae from ol kaen presen olsem. Taem yumi stap tekem aksen oltaem long wan wei we i go stret wetem fasin blong Kraes, maet bae yumi stap soemaot long heven, long wan wei we i gat moa paoa, se yumi wantem kasem presen long saed blong spirit ia, we i jareti. Mo hem i klia se bambae Hem i blesem yumi wetem gudfala presen ia taem yumi gohed blong go long ol narafala man, taem we man o woman we i folem fasin blong wol bae i tanem hem i kambak long hemwan bakegen.
Jisas Hem i Kraes, Hem i Wan Stret Pikinini Ia Nomo blong Papa we I No Save Finis. Mi save se Hem i stap laef. Mo mi testifae se fasin blong Hem i bin mekem se i posibol blong yumi gat ol janis ia blong kasem tugeta, fasin blong nomo save ded, mo laef we i no save finis. Bae yumi go aot blong helpem ol man, taem we nomol fasin bae i blong yumi lukluk long yumiwan nomo.