Stap Faenem Help afta long Ded blong Nansi
Hem we i raet i stap long Jojia, YSA.
?Wanem nao mi nid blong mekem se hiling paoa blong Jisas Kraes i stat blong wok insaed long laef blong mi?”
Ol pikja oli kam long Iker Ayerstaran
Long Febwari 2016, waef blong mi, Nansi i ded afta we hem i bin faet 11 yia wetem kansa blong titi. Bigfala krae mo harem nogud we mi bin filim long ol fas manis afta we hem i ded, bae mi no save tokbaot long wan we i no gotru long kaen lus olsem. Bigfala harem nogud, trabol tingting, fasin blong no stap hapi, soa—i no gat wan i save tokbaot stret filing ia. Mi no bin save tekem.
Hiling Paoa blong Sevya
Longtaem finis i pas mi bin andastanem se Jisas Kraes i bin “kamdaon i bitim evri samting” (luk long D&C 88:6) blong mekem se bae i posibol blong “helpem, givhan long ol pipol blong hem folem ol samting we [oli stap fesem]” (Alma 7:12). Hemia i minim se paoa blong Atonmen blong Sevya i stap go i bitim hemia blong mekem man i save laef bakegen long ded, mo i bitim hemia blong pemaot man long ol sin blong hem. Tru long paoa ia, Hem i save hilim yumi tu long ol taem we yumi stap safa mo stap long nid. Long harem nogud blong mi, kwiktaem—mo wetem tingting we i lus—mi traem blong lanem wanem mi nidim blong mekem blong laetem pat ia blong paoa blong Sevya insaed long laef blong mi. Blong plante wik, mi luklukgud insaed long ol skripja mo ol toktok blong ol Jeneral Atoriti blong Jos. Mi bin biliv tru se, from se hem i bin harem nogud tumas long bodi blong Hem mo from sakrifaes we Hem i bin mekem, Sevya i bin save soa we mi bin stap filim. ?Be olsem wanem we taem Hem i save hemia, nao bae i save helpem mi? From se Hem i bin safa long hemia from mi, ?wanem nao mi nidim blong mekem blong kasem givhan we Hem nao i save olsem wanem blong givim?
Afta we mi luklukgud raon, mi stadi, mi prea, mo wosip long tempol, mi stat blong andastanem. Faswan evriwan, mi bin stat blong luk klia moa se Lod i bin givhan, kamfotem mo sapotem finis famli blong mifala, speseli long ol wik we oli stap go from ded blong Nansi. I bin gat ol bigfala eksperiens long saed blong spirit, we naoia, mi luksave se oli ol blesing we oli kam long wan paoa we i stap, we i hilim mo mekem mifala i kam strong, from Atonmen ia blong Sevya. Mo blong save nomo se Sevya i stap tekem kea finis long mifala wanwan, hemia, i bin givim bigfala kamfot long mi. Olsem Sadrak, Mesak, Mo Abed-nego blong bifo, Hem i bin stap wetem mifala insaed long “strong faea” ia blong ol hadtaem blong mifala (Daniel 3:17).
Gat Tras long Lod
Mi bin lanem tu se i gat samfala samting we yumi mas mekem blong save kasem kamfot mo hiling blong Lod. Moa impoten, yumi mas stap trastem Hem. Hemia i save kam wan had samting blong mekem. ?From wanem bae mi trastem God taem we Hem i save mekem nomo se Nansi bae i no ded long fas ples? Blong ansarem kwestin ia, mi stap gohed blong tingting hevi long wan samting we Lod i bin talem long Profet Josef Smit:
“Yufala i no save luk wetem ae blong yufala nomo, long taem naoia, plan ia blong God blong yufala, abaot ol samting we bae oli hapen naoia i go, mo glori we bae i kam afta plante hadtaem” (luk long D&C 58:3).
Mifala i bin kasem fulap saen se wei mo taem we Nansi bae i ded bae i folem tingting blong Lod. Mi bin kam blong andastanem se wan Papa we i hae evriwan mo i gat lav i letem mifala i safa tru long olgeta samting ia, from se, long stret plan blong Hem blong famli blong mifala i save kasem laef we i no save finis, i bin nid blong mifala i gotru long hadtaem ia. Taem mi bin save hemia, mi bin andastanem se pat blong mi, long plan ia, i no jes blong stap strong, be tu, blong “mekem gud blong stap strong” (luk long D&C 121:8). Sapos mi save konsekretem hadtaem ia long Hem, bae Lod i givhan long mi, be i no hemia nomo, bambae Hem i mekem mi kam tabu tu. Mi bin eksperiensem hemia long plante wei tu.
Mi bin givim kaonsel long ol pikinini blong mi blong mekem wanem we miwan mi bin lanem long rod ia:
-
Letem soa ia blong ol strong eksperiens oli pusum yu blong kam wan moa gud disaepol.
-
Talemaot hat blong yu long prea.
-
Sapos yu harem se yu kros long God blong letem ol bigfala trabol oli hapen, nao yu mas plis long Hem blong i riplesem bigfala kros ia wetem fet mo fasin blong save folem tingting blong Hem.
-
Mekem kavenan se bambae yu lavem Hem mo stap fetful long Hem kasem en.
-
Dring long ol toktok blong God oltaem—aot long ol skripja, mo ol toktok mo ol raeting blong ol profet blong tedei mo ol tija we oli kasem insperesen.
-
Go long tempol wetem wan hanggri ia se bambae oli tijim yu long ol samting we oli blong taem we i no save finis.
-
Faenem ol pipol we wan trabol taem blong olgetawan i stap kam wan trabol taem blong fet, mo mekem olgeta oli kam strong moa wetem testemoni blong yu abaot ol doktrin ia.
Wan Witnes blong Wan Aposol
Samples wan manis afta ded blong Nansi, i bin gat wan naet we bigfala harem nogud ia we mi bin filim i bin hevi tumas long mi. Mi bin harem nogud bigwan long bodi mo tingting ful dei long dei ia. Mi tingbaot tijing blong Elda Jeffrey R. Holland blong Kworom blong Olgeta Twelef Aposol se, “rod blong fasin blong sevem man, oltaem i lidim man blong i pas tru i go long Getsemane.”1 Nomata we mi no save komperem safaring blong mi wetem hemia blong Sevya, long naet ia mi bin stap long medel blong “tudak mo konkon taem blong mi.”2
Afta we mi gotru long hemia blong sam taem mo stap prea from help, insaed long maen blong mi, tingting i kam; wan samting we mi bin ridim mo makem long kompiuta blong mi plante yia bifo finis i kam. Mi faenem pepa ia mo lukluk i go tru long hem blong faenem wanem mi stap lukaotem. Hem i wan intaviu wetem Elda Richard G. Scott blong Kworom blong Olgeta Twelef Aposol (1928–2015), we oli bin askem hem we hem i olsem wanem afta we hem i lusum waef blong hem, Janin, from kansa long 1995. Elda Scott i ansa: “Faswan, mi no lusum hem. Hem i stap long narasaed blong vel. Mitufala i bin sil long tabu odinens ia long tempol, mo bambae mitufala i stap tugeta blong oltaem.”3
Pikja blong Atlanta Jojia Tempol
Long naet ia, ol toktok ia oli kam wetem wan paoa we mi neva bin filim bifo. Hem i olsem wan laet blong laethaos we oli onem long wan naet we i tudak. Mi neva bin ridim wan samting we i wok strong mo kwik long mi olsem. Tudak ia mo soa ia i lus wantaem. I olsem Alma taem we hem i “nomo save tingbaot ol harem nogud blong hem” (Alma 36:19). Witnes blong aposol ia i draon insaed long mi, i go insaed evriwan. Mi sapraes tumas we wan tingting we mi bin andastanem stat long taem we mi yangfala, i save kam wan samting we i bigwan tumas long mi. Mi stap askem miwan olsem wanem i posibol blong Elda Scott i save wan samting olsem. Long tetaem ia, mi bin luksave se, mi tu, mi bin save hemia. Sapos mi fetful, mi save gat evri hop ia we Elda Scott i gat. Nomata we mi no bin hapi tumas mo mi bin krae sore long sam taem afta, mi neva bin filim bigfala soa long bodi mo harem nogud long tingting olsem we mi bin gotru long hem long naet ia.
Hemia nao paoa we Sevya i stap givim long yumi blong helpem yumi long ol tes blong yumi. Mi save se harem nogud blong famli blong mifala bae i neva lus evriwan, be hem i draon insaed long wanem we mi singaotem ol blesing blong Atonmen blong Sevya we i “mekem mi kam strong moa” mo i “mekem mi kam stret moa.”4 Mifala i kam kolosap moa long Sevya, mifala i bin filim ol tras blong Hem, mo mifala i kasem sapot from ol kavenan blong mifala oli strong.