2017
Olsem Wanem Nao wan Mesej blong Konfrens I Save Jenisim Laef blong Yu
October 2017

Olsem Wanem Nao wan Mesej blong Konfrens I Save Jenisim Laef blong Yu

I Kam long Hadley Griggs

Hem we i raet i stap long Yuta, YSA.

Yu rili save kam moa olsem Jisas Kraes. Olgeta tul ia bae oli helpem yu blong luk olsem wanem blong mekem.

Pikja
desk with laptop and general conference issue

?Yu filim se yu no gat tumas paoa long saed blong spirit? ?Yu ting se bae yu glad blong kasem sam smol daereksen long saed blong spirit? Okei. !Yu laki! From se jeneral konfrens nao i ansa. Elda Robert D. Hales blong Kworom blong Olgeta Twelef Aposol i talem: “Long yufala, ol yangfala memba blong Jos, mi promesem se sapos yu lisin long jeneral konfrens, bambae yu filim Spirit i stap solap insaed long yu. Lod bambae i talem long yu wanem hem i wantem yu yu mekem wetem laef blong yu.”1

Mo i no finis taem konfrens i finis long wiken—!yu save gohed blong filim Spirit ia taem yu stadi long ol toktok afta long konfrens!

Konfrens i stap helpem yumi long plante wei. Moa impoten wan, hem i mekem yumi kam kolosap moa long Sevya taem i stap tijim yumi olsem wanem blong kam moa olsem Hem. Wan gudfala wei blong lanem fulap samting aot long ol konfrens i blong lisingud long ol tijing abaot fasin blong Kraes—long taem blong brodkas, o taem yu stap stadi long ol toktok afta. Taem yu stap lisin o ridim ol toktok ia wetem samfala fasin blong Kraes long maen blong yu, bae ol toktok ia mo Spirit i save helpem yu blong lanem olsem wanem blong kam moa olsem Kraes.

Yu save mekem kwik tes ia blong luk wijwan fasin yu wantem lukluk long hem taem yu stap stadi long ol mesej blong konfrens. (Blong gat wan tes we i moa dip, jekem Oktoba 2016 New Era o japta 6 blong Prijim Gospel blong Mi.)

Long wanwan blong olgeta naen fasin blong Kraes we oli stap andanit ia, tikim toktok we i tokbaot stret yu.

  1. Fet:

    1. Mi no sua tumas se Jisas Kraes i Sevya blong mi o no.

    2. Mi biliv long Jisas Kraes mo mi akseptem Hem olsem Sevya blong mi.

    3. Mi hop se Jisas Kraes i Sevya blong mi.

  2. Hop:

    Pikja
    young man

    1. Mi filim pis mo gat hop long saed blong fiuja.

    2. !Fiuja i mekem mi fraet bigwan!

    3. Plante taem mi no tingting long fiuja—sapos mi no tingbaot fiuja, mi no nid blong wari long fiuja.

  3. Jareti mo Lav:

    1. Mi traem blong lavem ol nara pipol, be i gat samfala pipol we oltaem oli stap hambak long mi.

    2. Mi bisi tumas long lukluk long laef blong miwan we mi gat hadtaem blong tingting long wan nara samting moa.

    3. Mi wantem gudlaef mo hapines blong ol nara pipol.

  4. Klin Fasin:

    1. “Stap klin gud long tingting mo aksen.” !Hemia i no saon olsem se bae yumi pleiplei nating!

    2. Mi mi klin mo mi klin evriwan long hat blong mi.

    3. Mi gat hadtaem blong stap klin mo klin evriwan.

  5. Save:

    Pikja
    young woman reading scriptures with younger sister

    1. I gat tumas samting i stap gohed mekem se mi no faenem taem blong lukaotem ol ansa long ol kwestin blong mi.

    2. ?Wanem? ?Stap stadi? Samtaem mi harem se mi no gat intres blong traem lanem samting.

    3. Mi traehad blong andastanem trutok mo faenem ol ansa blong ol kwestin blong mi.

  6. Fasin blong save wet longtaem:

    1. Mi save wet from ol samting mo semtaem mi no harem nogud o stap kros.

    2. Mi ting se mi save wet from ol samting, be bae mi harem nogud from.

    3. Blong wet from ol samting, hemia nao mi no laekem nating. Mi wantem evri samting naoia.

  7. Fasin blong gat tingting i stap daon:

    1. Mi wantem mekemsua se mi mekem evri samting miwan nomo.

    2. Mi dipen long Lod blong kasem help.

    3. Taem mi wok long wan samting, plante taem mi stap fogetem se mi save askem Papa long Heven blong Hem i givhan long mi.

  8. Fasin blong wok strong wetem strong tingting:

    1. Mi stap spendem kolosap evri taem blong mi blong mi wajem TV, blong mi wokbaot wetem ol fren, mo !stap longwe long responsabiliti!

    2. Plante taem, mi traehad blong lukluk nomo long ol impoten samting insaed long laef blong mi, be mi stap traem.

    3. Mi spendem taem mo paoa blong mi long ol samting we oli impoten moa.

  9. Fasin blong stap obei:

    1. Mi glad nomo blong stap folem advaes blong ol lida mo papa mo mama blong mi.

    2. Plante taem, mi bos blong miwan nomo—mi gat hadtaem blong save lisin long wan narafala man.

    3. Mi stap folem advaes blong ol lida mo papa mo mama blong mi; be samtaem, bae mi toktok smol from.

Pikja
young woman

Naoia, lukluk ol ansa blong yu. ?Wijwan fasin nao yu wantem wok long hem? Blong lanem olsem wanem blong developem olgeta, yu save jusum wan o tu fasin, mo lisingud blong save moa abaot ol fasin ia taem yu stap lisin long konfrens.

Mo sapos yu bin ansa se yu stap mekem gud long evriwan, !I gud tumas mo gohed olsem! Yu save gohed blong jusum wan o tu we i tajem tingting blong yu long taem blong tes ia, mo lukluk nomo long olgeta fasin ia long taem blong konfrens stadi blong yu. Long eni taem we yu stap wokbaot long rod blong yu blong kam olsem Kraes, yu save go lukluk long ol tijing blong ol lida blong yumi blong oli stap helpem yu long rod blong yu.

!Sapos yu no save disaed blong jusum wan fasin naoia, !yu no wari! Yu save lisin long konfrens mo luk wijwan nao i stap oltaem long maen blong yu.

Taem yu jusum finis fasin ia we yu wantem lukluk long hem nomo, yu save raetemdaon fasin ia blong mekem se yu rere blong kasem revelesen long saed blong hemia taem yu stap lisin long konfrens o taem yu stap stadi long ol toktok afta. Taem yu stap lisin mo stadi, bae yu letem Spirit i lidim yu blong folem samfala stret wei we yu save wok long ol fasin ia. !Jekem eksampol daon ia!

Not

  1. Robert D. Hales, “General Conference: Strengthening Faith and Testimony,” Liahona, Nov. 2013, 6.

Printim