Koling blong Ol Fas Aposol blong Restoresen

Long namba 8 Febwari, Josef Smit i bin askem ol brata Brigham mo Josef Yang blong tufala i singsing long hem. Nao Profet i kasem wan revelesen se i taem blong singaotem Olgeta Twelef Aposol.¹

Josef Smit i bin askem Brigham blong sendem wan notis se bae i gat wan konfrens we bae oli holem long nekis Satedei. Hem i talem long Brigham se bae hem i wan long blong Olgeta Twelef.²

Sikis dei afta, olgeta Sent oli kam tugeta. Josef Smit i bin talem se wan long ol fas stamba tingting blong miting i blong Olgeta Tri Witnes blong Buk blong Momon—Oliva Kaodri, Deved Witma, mo Martin Haris—”bae oli jusum twelef man blong Jos blong kam ol Aposol.”³ Oliva mo Deved, tufala i bin kasem wok ia finis long Jun 1829, be nomata we oli bin “askem Lod long fasin blong livim kakae mo prea” blong faenem blong Olgeta Twelef, taem i no bin stret yet.⁴ Naoia, Josef i talem se taem i kam finis.

Olgeta Twelef, (folem oda we oli presentem long miting,) i gat Laeman Jonson, 23 yia; Brigham Yang, 33 yia; Hiba J. Kimbol, 33 yia; Orson Haed, 30 yia; Deved W. Paten, 35 yia; Luk Jonson, 27 yia; Wiliam E. MakLelin, 29 yia; Jon F. Boeton, 23 yia; Orson Prat, 23 yia; Wiliam Smit, 23 yia; Tomas B. Mars, 34 yia; mo Parli P. Prat, 27 yia. Evriwan i bin go long ol misin finis. Eit long olgeta oli bin go wetem Josef Smit long Saeon Kamp long sama bifo.⁵

Afta we oli talem nem mo koling blong olgeta, oli bin odenem wanwan long olgeta Aposol ia.⁶ Ol odinesen blesing blong olgeta i fulap wetem ol promes blong sakses long misinari wok. Hiba J. Kimbol i bin tingbaot afta se ol blesing “oli talem fulap samting we bae oli hapen, se bae mifala i gat paoa blong hilim ol sikman, sakemaot ol devel, mekem ol dedman oli laef bakegen long ded, mo mekem ol blaen man oli save luk bakegen … bae mifala i muvumaot ol bigfala hil, mo evri samting bae i folem tok blong mifala tru long nem blong Jisas Kraes.”⁷

Oliva Kaodri i bin talem bigwan tu ol hadtaem we bambae oli fesem: “Yufala i mas rere long evri taem blong mekem wan sakrifaes [sic] mo givim laef blong yufala, sapos God i askem blong mekem se wok blong Hem i gohed mo i kam antap.” Oliva i bin leftemap tingting blong ol Aposol blong lukaotem, blong olgetawan, wan save abaot Jisas Kraes blong mekem se oli save testifae se Hem i stap laef wetem stret save: “Neva stop blong traem kasem taem we yu luk God, we yu luk fes blong Hem.”⁸

Stat long Mei 1835, ol Aposol oli statem ol misin blong prijim gospel, mo jeneral lidasip blong olgeta i bin blesem plante man mo woman.

Ol Not

1. Luk long History, 1838–1856 (Manuscript History of the Church), volume B-1 [1 September 1834–2 November 1838],” addenda, note A, page 1, josephsmithpapers.org.

2. Luk long Joseph Young, History of the Organization of the Seventies (1878), 1.

3. “Minutes, Discourses, and Blessings, 14–15 February 1835,” in Joseph Smith Papers, Documents, Volume 4: April 1834–September 1835, 224–28.

4. “Minutes and Blessings, 21 February 1835,” in Joseph Smith Papers, Documents, Volume 4: April 1834–September 1835, 242, 243.

5. Olgeta fofala ia oli no bin pat blong kamp: Deved W. Paten, Tomas B. Mars, Wiliam E. MakLelin, mo Jon F Boeton.

6. Naen nomo long Olgeta Twelef oli bin stap long miting long 14 Febwari 1835. Parli P. Prat, oli bin odenem hem long 21 Febwari 1835, be Tomas B. Mars mo Orson Prat, oli odenem tufala long 26 Epril 1835,

7. “Extracts from H. C. Kimball’s Journal,” Times and Seasons, Apr. 15, 1845, 868.

8. “Minutes and Blessings, 21 February 1835,” in Joseph Smith Papers, Documents, Volume 4: April 1834–September 1835, 244.