Pjesë të spikatura nga Konferenca e Përgjithshme Vjetore e 188‑të

Kjo konferencë e përgjithshme ishte historike për shumë arsye, përfshirë ristrukturimin e kuorumeve të Priftërisë Melkizedeke dhe fillimin e një epoke të re për dhënien e shërbesës. Por ndoshta ngjarja më e shumëpritur ishte mundësia jonë vetjake për ta mbështetur Presidentin Rasëll M. Nelson si Presidentin e 17‑të të Kishës së Jezu Krishtit të Shenjtorëve të Ditëve të Mëvonshme.

Një Kuvend Solemn

Kur ne u ngritëm në këmbë dhe e mbështetëm një profet dhe President të ri, duart tona të ngritura nuk u numëruan nga ndonjë mbajtës njerëzor analesh; ato u shënuan në qiell si një besëlidhje me Perëndinë.

Gjatë gjithë konferencës, pamë prova se kjo është Kisha e Shpëtimtarit, e udhëhequr prej Tij nëpërmjet shërbëtorëve të Tij. Ne dëshmuam pozicionin që një profet i gjallë zë në lidhje me secilin prej nesh – jo duke qëndruar ndërmjet nesh dhe Shpëtimtarit, por duke qëndruar përkrah nesh dhe duke treguar rrugën drejt Shpëtimtarit. Përjetuam mundësinë për të marrë një “dëshmi vetjake se thirrja e Presidentit Nelson është nga Perëndia” dhe për ta hedhur spirancën e “shpirtit tonë te Zoti Jezu Krisht [duke i] dëgj[uar] ata që Ai i dërgon” (shih nga Plaku Nil L. Andersen në faqen 26).

Ju mund të mësoni më shumë mbi Presidentin Nelson në shtojcën e veçantë prej 16 faqesh që shoqëron botimet e majit 2018 të revistave Ensign dhe Liahona.

Mbështetja e Udhëheqësve të Rinj

Përveç mbështetjes të Presidentit Nelson, ne mbështetëm më shumë se 70 udhëheqës të rinj.

Gjejeni një listë të njerëzve të mbështetur, përfshirë Të Shtatëdhjetët Zonalë të rinj, në faqet 6–8, 28–29.
Lexojini biografitë e shkurtra të udhëheqësve të rinj duke filluar nga faqja 121.

Ndryshimet në Kuorume dhe në Dhënien e Shërbesës

Edhe pse të mbikëqyrura nga profetët, ndryshimet e njoftuara gjatë konferencës “janë shembuj të zbulesave [nga Perëndia] që e kanë udhëhequr këtë Kishë që prej fillimit të saj”, tha Plaku Xhefri R. Holland (shih faqen 101).

Lexojini udhëzimet mbi ristrukturimin e kuorumeve, nga Presidenti Nelson, Plaku D. Tod Kristoferson dhe Plaku Ronald A. Rasband, duke filluar nga faqja 54.
Lexojini udhëzimet mbi dhënien e shërbesës, nga Presidenti Nelson, Plaku Holland dhe Motra Xhin B. Bingham, duke filluar nga faqja 100.
Gjeni më shumë informacion mbi këto ndryshime dhe burime udhëzuese në pjesën e lajmeve në faqet 132–133.

Tempuj të Tjerë

Për ta theksuar “mesazhi[n tonë] drejtuar botës” që “ne i ftojmë të gjithë fëmijët e Perëndisë në të dyja anët e velit të vijnë te Shpëtimtari i tyre, të marrin bekimet e tempullit të shenjtë, të kenë gëzim të përhershëm dhe të kualifikohen për jetën e përjetshme”, Presidenti Nelson njoftoi shtatë tempuj të rinj.

Gjejeni se ku do të jenë vendndodhjet e shtatë tempujve të rinj në faqen 133.