ការស្វែងរកអ្នកមានវិជ្ជាជីវៈខាងសុខភាពផ្លូវចិត្ត ដែលត្រឹមត្រូវសម្រាប់អ្នក

ដោយបណ្ឌិត ខេវីន ស្សើរ័ត្ន

សេវាកម្មគ្រួសារ អិល.ឌី.អែស

មានជម្រើស និងសំណួរជាច្រើនដើម្បីពិចារណា នៅពេលជ្រើសរើសដើម្បីទទួលជំនួយដែលអ្នកត្រូវការ ។

ប្រសិនបើអ្នកពុំធ្លាប់ត្រូវជ្រើសរើសយកអ្នកផ្តល់សេវាសុខភាពផ្នែកផ្លូវចិត្តពីមុនមកទេ នោះអ្នកអាចពុំដឹងអំពីដើម្បីរបៀបស្វែងរកអ្នកផ្តល់សេវាសុខភាពផ្នែកផ្លូវចិត្តម្នាក់ដែលសមរម្យសម្រាប់ស្ថានភាពជាក់លាក់របស់អ្នកឡើយ ។ នេះជាអ្វីមួយចំនួនដែលត្រូវពិចារណា នៅពេលអ្នកចាប់ផ្តើមការស្រាវជ្រាវរកបុគ្គលម្នាក់ដែលត្រូវសម្រាប់អ្នក ។

តើអ្នកត្រូវការអ្នកផ្តល់សេវាសុខភាពផ្លូវចិត្តប្រភេទណា ?

អ្នកមានវិជ្ជាជីវៈសុខភាពផ្លូវចិត្តធ្វើរោគវិនិច្ឆ័យ ហើយព្យាបាលស្ថានភាពទាំងឡាយនៃសុខភាពផ្លូវចិត្ត ។ ភាគច្រើននៃពួកគេយ៉ាងហោចណាស់មានសញ្ញាបត្រអនុបណ្ឌិត ឬមានការអប់រំ ការបំពាក់បំប៉ន និងគុណសម្បត្តិជាន់ខ្ពស់ ។ សូមប្រាកដថា អ្នកមានវិជ្ជាជីវៈដែលអ្នកជ្រើសរើសអាចផ្តល់សេវាកម្មនានាផ្នែកសុខភាពផ្លូវចិត្ត ។

ខាងក្រោមនេះមានរៀបរាប់អំពីប្រភេទដ៏សាមញ្ញបំផុតអ្នកផ្តល់សេវាកម្ម ។ ពួកគេមួយចំនួនមានឯកទេសនៅក្នុងជំងឺដូចជា ការព្យាបាលជំងឺការបាក់ទឹកចិត្ត ការញៀនថ្នាំ ឬបញ្ហាក្នុងក្រុមគ្រួសារ ។ សូមចាំថា តម្លៃដែលពួកគេយក ឬការអប់រំដែលពួកគេបានទទួល ពុំមែនជាសញ្ញាបង្ហាញអំពីគុណសម្បត្តិ ឬជំនួយដែលពួកគេអាចមាននោះទេ ។

វេជ្ជបណ្ឌិតផ្នែកវិកលចរិត

វេជ្ជបណ្ឌិតផ្នែកវិកលចរិតគឺជាវេជ្ជបណ្ឌិត ( វេជ្ជ. ឬ វេជ្ជ.ផ្នែកឆ្អឹង ) ដែលមានឯកទេសក្នុងការចេញវេជ្ជបញ្ជាថ្នាំ ដើម្បីព្យាបាលស្ថានភាពនានានៃសុខភាពផ្លូវចិត្ត ។ ពួកគេអាចមានឯកទេសបន្ថែមទៀតនៅក្នុងការព្យាបាលក្រុមអ្នកជំងឺដូចជា កុមារ ក្មេងជំទង់ មនុស្សពេញវ័យ ឬអ្នកជំងឺដែលជាមនុស្សចាស់ ។

អ្នកឯកទេសរោគចិត្ត

អ្នកឯកទេសរោគចិត្តគឺត្រូវបានបំពាក់បំប៉នទាក់ទងនឹងគំនិត សតិអារម្មណ៍ និងឥរិយាបថនានា ។ ជាទូទៅ អ្នកឯកទេសរោគចិត្តមានសញ្ញាបត្របណ្ឌិត ( មហាបរិញ្ញា, មហារបរិញ្ញាផ្នែករោគចិត្ត, បណ្ឌិតផ្នែកអប់រំ ) ។

ពេទ្យគិលានុបដ្ឋាយិកាផ្នែកសុខភាពផ្លូវចិត្ត

ពេទ្យគិលានុបដ្ឋាយិកាផ្នែកសុខភាពផ្លូវចិត្តគឺជាគិលានុបដ្ឋាយិកាដែលមានវិជ្ជាជីវៈជាមួយនឹងការបំពាក់បំប៉នក្នុងការចេញវេជ្ជបញ្ជា ដើម្បីព្យាបាលស្ថានភាពនានានៃសុខភាពផ្លូវចិត្ត ។

អ្នកធ្វើការផ្នែកគ្លីនិកសង្គមដែលមានអាជ្ញាប័ណ្ណ

អ្នកធ្វើការផ្នែកគ្លីនិកសង្គមមានការបំពាក់បំប៉ន និងមានបទពិសោធន៍ជាក់លាក់នៅក្នុងការព្យាបាលស្ថានភាពនានានៃសុខភាពផ្លូវចិត្ត ។ ជាទូទៅ អ្នកធ្វើការផ្នែកគ្លីនិកសង្គមមានបរិញ្ញាបត្រអនុបណ្ឌិតផ្នែកការងារសង្គម (MSW) ។

អ្នកប្រឹក្សាដែលមានវិជ្ជាជីវៈ

អ្នកប្រឹក្សាដែលមានវិជ្ជាជីវៈមានការបំពាក់បំប៉ន និងមានបទពិសោធន៍ក្នុងការព្យាបាលស្ថានភាពនានានៃសុខភាពផ្លូវចិត្ត ។ ជាទូទៅ អ្នកប្រឹក្សាដែលមានវិជ្ជាជីវៈមានបរិញ្ញាបត្រអនុបណ្ឌិតផ្នែកវិទ្យាសាស្ត្រ (MS) ។

តើអ្នកគួរតែពិចារណាអ្វីខ្លះ នៅពេលជ្រើសរើសអ្នកផ្តល់សេវាសុខភាពផ្លូវចិត្តច្រើនប្រភេទបែបនេះ ?

ស្ថានភាពរបស់អ្នក ។ អ្នកមានវិជ្ជាជីវៈផ្នែកសុខភាពផ្លូវចិត្តភាគច្រើនមានសមត្ថភាពព្យាបាលស្ថានភាពនានាដែលអាចធ្វើរោគវិនិច្ឆ័យបាន ប៉ុន្តែអ្នកអាចជ្រើសរើសនរណាម្នាក់ដែលមានជំនាញនៅក្នុងបញ្ហារបស់អ្នក ។
ទោះបីអ្នកត្រូវការឱសថព្យាបាល ឬការប្រឹក្សា ឬត្រូវការទាំងពីរក៏ដោយ ។ បញ្ហាសុខភាពផ្លូវចិត្តជាច្រើនអាចមានសមាសភាគនៃផ្នែកជីវសាស្ត្រ ផ្លូវចិត្ត សង្គម និងខាងវិញ្ញាណ ។ ជាលទ្ធផល អ្នកអាចត្រូវជួបនឹងអ្នកផ្តល់សេវាសុខភាពផ្លូវចិត្តច្រើនជាងមួយ ។ ឧទាហរណ៍ អ្នកអាចត្រូវជួបនឹងវេជ្ជបណ្ឌិតផ្នែកវិកលចរិត ដើម្បីទទួលវេជ្ជបញ្ជាផ្នែកថ្នាំ និងត្រូវជួបអ្នកផ្តល់សេវាសុខភាពផ្លូវចិត្តម្នាក់ទៀតសម្រាប់ការប្រឹក្សាយោបល់ ។

តើអ្នកអាចស្វែងរកអ្នកផ្តល់សេវាសុខភាពផ្លូវចិត្តដោយរបៀបណា ?

អ្នកមានជម្រើសមួយចំនួន ៖

សូមវេជ្ជបណ្ឌិតដែលមើលថែអ្នកជាចម្បងនូវបញ្ជីមួយនៃអ្នកផ្តល់សេវាកម្មនោះ ដែលពួកគាត់ផ្តល់អនុសាសន៍ ។
ស្វែងរកការណែនាំ ឬការប្រាប់ពីមិត្តភក្តិដែលទុកចិត្ត សមាជិកគ្រួសារ ថ្នាក់ដឹកនាំសាសនាចក្រ វេជ្ជបណ្ឌិត ឬសេវាកម្មគ្រួសារ ប.ថ.ក. ( ប្រសិនបើមានការិយាល័យមួយនៅក្នុងតំបន់របស់អ្នក ) ។
ទាក់ទងអង្គការសុខភាពផ្លូវចិត្តក្នុងមូលដ្ឋាន ឬថ្នាក់ជាតិ ( តាមរយៈទូរសព្ទ ឬតាមអ៊ិនធើរណែត ) ។
ស្រាវជ្រាវតាមអ៊ិនធើរណែតរកអង្គការដែលមានវិជ្ជាជីវៈ ដែលមានសៀវភៅបញ្ជីអាសយដ្ឋានអ្នកផ្តល់សេវាកម្មសុខភាពផ្លូវចិត្តនៅក្នុងតំបន់របស់អ្នក ។

តើមានសំណួរអ្វីខ្លះដែលអ្នកគួរតែសួរ នៅពេលអ្នកជ្រើសរើសអ្នកផ្តល់សេវាសុខភាពផ្លូវចិត្ត ?

សូមគិតពីការពិភាក្សាបញ្ហាទាំងនេះ ៖

តើពួកគេជាសមាជិកសាសនាចក្រសកម្មដែរឬទេ ? ប្រសិនបើអត់ទេនោះ តើពួកគេមានគុណតម្លៃផ្នែកសីលធម៌ដូចអ្នកដែរឬទេ ?
តើពួកគេមានការអប់រំ ការបំពាក់បំប៉ន និងបទពិសោធន៍ប៉ុន្មានឆ្នាំដែរ ?
តើពួកគេមានឯកទេសខាងអ្វីខ្លះ ?
តើពួកគេធ្វើការជាមួយអ្នកផ្តល់ធានារ៉ាប់រងណាខ្លះ ?
តើពួកគេធ្វើការប៉ុន្មានម៉ោង តម្លៃប៉ុន្មាន ហើយរយៈពេលប៉ុន្មានក្នុងមួយវគ្គៗ ?

នៅពេលជ្រើសរើសអ្នកផ្តល់សេវាសុខភាពផ្លូវចិត្ត សូមកុំស្ទាក់ស្ទើរសួរសំណួរឲ្យបានច្រើន ។ អ្នកអាចសួរសំណួរនានាពីមុនធ្វើការណាត់ជួបជាលើកដំបូង ។ អ្នកផ្តល់សេវាជាច្រើននឹងមានគេហទំព័រមួយ ដែលបង្ហាញនូវប្រធានបទជាច្រើនដែលបានរៀបរាប់ពីខាងដើមមក ។ ការស្វែងរកអ្នកផ្តល់សេវាដែលត្រឹមត្រូវគឺជារឿងចាំបាច់ ដើម្បីស្ថាបនាទំនាក់ទំនងនៃទំនុកចិត្ត ហើយទទួលបានលទ្ធផលល្អបំផុតសម្រាប់ការព្យាបាលរបស់អ្នក ។ នៅពេលអ្នកពិចារណាប្រកបដោយការអធិស្ឋានអំពីជម្រើសរបស់អ្នក នោះអ្នកនឹងត្រូវបានចង្អុលបង្ហាញទៅតាមទិសដៅត្រឹមត្រូវ ។