Mau ha’amaita’ira’a nō te fa’arava’ira’a iāna iho
E mea tere roa te ’ohipa
’Aua’a a’e te mea tāna i ha’api’i mai i roto i te mau piha fa’arava’ira’a iāna iho, i te pirira’a te hō’ē ’ōpani i ni’a ia Teddy Reyes, ’ua matara mai te tahi.
Hōho’a nā Raul Sandoval
Hora 4:00 i te ’ā’ahiata i Santo Domingo, i te Rēpupirita Tominita, ’e ’ua ara a’ena ’o Teddy Reyes, tē ’ohipa ra. E rave rahi ’ohipa i teie mahana ’ia tere maita’i noa tāna taiete. E ha’amata ’oia i tē tāpūpū i te mau tōmāti ’e te faraoa. ’Ei reira e hāmani ’oia i tāna vairanu (sauce) ta’a ’ē.
Nā mua a’e te hora 6:00, tē tae mai nei e piti rave ’ohipa nō te tauturu iāna, ’oi’oi fa’ahou atu te mau fa’aineinera’a. Nā mua a’e i te hora 8:00, e 300 sandwiches tā rātou i hāmani, ’ua pū’ohuhia i roto i te ’ūrina ’e ’ua tu’uhia i roto i te mau pūtē. E ono fa’ahou rave ’ohipa tei tae mai, ’ua haere te tā’āto’ara’a e ho’oho’o i te reira.
Nā mua a’e i te hora 9:00, ’ua ho’o-pauroa-hia, ma’a sandwiches noa terā e toe ra—e toru ’aore rā e maha tā Teddy i fa’aherehere nō te fa’atāmā’a i tōna mau ta’ata.
Tē tere maita’i ra te ’ohipa a Teddy. ’Aita rā i ’ōhie noa nā mua a’e. Inaha ho’i, i nā matahiti e pae i ma’iri, ’aita i ti’a iāna ia itehia te hō’ē ’ohipa pāpū nō tōna tōro’a—e auvaha ture.
Nāhea pa’i tō Teddy ta’ahurira’a mai te auvahara’a nō tāna mau hōani i te ho’ora’a sandwich ? E mea pāpū roa e ’ohipa rahi tāna i tu’u i reira, tē vai ato’a nei rā te fa’a’ohipa-māite-ra’a i te mau parau tumu tāna i ha’api’i mai i roto i te mau piha tei pūpūhia mai e te ’ōpuara’a a te ’Ēkālesia nō te Fa’arava’ira’a iāna iho.
’Ua ’ere i te ’ohipa
’A pae matahiti i ma’iri, e mea huru fa’ahiahia te orara’a o Teddy. E ’ohipa maita’i tāna ’ei auvaha ture, nō fa’aipoipo noa a’e nei ’e ’ua bāpetizohia tāna vahine. « ’Ua tupu rā te tahi mau tāfifira’a » tē nā ’ō ra ’oia, « ’e ’ua ’ere au i tā’u ’ohipa ».
E maha matahiti tō Teddy taputōra’a nō te ’ohipa. « E mea rahi te ’ohipa tā’u e nehenehe e rave, ’aita rā hō’ē a’e i hina’aro e ’aufau iā’u. ’Ua tāmata vau i te tahi mau ’ohipa nā’u iho, ’aita rā i manuia ».
E ’ohipa maita’i tā tāna vahine, ’o Stephany, ’aita rā tāna moni e nava’i ra nō te ’aufau i te mau tārahu. ’Āria, ’ua fānau rāua i te hō’ē tamari’i. ’Ua ’oa’oa roa rāua, ’ua haere vī ato’a rā tā rāua faufa’a. ’Ua ’ere rātou i tō rātou fare, ’ua tītauhia ’ia ho’o atu i te pere’o’o, ’e ’ua pau roa te moni i fa’ahereherehia. Ē muri a’era ’ua fa’anu’u rātou i roto i te hō’ē fare na’ina’i nā te metua vahine o Stephany.
’Aita rā Teddy i fa’aru’e. ’Ua tae mai te tahi rāve’a tīa’i-’ore-hia.
Te mana nō te fa’arava’ira’a iāna iho
E rave rahi matahiti taputōra’a, ’ua pāpū ia Teddy ē, ’ua tae te taime nō te taui.
Tē nā ’ō ra ’oia : « ’Ua fa’aoti au e rave i te mau ha’api’ira’a fa’arava’ira’a iāna iho a te ’Ēkālesia. » « ’Ua fa’aro’oro’o vau nō te reira, ’ua mana’o noa rā vau ē, e ’ere nō’u. ’Ua mana’o vau ē, e ha’api’i noa te reira ’ia fa’aitoito i tē rave i te ’ohipa. ’Ua māere roa vau i teie mau ha’api’ira’a ».
Nā mua roa, ’ua haere ’o Teddy i roto i te hō’ē pupu nō te Fa’anahonahora’a i te moni a te ta’ata iho. I muri iho, ’ua haere atu ’oia i roto i te pupu nō te Ha’amata ’e te fa’arahi i tā’u taiete. ’Ua tauturu te mau pupu ha’api’ira’a ia Teddy nō ni’a i te parau nō te taiete, nō ni’a ato’a rā i te fa’atupura’a i te pae vārua.
Tē nā ’ō ra ’oia ē : « Maoti teie mau ha’api’ira’a, ’ua taui te mau mea ato’a » « ’Ua fa’aoti au e rave i te mau mea ato’a e ha’api’i mai rātou. I reirara’a tā’u imira’a faufa’a i te tauira’a. ’Ua ha’amata vau i tē ’aufau ti’a i te tuha’a ’ahuru, i tē pure i te mau mahana ato’a, i tē tuatāpapa i te mau pāpa’ira’a mo’a ’e i tē fa’a’ohipa i te fa’aro’o. ’Ua taui ihora te mau mea—’Ua ha’amata vau i tē fa’aherehere i te moni ’e i tē ha’apa’o i te mahana sābati. ’Ua ha’amaita’i mai terā mau parau tumu ato’a iā’u. »
I roto i tāna pupu Ha’amata e fa’arahi i ta’u taiete, ’ua ’apo mai Teddy nāhea i tē hi’o i te hō’ē ’ohipa e riro te mau hōani i tōna vāhi i tē ’āpī mai i te fāna’ora’a i te reira. I tōna hi’ora’a e aha tā te mau ta’ata e hina’aro, ’ua ha’amata te fa’aurura’a i te mani’i mai. I tōna vāhi, e mea au nā te ta’ata te mau sandwiches ’āpī maita’i, e mea au ato’a rā nā rātou ’ia poro’i i te reira—’e ’ia ’āfa’ihia mai.
Tē nā ’ō ra Teddy : « E rave rahi fare tāmā’ara’a e vairanu ta’a ’ē tā rātou. » « Nō reira ’ua hāmani ato’a vau i tā’u iho vairanu ta’a ’ē ! »
Fa’ahotu i tāna taiete
Te mahana ’ua ha’amata ’oia i tāna taiete, e 30 sandwiches tā Teddy i hāmani.
Tē nā ’ō ra ’oia : « Toru ’ahuru minuti i muri mai, tei te fare a’ena vau. » « ’Ua pe’ape’a tā’u vahine i te ’itera’a ’oia iā’u i ni’a i te pārahira’a marū. ’Ua ui mai ’oia e aha tā’u ’ohipa i te fare—’aita ānei ’ei ho’o vau i te mau sandwiches ? ’Ua pau a’ena i te ho’ohia ! »
I te mau hepetoma i muri mai, ’ua tāniuniu Teddy i te mau taiete ’e te mau fare ha’api’ira’a nā reira. E rave rahi tei hina’aro e ho’o i tāna mau sandwiches, ’ua ha’amata ihora tāna taiete i te hotu. ’Ua ha’api’i vitiviti ’oia nāhea i te fa’aherehere i te mau mā’a tupu ’ia vai ’āpī noa te reira. ’Ua ’ite pāpū ato’a ’oia e aha te maoro o tāna vairanu ta’a ’ē. E poro’i ’e e ti’i ’oia i te faraoa i te mau ahiahi ato’a. E ho’o ’oia i te mau mā’a tupu māmā i te mahana mā’a, e mea moni ’ore ’e e tāpe’a te reira nō monirē.
’Ua fāri’i ’oi’oi mai ’oia i te poro’i nō te tahi mau sandwiches ta’a ’ē, ’e tae noa atu nō te tahi mau ’ōro’a ta’a ’ē. Tītauhia te tahi tauturu, ’ua ha’amata ihora ’oia i te tihepu i te rave ’ohipa.
Nā roto i te fa’atupura’a i te mau aura’a au ’e te mau fare ha’api’ira’a ’e te mau taiete i reira, ’ua noa mai tā Teddy mau hōani tāmau. E maha noa ’āva’e, e va’u tāna rave ’ohipa ’e e 300 sandwiches tāna e ho’o i te mahana hō’ē, e pae mahana i te hepetoma. Nō te maita’i o tāna mau ta’ata ho’o, ’ua pau tā rātou sawdwich i tē ho’ohia ’e tae noa atu i te tau ve’ave’a, i te ’ōpanira’a te mau fare ha’api’ira’a. I teienei, ’ua ineine roa Teddy nō te fa’arahi atu ā iāna.
Nō tōna ravera’a i te mau ha’api’ira’a fa’arava’ira’a iāna iho, ’ua fa’auruhia ’oia e rave i te ho’ora’a sandwich. Tē nā ’ō ra ’oia ē : « Maoti teie arata’ira’a a te ’Ēkālesia ’e te mau ha’amaita’ira’a tā’u i fāri’i, e ’itera’a pāpū pūai mau tō’u nō te ’Ēkālesia a Iesu Mesia. »