Mau uiraʼa ’e mau pāhonoraʼa

« Nāhea tō’u ha’amaita’ira’a pātereareha e nehenehe ai e tauturu iā’u ’ia rave i te mau fa’aotira’a ? »

« Te hō’ē ha’amaita’ira’a patereareha, ’o te hō’ē ïa heheura’a i te ta’ata e fāri’i i te reira, ’oia ho’i ’o te hō’e rēni ’uo’uo i rōpū i te purūmu, nō tē pāruru, nō tē fa’auru ’e nō te fa’aitoito i te ’ohipara’a ’e te parau-ti’a. Tei roto mau i te hō’ē ha’amaita’ira’a patereareha te tahi mau pene nō tā ’outou buka mure ’ore o te mau ’ohipa e noa’a ia ’outou ’ia rave…

« … E Liahona māramarama te reira nō te arata’i ma te hape ’ore ia ’outou i tō ’outou fare i te ra’i ».

Peresideni Thomas S. Monson (1927‑2018), « Your Patriarchal Blessing : A Liahona of Light », Ensign, Novema 1986, 65, 67.

Tō tātou iho Liahona

E hō’ē rāve’a te mau ha’amaita’ira’a patereareha nō te Metua i te Ao ra nō tē tauturu ia tātou ’ia ’ite i tō tātou hīro’a hou te tāhuti nei, i te tāhuti nei ’e i te tau mure ’ore. E tauturu te ’itera’a i teie e toru parau mau ta’a ’ē nō ni’a ia tātou iho ’ia pe’e i te fa’anahora’a a te Atua nō tātou. ’Ua ’ite tātou ’o vai tātou, nō te aha tātou i te fenua nei ’e i hea tātou e nehenehe ai e ti’a. Mai tā te Liahona i ’ohipa mai te au i te fa’aro’o ’e te itoito o Nephi ’e o tōna ’utuāfare i te pe’era’a i tō te reira parau (hi’o 1 Nephi 16:28), e ti’a ato’a ia tātou ’ia vai ha’apa’o maita’i ’e ’ia itoito i te pe’era’a i tō tātou iho Liahona ’e tō te reira parau a’o, ’o tē arata’i ia tātou i tō tātou fāito pūai hanahana.

Elder Utai, 20 matahiti, Misiōni nō Rāparata Salta

Hō’ē hi’ora’a mure ’ore

I te mau taime ato’a ’aita tō’u e mana’o nō te rave i te hō’ē fa’aotira’a, e hi’o vau i tō’u ha’amaita’ira’a patereareha ’e e feruri au i tō te reira heheura’a hanahana. ’Ei reira, e mea ’ōhie te ravera’a i te fa’aotira’a. ’Aita te reira e tauturu noa nei iā’u ’ia fa’a’oroma’i i tō’u orara’a tāhuti nei ma te ’ō’oti i te mau ha’amaita’ira’a i parauhia, tē fa’aha’amana’o ato’a nei te reira iā’u ’ia fa’aineine iā’u nō te tomo ma te ti’amā i roto i te bāsileia o te Fatu, ’ia tae i te hō’ē mahana. Tē tauturu noa nei te reira iā’u ’ia tupu i roto i te fa’aro’o, ’ia tu’u i tō’u ti’aturi i ni’a i te hina’aro o te Fatu ’e ’ia ora ma te hi’ora’a mure ’ore.

Abegail F., 18 matahiti, Cagayan Valley, Philipino

E parau a’o nō te ra’i mai

Tē hōro’a nei tō’u ha’amaita’ira’a patereareha i te parau a’o nō ’ō mai i tō’u Metua i te Ao ra. Mai te mea e pe’e au i terā parau a’o, ’ua ’ite au ē, e noa’a mai te heheura’a nō ni’a i te mau fa’aotira’a e tītauhia iā’u ’ia rave. E pāhono ’oia i te tahi o tā’u mau uira’a nā mua a’e au e ui ai i te reira.

Cami H., 16 matahiti, Utah, Marite

Faʼaroʼo i te Vārua.

Mai te peu tē ’imi ra tātou i te tāmāhanahanara’a ’e te arata’ira’a, ’aore rā te hō’ē pāhonora’a i te hō’ē uira’a rahi, e nehenehe ’outou e pure pāpū mau nō te reira ’e e tai’o i tō ’outou ha’amaita’ira’a patereareha ma te mana’o pāpū i te ’ā’au, ’a fa’aro’o ato’a ai i te Vārua. E tauturu ato’a ’ia mā’imi i roto i te mau pāpa’ira’a mo’a. Tē ti’aturi nei au ē, ’ia rave ’outou i te reira ma te fa’aro’o mau, e pāhono te Fatu ia ’outou, i tōna iho taime, i te rāve’a maita’i roa a’e.

Kezia B., 15 matahiti, Vaihī, Marite

Te mau ha’amaita’ira’a i parauhia

Tē parau nei te mau ha’amaita’ira’a patereareha e aha te mea tā te Atua e hina’aro e ha’amaita’i ia tātou. E hōro’a ’oia i te mau fa’aarara’a ma te fa’ata’a nāhea e ti’a ai ia tātou ’ia riro rahi atu ā mai iāna ra te huru. I te taime e ’ite tātou e aha tā te Metua i te Ao ra i fa’aherehere nō tātou ’e nāhea ’ia noa’a te reira, e mā’iti tātou ’e e ’ohipa ho’i tātou nō te fāri’i i te reira.

Hunter H., 18 matahiti, Utah, Marite

’Ua hōro’ahia atu te mau pāhonoraʼa ’ei tautururaʼa ’e ’ei hi’oraʼa, e ʼere ’ei mau fa’a’iteraʼa mana nō te haʼapiʼiraʼa tumu a te ʼĒkālesia.

E aha tō ’oe manaʼo ? 

« E aha ta ’oe e parau ’ia ’ore ana’e tō ’oe mau hoa e ti’aturi ē, e nehenehe te mau mea mai te ’Orama Mātāmua e tupu ? »

E hāpono i tā ’outou pāhonora’a ’e, mai te mea e hina’aro ’outou, i te hō’ē hōho’a maita’i hou te 15 nō Mē 2019, i te liahona.lds.org (’a pata « Submit an Article ’aore rā Feedback ») ’Aore rā e hāpono rata uira mai i tā ’outou pāhonora’a ’e te hōho’a i te [e-mail]. ’A pāpa’i mai i te tā’āto’ara’a o tō ’outou i’oa ’e te i’oa o tā ’outou pāroita ’e titi (’aore rā ’āma’a ’e mata’eina’a).

E nehenehe te mau pāhonoraʼa e taui-ri’i-hia nō te roa ’e aore rā nō te māramarama o te reira.

• ’Ei taure’are’a tamāhine, e rōtahi rahi ānei au i ni’a i te fāito ha’api’ira’a ’e te tōro’a ’ohipa ’aore rā i ni’a i te rirora’a ’ei vahine fa’aipoipo ’e ’ei metua vahine ?