Tē arata’i ra ānei te Atua iā’u ?

’Ua ’āpapa noa te mau mā’itira’a rahi i roto i tō tātou orara’a : e aha te tōro’a e tauto’o atu, ’o vai tē fa’aipoipo atu, i te hea fare ha’api’ira’a e haere ai, tē vai atu ra. ’Ua ’āpapa noa ato’a te mau māna’ona’ora’a tāmahana : mā’iti nāhea i te fa’a’ohipa maita’i roa i te taime, tāmata i te māramarama i te ha’api’ira’a tumu ’e ’ite i te hau i roto i te mau fifi. I teie mau mea ato’a, tītauhia te heheura’a nō tātou iho. I te tahi rā taime, e mea pa’ari ’ia ’ite nāhea i te fāri’i i te reira ’e nāhea i te ta’a i te reira ’ia fāri’i ana’e mai tātou. I te taime ’aita tātou e fāri’i nei ’aore rā ’aita tātou e ta’a nei i te mau pāhonora’a, e uiui paha te mana’o ē : « Nā te Vārua ānei ’aore rā nō’u noa terā mana’o ? » « Nō te aha i tae mai ai te mana’o fa’auru e rave i terā mea, ’e teienei ’aita i manuia ? » « Nō te aha tē tae mai nei te mana’o ē, ’aita te Atua e pāhono nei i tā’u mau pure ? »

’Aua’a a’e, i roto i te « Rave i te mau fa’aotira’a : Ti’amāra’a ’ia mā’iti ’e te heheura’a » (’api 44), tē fa’a’ite ra ’o Erin i tōna ’ā’amu nō ni’a i tāna iho heheura’a i te taime tītauhia iāna ’ia rave i te hō’ē fa’aotira’a e taui i tōna orara’a. Noa atu ā ’ua hina’aro te Atua e arata’i ia tātou, ’ua hina’aro ato’a ’oia ’ia ha’api’i tātou ’ia tūru’i i ni’a i tō tātou ti’amāra’a ’ia mā’iti nō te rave i te mau fa’aotira’a maita’i.

Te ha’api’ira’a nāhea te Vārua Maita’i ia paraparau ta’a ’ē ia ’oe, ’o te hō’ē tuha’a faufa’a tumu ïa nō te fāri’ira’a ’e te ta’ara’a i te heheura’a. E nehenehe e ta’a ’ē nō te tahi ’e nō te tahi. I te ’api 48, e rave rahi feiā ’āpī pa’ari tē fa’a’ite nei nāhea rātou e fāri’i nei i te heheura’a.

I roto i te hō’ē parau ve’a, roro uira noa, tē fa’ata’a nei Aspen ē, tītauhia nō te heheura’a a te ta’ata hō’ē, ’ia « fa’a’eta’eta i te uaua pae vārua ».

Te ferurira’a i te ananahi, e nehenehe te reira ’ia riro ’ei ’ohipa teimaha, ’e te ri’ari’a ato’a ho’i. Nō te feiā ’āpī pa’ari iho ā rā. ’Ia ha’amana’o rā vau nāhea te Atua i te arata’ira’a i tō’u orara’a nā mua a’e, e noa’a mai te itoito nō tē haere ā i mua ’e nō tē ’ohipa, ma tē hōro’a i te ti’aturi ē e tāmau noa ’oia i tē hōro’a mai i te arata’ira’a tei tītauhia i ni’a i tō’u tere.

Ma te aroha mau,

Katie Sue Embley

Parau a’o maita’i roa a’e…

Tē fa’a’ite nei te feiā ’āpī paʼari i te parau a’o maita’i roa a’e tā rātou i fāri’i nō ni’a i te fāri’ira’a i te heheura’a nōna iho :

« ’Ua nā ’ō mai tō’u ta’ata a’o EFY ē, ‘e ha’amaita’i i tō’u aura’a e te Atua ’ei Metua tāne mau nō’u i te pae vārua. Rahi noa atu tō’u aura’a ’e ōna, rahi noa ato’a atu vau i te māramarama atu ’e i te arata’ihia’. ’Ua taui rahi roa te reira i tā’u mau pure. »

—Grant Goolsby, California, Marite

« ’Ua ani mai tō mātou patereareha titi e tāmau ’ā’au i te hō’ē parau ’ōhie : ‘nō te fāri’i i te heheura’a, ’a tai’o i te heheura’a.’ ’Ua tauturu rahi te reira iā’u i te tai’ora’a vau i te mau pā’pa’ira’a mo’a ».

—Shellby Tippetts, Missouri, Marite

« E rave i te taime nō te feruri hōhonu. ’Ua feruri hōhonu Iosepha Semita i te Iakobo 1:5 hou ’a haere ai e rave. I te tahi taime, ’ua hina’aro te Metua i te Ao ra ’ia tu’u rahi tātou ia tātou i roto i te pure ’e te tuatāpapara’a hou ’a hōro’a mai ai i te mau pāhonora’a. E mea rahi roa tā tātou e ’apo mai nā roto i te reira. »

—Natasha Herbst, Utah, Marite

« E fa’aro’o ma te ’ā’au, ’eiaha ma te tari’a. »

—Sai Tua, Hamoa Marite

E aha te parau a’o maita’i roa a’e tā ’outou i fāri’i nō ni’a i te tātarahapara’a ? E hāpono mai i tā ’outou pāhonora’a i te liahona.lds.org nā mua a’e i te 30 nō ’Ēperēra 2019.