Rave i te mau fa’aotira’a : Te ti’amāra’a ’ia mā’iti ’e te heheura’a

Nā Erin Rider

Tē ora nei te ta’ata pāpa’i i Utah, i Marite.

Nō te rave i te mau fa’aotira’a rarahi, e aha te tuha’a e tūru’i atu i ni’a i te Atua nō te parau mai ia tātou e aha tē rave ?

I te mau mahana ato’a, tei mua ia tātou te mau fa’aotira’a e rave rahi. Tē vai ra te mau fa’aotira’a e hi’o mai te ta’ata, mai teie : « E aha te ’ahu tā’u e ’ō’omo ? » « E aha tā’u e ’amu i te avatea ? » « E ho’o ānei i te hō’ē pere’o’o ’āpī, ’aore rā e nehenehe ā e tāpe’a ri’i i te tahito ? » E mea pinepine rā tātou i te tae i mua i te hō’ē fa’aotira’a rahi e rave—« E ho’i ānei i te ha’api’ira’a ? » « E fāri’i ānei i terā ’ohipa ? » « E fa’anu’u ānei i te hō’ē ’oire ’āpī ? » « E ho’o ānei i te hō’ē fare ? » « E arapae ānei i terā ta’ata ? » « E fa’aipoipo ānei i terā ta’ata ? » ’e tē vai atu ra.

I mua ana’e i te mau fa’aotira’a rahi, mai te huru ē—e mea tano ho’i—e rave tātou i te tahi taime nō te mā’iti. E pe’e tātou i te parau a’o i hōro’ahia ia Oliver Cowdery i roto i Te Parau Ha’api’ira’a ’e te mau Parau Fafau 9:8-9, i te nā-’ō-ra’a te Fatu :

« ’Āre’a rā, inaha, tē parau atu nei au ia ’oe ē, ’ia ’imi māite ’oe i te reira i roto i tō ’oe ’ā’au e ti’a ai ’ei reira ’oe e ani mai ai iā’u ē ’ua ti’a ānei, ’e mai te mea ’ua ti’a ra e fa’atupu ïa vau i te ahu i roto i tō ’oe ’ōuma ; nō te reira’ oe e ’ite ai ē ’ua ti’a iho ā.

« Mai te mea rā e ’ere ïa i te mea ti’a e ’ore roa e noa’a ia ’oe te reira huru ahu i roto ia ’oe ra, e ha’apōurihia rā tō ’oe mana’o ’e nā te reira e ha’amo’e i te mea hape ».

Noa atu ā e parau a’o maita’i mau teie nō tē ravera’a i te mau fa’aotira’a rahi, i te tahi taime, e mea tūru’i rahi roa tātou i ni’a i terā tuha’a ē nā te Atua e parau mai i te mea ti’a ’ia rave ’e ’aita tātou e ha’apa’o rahi nei i te tuha’a e parau nei ’oia ’ia ’imi māite i roto i tō tātou ’ā’au. ’Ua mau roa tātou i te tīa’ira’a i te Atua ’ia ha’apāpū mai i tā tātou mau fa’aotira’a ’e tē ’ere nei tātou i te mau rāve’a au. ’Ua ’ite ato’a ho’i tātou i te vaira’a nō te ti’amāra’a ’ia mā’iti, ’ua mehameha rā tātou i tē rave i te hō’ē fa’aotira’a e fa’aātea ia tātou i tō tātou tere i « fa’anaho-a’ena-hia » ’e ’ua mana’o noa atura tātou ē, ’aita ana’e te ahu i roto i te ’ōuma ’aore rā te hō’ē reo nō te ra’i mai, ’ua hape ïa tā tātou fa’aotira’a. Nō tātou e rave rahi, teie ’umera’a tei parau-’ore-hia nei i roto i te ti’amāra’a ’ia mā’iti ’e te heheura’a nō tātou iho, e arata’i ïa i te hō’ē uira’a faufa’a rahi : E aha tō te Atua ti’ara’a i te tauturura’a ia tātou ’ia rave i te mau fa’aotira’a ?

Te ti’ara’a o te Atua i roto i tā tātou ravera’a i te fa’aotira’a

Penei a’e e pāhonora’a maita’i nō teie uira’a i roto i te ’ā’amu nō te taea‘e o Iareda. E hi’ora’a tupura’a faufa’a rahi i roto i teie ’ā’amu ’o tē ha’api’i nei ia tātou nō ni’a i te huru te Atua e tīa’i nei ia tātou ’ia rave i te mau fa’aotira’a. I muri mai i te tauira’ahia te mau reo i te patu o Babela, ’ua ani Iareda i tōna taea’e ’ia ani i te Fatu ē e fa’aru’e ānei i te fenua, ’e ’o te reira ana’e ra, i hea e haere ai (hi’o Etera 1:36-43). ’Ua ani atu te taea’e o Iareda ’e ’ua arata’i atura te Fatu ia rātou i te pae tahatai. I roto i te tere, ’ua paraparau te Fatu ia rātou nā roto i te hō’ē ata ’e ’ua fa’atere ’oia i te mau ta’ahira’a ato’a o tō rātou tere. Ē tāpae a’enei rātou i te pae tahatai, ’e ’ua fa’aea rātou i reira e maha matahiti.

I te hopera’a nā matahiti e maha, ’ua parau te Atua i te taea’e o Iareda ’ia patu i te hō’ē pahī ’e ’ia fa’aineine nō te fano nā ni’a i te moana. I te ’itera’a te taea’e o Iareda ē, e’ita rātou e fāna’o i te mata’i, ’ua pe’e ’oia i te hōho’a tāna i mātau i te haerera’a e ani i te Atua e aha tāna e rave. Mai tei mana’ohia, ’ua pāhono mai te Fatu nā roto i te hōro’ara’a i te mau arata’ira’a pāpū nō tē hāmanira’a i te tahi mau ’āpo’o i te pae ni’a ’e i te pae raro o te mau pahī. ’Ia hi’ohia te hōho’a nō te heheura’a ē tae roa mai i terā taime : ’ua hōro’a te Atua ia rātou i te fa’anahora’a, ’ua ui rātou i te mau uira’a nō ni’a i te huru e rave i terā fa’anahora’a, ’e ’ua hōro’a mai te Atua i te mau pāhonora’a pāpū ’e te hope.

I muri iho rā tōna hāmanira’a i te mau ’āpo’o i ni’a i te mau pahī, ’ua ’ite ihora te taea’e o Iareda ē, e’ita rātou e fāna’o i te mōrī. ’Ua ui fa’ahou ’oia i et Atua e aha tē rave. Terā rā, ’aita ’oia i pāhono mai, ’ua ui rā te Atua : « E aha tā’u e rave ’ia roa’a mai te māramarama i roto i tō ’outou mau pahī ? » (Etera 2:23). ’Aita ’oia i hōro’a i te mau arata’ira’a pāpū mai te mātāmua ra, i terā taime ’ua tīa’i te Fatu ’ia rave te taea’e o Iareda i te fa’aotira’a nō te mea e rave.

’O teie paha pāhonora’a a te Fatu te pāhonora’a fifi roa a’e e māramarama i te taime e rave tātou i te hō’ē fa’aotira’a. ’Ua ha’api’ihia tātou ’ia pure ’e ’ia tīa’i i te pāhonora’a, nō reira e pe’ape’a iho ā ïa tātou ’aita ana’e tātou e fa’aro’o nei i te hō’ē pāhonora’a. Pinepine tātou i te uiui te mana’o ē, ’o te ’erera’a ānei te pāhonora’a pāpū « te ha’apôurira’a i te mana’o », ’o te fa’a’itera’a ïa e mea hape tā tātou mā’itira’a. I te tahi atu taime, e uiui te mana’o ē, te aura’a ra, ’aita ïa tātou i nava’i i te parau ti’a nō te fa’aro’o i te pāhonora’a ’aore rā ’aita tātou e ani nei ma te « mana’o pāpū » (hi’o Moroni 10:4). Tē vai nei rā te toru o te mana’o tā tātou e ’ore e feruri nei i te tahi taime—penei a’e, mai tāna i rave nō te taea’e o Iareda, tē tīa’i nei te Atua ia rave tātou i tā tātou iho fa’aotira’a.

Rave i te hō’ē fa’aotira’a

Nō fa’aruru a’enei au i te hō’ē ’ohipa tei ’ume i te huru vau i hi’o i te ti’amāra’a ’ia mā’iti ’e i te heheura’a nō tātou iho. Tē fātata ra vau i tē fa’aoti i te ha’api’ira’a tuatoru, e ma’a ’ohipa ri’i tei pūpūhia mai i roto i te tahi mau ’oire ta’a ’ē ’e ’aita i ti’a iā’u ’ia fa’aoti e aha tē rave. Mai te taea’e o Iareda te huru, ’ua nā roto atu vau e rave rahi taime ’ua pure au nō te hō’ē fa’aotira’a faufa’a rahi ’e ’ua pāhono mai te Atua ma te pāhonora’a huru pāpū. Ma te tūru’i i ni’a i te reira mau ’ohipa, ’ua ha’amata vau i te pure nō te ani i te Atua ’ia tauturu mai e fa’aoti e aha te ’ohipa e fāri’i. Tē rave ato’a ra rā vau i tā’u tuha’a nā roto i te ’imira’a nō ni’a i te mau ’ohipa tāta’itahi ’e te paraparaura’a i te mau ta’ata e rave rahi. Noa atu rā te rahira’a pure ’aore rā ha’apaera’a mā’a, ’ua vai mū noa te ra’i, ’e ’aita vau i fāri’i i te pāhonora’a.

Tē piri mai ra te mahana hope’a nō tē rave i te fa’aotira’a, tē ha’amata ra vau i te ha’ape’ape’a. E mea pāpū ho’i e fa’aotira’a teie e ha’apa’o mai te Fatu, nō te aha ïa ’aita ’oia e pāhono nei ? Penei a’e ’aita ’oia e ha’apa’o ra i te ’ohipa tā’u i mā’iti, e tāu’a rā ’oia i te ’oire vau e fa’anu’u atu inaha e ha’uti pāpū te reira i ni’a i tō’u orara’a. ’Ua ha’apa’o noa te Fatu i tā’u mau fa’aotira’a nā mua a’enei, nō te aha ïa e’ita ’oia e ha’apa’o mai i teie ato’a ?

Terā rā, noa atu ā vau e tāmata pūai, ’aita iho ā e pāhonora’a. ’Ua ha’amata atura vau e uiui i te mana’o ē, ’ua hahi ’ē roa paha vau i te Atua ’e e’ita tā’u e nehenehe e fa’aro’o i tāna pāhonora’a. ’Ua uiui ato’a tō’u mana’o ē, e’ita tā’u e nehenehe e fa’aro’o nō te mea ’ua fa’aoti au i roto iā’u ’aita vau i hina’aro e fa’aro’o i te pāhonora’a. I te pae hope’a, i te mahana nā mua noa a’e, ’ua ta’a iā’u ē, ’ia ravehia te hō’ē fa’aotira’a e ti’a ai, nō reira ’ua fa’a’ohipa vau i tō’u ferurira’a ’e ’ua rave au i te hō’ē fa’aotira’a. I terā pō, ’ua pure noa vau ma te ani ē, e ti’a ānei iāna ’ia parau mai ’ua hape ānei tā’u fa’aotira’a. Fa’ahou ā, ’aita e pāhonora’a, nō reira ’ua haere au i mua ’e ’ua rave mai au i terā ’ohipa.

E rave rahi ’āva’e i muri mai, tē uiui noa ra tō’u mana’o i tā’u fa’aotira’a, nō reira ’ua ani au i te hō’ē ha’amaita’ira’a autahu’ara’a nō te fāri’i i te tahi tāmarūra’a. I roto i te ha’amaita’ira’a, ’ua parauhia mai ē, ’aita vau i fāri’i i te pāhonora’a i tā’u pure nō te mea ’ua ’oa’oa te Fatu i te mau fa’aotira’a ato’a tā’u i rave. ’Ua ha’apāpū fa’ahou atu teie ha’amaita’ira’a i te parau a’o i hōro’ahia mai e tō’u peresideni misiōni, tei nā ’ō mai ē, i te rahira’a taime e ’ere i te fifi rahi te fa’aotira’a tā tātou e rave. ’Ua hina’aro te Atua ia tātou ’ia ha’api’i nāhea i te ti’a pāpū i ni’a i tō tātou ’āvae ’e ’ia fa’aoti i te huru orara’a tā tātou e ora. ’Ua fa’aha’amana’o ato’a mai tō’u peresideni misiōni ē, e’ita te Atua, tō tātou Metua i te Ao ra, e fa’autu’a ia tātou ’e e fa’a’ere ho’i ia tātou i te mau rāve’a i parauhia mai te mea tē tāmata pāpū nei tātou ’ia feruri e aha tē rave.

E nehenehe paha te taea’e o Iareda e parau i te tahi noa atu rāve’a nō te māramarama i te mau pahī, e fāri’i mai te Fatu i te reira. Te fā o teie ’ohipa, e ’ere te ha’apūai-noa-ra’a i te fa’aro’o o te taea’e o Iareda, ’o te ha’api’ira’a ato’a rā ’ia rave i te hō’ē fa’aotira’a.

Fa’a’ohipa i te ti’amāra’a ’ia mā’iti

’Ia hi’ohia te tau mure ’ore, e tuha’a tumu te fa’a’ohipara’a i te ti’amāra’a ’ia mā’iti nō tō tātou iho tupura’a. ’Āhiri ’aita te reira, e’ita tātou e nehenehe e rave i te mau huru fa’aotira’a e tauturu ia tātou ’ia rave fa’aoti i tō tātou fāito pūai hope. E tae mai te tupura’a, mai te tahi atu mau mea i roto i te ’evanelia, te « fa’aue nā ni’a iho i te fa’aue, te a’o nā ni’a iho i te a’o » (hi’o 2 Nephi 28:30). ’Ua hina’aro te Atua ’ia riro tātou ’ei nūna’a fa’aineinehia, ’eiaha ’ei nūna’a tei mau noa, ’e tē tītau nei ’oia ’ia fa’a’ohipa tātou i tō tātou ti’amāra’a ’ia mā’iti nō tē ora i tō tātou orara’a i te maita’i roa a’e e noa’a ia tātou.

I te taime ra iho ā e ’ite tātou nāhea i tē fa’a’aifāito i te ti’amāra’a ’ia mā’iti ’e te heheura’a, e ’ite tātou i te tupura’a pae vārua mau. ’O te ’ohipa i tupu nō te taea’e o Iareda. I te otira’a ’oia i tē feruri i te reira, ’ua ’ohipa ’oia ’e ’ua tarai ’oia 16 ’ōfa’i ’e ’ua ani i te Atua ’ia tāpe’a tōna rima i te reira ’ia ’ana’ana mai te reira (hi’o Etera 3:1–5). I terā taime, i te pāhonora’a mai te Atua, ’ua taui te mau mea ato’a. ’Aita fa’ahou ’oia i fa’aro’o i te reo o te Atua i roto i te hō’ē ata, ’ua ’ite mata roa te taea’e o Iareda i te Fatu, ’e ’aita ’oia i fā tino noa mai, ’ua fa’a’ite ato’a rā ’oia i te taea’e o Iareda i te mau ’ōrama fa’ahiahia nō ni’a i te ao ’e te mau mea ato’a e tupu mai (hi’o Etera 3:6-26). E nehenehe ato’a te taea’e o Iareda e ’ore e fa’aineinehia i te pae vārua nō te fāri’i i terā ’ōrama ’āhani ’aita nā mua ’oia i nā roto atu i te tupura’a i tae mai ho’i nā roto i te ravera’a i tāna iho fa’aotira’a.

’A rave noa ai tātou i te mau fa’aotira’a, ’ia pe’e ato’a ho’i tātou i te parau a’o a Alama e ti’a ai, ’oia ho’i, « e ui atu i te Fatu i te mau mea ato’a tā ’oe e rave ra » (Alama 37:37). ’Ia hina’aro te Fatu ia tātou ’ia rave i te hō’ē fa’aotira’a ta’a ’ē, e fa’a’ite mai ’oia ’e e tauturu mai ho’i ’oia ’ia ’ore tātou ’ia hahi ’ē. Tītau-ato’a-hia rā ia tātou ’ia fa’aineine nō te ti’a mai ’e nō te haere i mua ma te fa’aro’o, ’ia tae mai te pāhonora’a ’aore rā ’aita. ’Ia ha’apa’o noa tātou i tā tātou mau fafaura’a ’e ’ua pe’e mau noa tātou i te ’evanelia a Iesu Mesia, e ti’a ia tātou ’ia ti’aturi i tā tātou mau fa’aotira’a parau ti’a ’e i te hau ē, tē au nei te Fatu i tā tātou mau tauto’ora’a.