Mai te hō’ē ta’ata ’āpī
Tē ora nei te ta’ata pāpa’i i Texas (Marite).
Esetonia
« E parau ’āpī tā’u nō ’oe ! » ’Ua nā ’ō atu Ema (māmā) i te ti’ira’a ’oia ia Rasmus i te ha’api’ira’a. Tē hāhaere ra rāua nā ni’a i te mau purūmu piriha’o ’e te ’ū rau nō te mau fare i reira.
« E Rosolje paha ïa te mā’a i teie pō ? » ’Ua mana’o ’o Rasmus ma te ’ana’anatae. Terā tā rātou i ’amu i te hepetoma i ma’iri nō te hitura’a o tōna ’ōro’a fānaura’a. E nehenehe noa rā tāna e ’amu rahi atu ā i terā mā’a peti ’e te ’ūmara ’e terā i’a hareni.
Tā’iri’iri noa te upo’o o Ema ma te mata ’ata’ata. « ’E piti tamāhine tā’u i fārerei i ni’a i te pere’o’o mata’eina’a i teie po’ipo’i. E mau misiōnare. E haere mai rātou i teie pō nō te paraparau nō ni’a i tā rātou ’ēkālesia ».
’Ua hi’o māere ri’i ’o Rasmus. ’Aita ’oia i fārerei a’enei i te mau misiōnare.
Tei roto ’oia i tōna piha, tē ha’uti ra i tāna pere’o’o auahi, tae mai nei te mau misiōnare. « Tere ! Tere ! ’Ia ora na ! », ’ua aroha rāua ia Ema ’a tomo ai rāua i roto i te fare. ’Ua tātara rāua i tō rāua pūti ’e ’ua ’ō’omo i te tia’a fare tā Ema e fa’aherehere noa nō te ta’ata e haere mai. Arata’i a’era Ema ia rāua i ni’a i te pārahira’a rahi ’ū ’ānani. ’Ua fa’aea noa rā Rasmus i muri mai i te ’ūputa.
’Ua ’ite mai te vahine rahi iāna ’e ’ua ’ata niho atura iāna. I ni’a i tāna tāreta ’ere’ere ’ua pāpa’ihia Õde Craig (Tuahine Craig). ’Ua nā ’ō mai ’oia : « ’Ua parau mai tō ’oe māmā ē, nō tupu noa a’e nei tō ’oe mahana fānaura’a ». « ’Ua ’āfa’i mai mātou i te tahi mea nā ’oe. » ’Ua toro atu ’oia i te hō’ē tāreta iti. ’Ua hi’opo’a Rasmus i te reira.
E hōho’a te reira nō te hō’ē ta’ata. E ’ahu ’uo’uo tōna, ’e tē toro nei tōna nā rima.
« ’Ua ’ite ānei ’oe ’o vai terā ? » ’Ua ui atu Õde Craig
’Aita ’o Rasmus i ’ite i te i’oa o terā ta’ata. ’Aita a’enei ’oia i ’ite i te reira hōho’a nā mua a’e. E hōho’a mata au rā tōna ’e te mana rahi. « ’Ia mana’o vau, e ari’i ’oia ! » ’Ua parau Rasmus.
E mata ’ata’ata tō teie nā misiōnare. « ’Oia mau ! E Ari’i ’oia nō te mau ari’i ! ’O Iesu Mesia tōna i’oa ». ’Ua rave mai Õde Craig i te hō’ē buka ’ū nīnamu. « ’E teie te hō’ē buka e ha’api’i nō ni’a iāna, ’o te Mormoni Ra’amat. Te Buka a Moromona ».
’Ua ha’amata rāua Ema e tai’o i te Buka a Moromona i te mau mahana ato’a hou ’oia ’a haere ai i te ha’api’ira’a. I te ha’api’ira’a, ’ua hāhaere ’o Rasmus ’e tāna piha ha’api’ira’a nā roto i te nātura ’e ua tā’oto’oto ana’e. I muri iho i te ha’api’ira’a, pinepine ’ōna ’e ’o Ema e fārerei i te mau misiōnare. E paraparau rāua i te mau misiōnare nō ni’a i te mau mea tā rāua i tai’o i roto i te Buka a Moromona. I te tahi taime, e fa’atāmā’a ’o Ema ia rātou pā’āto’a i te kringel, e faraoa tīnamo (cannelle) tei firihia. I te mau hope’a hepetoma, e haere rāua ’o Ema e ta’ahi i te pere’o’o ta’ata’ahi ’e ’aore rā e haere rāua i te pae tahatai. I te tahi taime e orihaere rāua i roto i te uru rā’au ’aore rā nā pīha’i iho i tā rāua ’ānāvai au roa.
I te hō’ē taime rāua i te hāhaerera’a nā roto i te uru rā’au, ’ua parau ’o Ema iāna ’ua hina’aro ’oia ’ia bāpetizo. ’Ua hi’o ’o Rasmus ma te mata ’ata’ata. I ani na te mau misiōnare ia Ema ’ia pure ē e bāpetizo ānei iāna. Mai te huru ra ē, ’ua fa’aro’o mai ’oia i te pāhonora’a !
« ’E ’ua ’ite au i te vāhi e bāpetizo vau », ’ua nā ’ō ’oia iāna ma te mata ’ata’ata. « ’Ua ’ite ’oe ? »
’Ua mana’o Rasmus i te ha’api’ira’a a te mau misiōnare nō ni’a i te bāpetizora’a. ’Ua fa’a’ite mai rāua i te hō’ē hōho’a nō Iesu ’e Ioane Bāpetizo i roto i te hō’ē ’ānāvai…
« Te ’ānāvai ! », ’ua pa’a’ina mai tōna reo. « Tā tāua ’ānāvai au roa a’e. »
Hō’ē hepetoma i muri mai, tē ti’a ra ’o Rasmus i te hiti ’ānāvai ’e te mau misiōnare ’e te tahi ato’a mau ta’ata nō te ’ēkālesia. ’Ua ineine Ema nō te bāpetizo iāna. ’Ua haere roa ’oia i raro i te pape mai tā Iesu i rave. I te matarara’a mai ’oia i ni’a, e mata ’ata’ata tōna. ’Ua hina’aro roa ’o Rasmus ’ia ha’amana’o noa i te reira taime ē a muri noa atu—te pape nīnamu, te mau tiare ’ōviri nā ni’a i te matie ’e te mata ’ata’ata o tōna metua vahine.
« E aha te huru te bāpetizora’a ? » ’ua ui atu ’oia i muri mai, tē ’amu’amu ra te mau ta’ata i te mau cookies tā te mau misiōnare i ’āfa’i mai.
« Fa’ahiahia roa », ’ua pāhono atu ’oia. « ’Ua hina’aro roa vau e fa’aea noa i roto i te pape. E au roa vau mai te hō’ē ta’ata ’āpī ! » Haru ihora ’oia iāna i roto i tōna rima.
« I tō’u ’ōro’a fānaura’a, ’ua hina’aro vau e bāpetizo iā’u, mai ia ’oe ’e mai ia Iesu », ’ua nā ō atu ’oia i tōna māmā. ’Ua hina’aro ato’a vau i terā mana’o ta’ata ’āpī ! »