Te perēue i mo’e
Tē ora nei te ta’ata pāpa’i i Iowa, Fenua Marite
« E fa’a’ore au, ’o te Fatu, i te hara a rātou tā’u i hina’aro i te fa’a’ore atu, ia ’outou rā ’ua tītauhia atu ra ’outou ’ia fa’a’ore i te hapa a te ta’ata ato’a » (Te Parau Ha’api’ira’a ’e te mau Parau Fafau 64:10).
« Māmā, ’aita tō’u perēue ! » tē parau ra o Brad. ’Ua hora nō te ho’i i te fare mai te fare purera’a atu, ’aita rā o Brad e ’ite ra i tōna perēue i ni’a i te fa’atautaura’a.
« ’Ua pāpū rā ia ’oe ē, tei ’ō tō ’oe tu’ura’a ? » ’Ua ani mama.
« ’Ē. I teie vāhi ». E mea ninamū teatea ’e te ’ute’ute te perēue o Brad. E’ita e nehenehe e ’ore e ’itehia.
« ’Ua fa’anu’uhia paha te reira. Hi’o ana’e ’ati a’e te fare purera’a », ’ua nā ’ō ’o pāpā.
’Ua haere ’o māmā i tōna pae, pāpā i tōna pae ’e ’o Brad i tōna pae nō te hi’o i roto i te piha. ’Ua hi’o rātou i roto i te ’āfata nō te mau tauiha’a mo’e, i roto i te piha purera’a ’ōro’a, te piha Ha’api’ira’a Sābati a Brad, te piha Paraimere ’e i ni’a i te mau fa’atautaura’a ato’a. ’Ua hi’o ato’a rātou i roto i te fare haumiti, ’aita te perēue i ’itehia mai.
« ’Ua hape paha ïa te tahi ta’ata i te ravera’a i te reira. ’Ia mana’o vau, e fa’aho’i mai iho ā mai rātou i te reira i te hepetoma i muri nei, ’ia ’ite atu rātou ē e ’ere nō rātou », ’ua parau pāpā.
« Nō teienei rā, e nehenehe tā ’oe e ’ō’omo i tō ’oe perēue tahito », ’ua parau māmā.
’Ua fa’atu’atu’a te mata o Brad. ’Aita ’oia i au i tōna perēue tahito. E mea rairai te reira, ’e e mea na’ina’i ho’i i ni’a iāna. ’Ua au roa ’oia i tōna perēue ’āpī nīnamu ’e ’ute’ute e fa’ahōho’a iāna i te hō’ē ’aito hōho’a teata.
« ’Ua hi’o paha te tahi ta’ata i te nehenehe o tō’u perēue ’e ’ua ’eiā i te reira », ’ua mana’o ’o Brad. Nāhea pa’i te reira i te tupura’a i te fare purera’a ? E mea parau-ti’a ho’i te ta’ata i reira. E’ita ’o Brad e vaiiho noa i terā ta’ata ’eiā e rave noa i tāna ’ohipa. E ’ohipa tāna e mana’o ra. I te sābati i muri nei, e hi’o maita’i ’oia ’o vai te ’ō’omo mai i tōna perēue. ’Ei reira e haru mai ’oia i te reira ’e tuō atu ai : « Tāpe’a mai, te ta’ata ’eiā ! » E tātarahapa roa rātou i te ravera’a i te reira.
’Ua tīa’i maoro noa Brad i te sābati nō te rave i te ’ohipa tāna i mana’o. ’Āre’a rā i te sābati nō muri iho, e mea ve’ave’a roa nō te ’ō’omo i te perēue, nā reira ato’a te sābati nō muri atu ā.
I te sābati nō muri iho, ’ua hi’o tupatupa noa ’o Brad i te mau tamāroa i te Paraimere, ma te feruri ’o vai tei ’eiā i tōna perēue. ’O terā ānei tāmāroa roa ? ’Aita ana’e e tamāhine paha. Mai te huru atura e’ita tāna e nehenehe e ti’aturi i te ta’ata. ’Aita ’o Brad i au i terā mana’o.
I te otira’a te purera’a, ’ua ha’aviti Brad nō tē haere e hi’o i te mau ’utuāfare e ’ō’omo ra i tō rātou perēue. ’Aita rā ’oia i ’ite ri’i a’e i tōna perēue. ’Ua hi’o fa’ahou ’oia i te ’āfata nō te mau tauiha’a mo’e… ’aita e perēue. Tei hea roa ïa ?
I ni’a i te tere ho’ira’a, ’ua feruri ’o Brad i te hō’ē ’ohipa ’āpī. E pure ’oia. ’Ua ’ite ’oia ’ē e nehenehe te Metua i te Ao ra e ’ite mai i te mau mea mo’e. I terā pō ’ua pure ’o Brad ma te parau ē : « E te Metua i te Ao ra, e parau mai na ’o vai tei rave i tō’u perēue. ʼUa hina’aro vau ’ia fa’aho’ihia mai te reira ».
’Ua tīa’i Brad ’ia tae mai te i’oa ’aore rā te hōho’a mata o te ta’ata ’eiā i roto i tōna ferurira’a. ’Ua ha’amata rā ’oia i te feruri i tōna hoa ia Carl. E pārahi noa Brad i pīha’i iho ia Carl i te Paraimere. E ha’uti rahi rāua ’e e ’ata rahi. ’Aita rā ’o Carl i tae mai i te purera’a te tahi ma’a hepetoma. ’Ua mihi Brad iāna.
E ahāni ē nā Carl i rave i tōna perēue ? ’Ua mata’u paha Carl i teienei ’ia haere mai i te purera’a, i te mana’o ē, ’o te ’ore Brad e riro fa’ahou ā ’ei hoa nōna. ’Ua hina’aro Brad ’ia ho’i mai Carl i te purera’a. Mai te mea nā Carl i rave i tōna perēue, ’ua fa’aoti ’o Brad ē, e’ita ’oia e tama’i iāna. E fa’a’ore ’oia i tāna hapa.
Pa’uma a’era Brad i ni’a i tōna ro’i, ma te mana’o maita’i a’e.
Te sābati nō muri iho i te Paraimere, e ’ere ’o Carl tei tae mai, ’o te hō’ē tamāroa ’āpī rā. E tā’amu ’arapo’a tore ’ute’ute ’e te nīnamu tōna.
« E tā’amu ’arapo’a nehenehe », ’ua nā ’ō atu Brad, i te pārahira’a i pīha’i iho i teie tamāroa ’āpī. « E au ’oe i te hō’ē ’aito hōho’a teata ».
’Ua ’ata mai terā tamāroa.
’Ua ’ata ato’a atu ’o Brad. ’Aita ’oia e ’imi fa’ahou ra i te ta’ata ’eiā. Tē ’imi ra ’oia i te tahi mau hoa.