Te fa’a’ite rahi roa a’e nō te here o te Atua

Nā te peresideni M. Russell Ballard

Peresideni mono no te Pŭpŭ no te Tino Ahuru Ma Piti Aposetolo

Nō roto mai i te hō’ē a’ora’a i te ’āmuira’a rahi nō ’Ēperēra 1988.

Tē fa’a’ite nei te Atua i tōna here ia tātou nā roto i te hōro’ara’a mai i te arata’ira’a tei tītauhia nō tātou nō te haere i mua ’e nō te tāpae i tō tātou fāito pūai. ’O ’oia tei ’ite rahi roa a’e nō ni’a ia tātou, tō tātou fāito pūai, ’e tō tātou mau rāve’a mure ’ore, ’ua hōro’a mai ’oia i te tahi parau a’o ’e te tahi mau fa’auera’a hanahana i roto i tāna mau buka arata’i—te mau pāpa’ira’a mo’a. ’Ia māramarama tātou ’e ’ia pe’e ho’i i teie mau arata’ira’a, ’ei reira e noa’a ai te fā ’e te aura’a i tō tātou orara’a. E ha’api’i tātou ē, ’ua here tō tātou Hāmani ia tātou ’e ’ua hina’aro ho’i i tō tātou ’oa’oa. ’Ei fa’a’itera’a fāito ’ore nō tōna here ia tātou, ’ua tono mai ’oia i tāna Tamaiti fānau tahi, ’o Iesu Mesia.

« I aroha mai te Atua i tō te ao, ’e ’ua tae roa i te hōro’a mai i tāna Tamaiti fānau tahi, ’ia ’ore ’ia pohe te fa’aro’o iāna ra, ’ia roa’a rā te ora mure ’ore.

« ’Aore ho’i te Atua i tono mai i tāna Tamaiti i te ao nei e fa’ahapa mai i tō te ao, ’ia ora rā tō te ao iāna » (Ioane 3:16-17).

’Ua fānauhia Iesu i te tāhuti nei. ’Ua ora ’oia i te orara’a maita’i roa, ’e nā roto i te reira, ’ua tāpa’o ’oia i te ’ē’a nō tātou ’ia pe’e. ’Ua ha’api’i ’oia i tāna mau pipi : « ’O vau te māramarama o teie nei ao, ’o tē pe’e mai iā’u ra, e ’ore ïa e haere noa i te pōuri, e māramarama ora ïa tōna » (Ioane 8:12).

E ha’amata paha tātou i tē māramarama i te hōhonu o te here o te Mesia nō tātou i te taime e feruri tātou ē, ’ua ineine ’oia nō te ’aufau ’e nō te mamae nō tā tātou mau hara, « [nā] te reira mamae rahi i fa’atupu i roto [iāna], ’oia o te Atua, ’o tei hau a’e i te mau mea ato’a ra, i te rurutaina nō te māuiui, ’e ’ua tahe maira te toto nā te mau poa ato’a, ’e ’ua māuiui i te tino ’e te vārua ato’a ho’i » (Te Parau Ha’api’ira’a ’e te mau Parau Fafau 19:18).

I teie Pāsa, ha’amaita’i ana’e i te Atua nō te tāra’ehara ’e te ti’afa’ahoura’a o tāna Tamaiti here, ’o Iesu Mesia. Inaha, i roto iāna ’e maoti ’oia ’e nā roto iāna e ti’a ai i teie vaira’a poto i te tāhuti nei ’ia riro ’ei vaira’a tāmau ’e te maita’i roa, ’e ’aita e parau e nehenehe e fa’ahiti i tō tātou ’oa’oa.

Te ruperupe o te nātura, e hi’ora’a iti noa ïa nō tōna mana hanahana ’e tōna mau tāpa’o here. Noa atu rā, tē tīa’i noa mai ra te semeio rahi roa a’e o te mau semeio. E tupu te reira, nā roto i tōna mana, i te taime e ti’a mai tātou mai te pohe mai ’e te mēnema i roto i te hō’ē ao ’āpī e’ita roa e ma’iri, i reira tātou, mai te mea e vai ti’amā tātou, e ti’a ai iāna ra ’e i tō tātou Metua i te Ra’i a muri ’e a muri noa atu.