« Te reira mau ! »
Richard J. Anderson
Utah, Marite
Fa’ahōho’ara’a nā John Kachik
’Ua tae au i te fare i te maorora’a pō i te hō’ē pō tau to’eto’e, i muri mai i tā’u mau uiuira’a ’ei ’episekōpo. ’Ua rohirohi roa vau. ’A toru atura hepetoma te ’ohipa i te tītau rahi iā’u, ’e ’ua ’ume hope ato’a mai tā’u mau hōpoi’a ’utuāfare ’e i roto i te ’Ēkālesia iā’u.
I terā pō, tītauhia ’ia tātā’i i tō’u pere’o’o nō tē haere i te po’ipo’i a’e i te ’ohipa. ’A ’ō’omo ai au i te ’ahu ’ohipa, ’ua oti te ti’ara’a ’episekōpo, e hāmani pere’o’o i teienei. ’Ua tārava vau i ni’a i te tahua to’eto’e i raro a’e i tō’u pere’o’o, ’e ’ua ha’amata vau i te ’ohipa. Nō te aha pa’i e to’eto’e fa’ahou ai, e fa’arohirohi fa’ahou ai ’e e ha’amāuiui fa’ahou ai i tō’u nā rima, ’ua rohirohi roa ho’i i te ’ohipara’a i terā mahana. E’ita e nehenehe e fa’a’oroma’i fa’ahou, ’ua ha’amata vau i te hō’ē pure amuamu ’e te tāparu i te Metua i te Ao ra.
« E’ita ānei tā ’oe e nehenehe e tauturu ri’i mai ? » ’Ua nā ’ō atu vau. « Tē fa’aitoito noa nei au ’ia riro ’ei metua tāne maita’i ’e te tāne maita’i ’e te ’episekōpo maita’i ’e ’ia ora i te mau fa’auera’a. E’ita ānei au e tāvini maita’i atu ā ’āhani e māha tō’u rohirohi ? E tauturu mai na i te fa’aoti i teie ’ohipa ’ia haere au e ta’oto ».
I terā taime, e toru parau pāpū tei tae pāpū mai i tō’u ferurira’a : « Te reira mau ! »
« E aha ? » ’Ua pāhono atu vau.
’Ua tae fa’ahou mai terā parau : « Te reira mau ! »
I te torura’a o te taime ’ua tae fa’ahou mai terā nau parau « Te reira mau » ’ua ha’amata te māramarama i te fa’a’ī i tō’u ferurira’a ’e i tō’u ’ā’au. E poro’i tā teie nau parau i fa’atae i tō’u vārua. « Te reira », ’o te orara’a tāhuti ïa, ’e tē nā roto ra vau i te hō’ē taime tupura’a tei ’ōpuahia nō te tauturu iā’u ’ia riro i te mea tā te Metua i te Ao ra e hina’aro ’ia riro vau. Mai te mea ra ē tē nā ’ō mai ra te Vārua iā’u : « ’Ua mana’o ānei ’oe teie tere tāhuti ē ’aita e fifi ? » I te ti’ara’a vau i ni’a i terā tahua tīmā to’eto’e, e ’ere fa’ahou vau.
Tei te huru tātou e pāhono i te mau tāmatara’a, e nehenehe e hi’ohia ’ei tao’a hōro’a nō ’ō mai i te hō’ē Metua i te Ra’i here. Tē hōro’a nei ’oia i te rāve’a nō te fa’aruru i te mau tāmatara’a ’ia ti’a ia tātou ’ia fāriu i ni’a iāna. ’Ia nā reira tātou, e ha’amaita’ihia tātou i te ’ite ’e te tupura’a pae vārua.
’Ua ha’amaita’i terā nau ta’o e toru tei tae mai i roto i tō’u ferurira’a i terā pō to’eto’e ra i ni’a i te tahua tīmā o te fare vaira’a pere’o’o, ’ua hau i te 35 matahiti te maoro. ’Ua fa’aitoito vau e hi’o ē, ’eiaha e tāmatara’a e māu’a. Tē hi’o nei au i te mau tāmatara’a ’ei rāve’a nō te ha’api’i i te mau mea e’ita roa atu paha vau e ’apo mai i te tahi atu rāve’a.