’Ite i te hau nō ’outou ’e nō vetahi i roto i te mau taime ’ati

Nā Alex Hugie ’e Aspen Stander

Te mau ve’a a te ’Ēkālesia

E va’u rāve’a nō ’outou ’e nō vetahi ’ē nō te ’ite i te hau ’ia fifi te orara’a.

I te tahi taime, e fa’atāhuri te orara’a ’e e fa’a’āhure ho’i ia tātou. E mau māna’ona’ora’a ānei nō ni’a i te ’utuāfare, e mau fifi ma’i, ’e mau fifi ha’api’ira’a ’aore rā te tahi atu mau ’ohipa ’ārepurepu i roto i te ao i teie mahana. Nāhea e ’ite ai i te hau nō tātou i roto i te hō’ē ao ’ārepurepu ? Nō roto ānei te ’erera’a i te hau i te mau ’ohipa ’aita tā ’outou i reira ’aore rā nō roto mai i te mau mea e nehenehe tā ’outou e rave ’e e taui, teie te tahi ma’a mana’o nō te tauturu ia ’outou ’ia ’ite mai i te hau roto nā roto ia Iesu Mesia.

4 rāve’a nō te ’ite i te hau nō ’outou iho

Tūtonu i ni’a i te mau mea mure ’ore

E mea fifi ’ia ’ite i te hau i te taime e rōtahi ’outou i ni’a i te mau pe’ape’a i mua noa ia ’outou. ’Ia tūtonu rā ’outou i ni’a i te hōho’a rahi a’e, te fa’anahora’a ’oa’oa a te Atua, e ’ite mai ’outou i te hau nō te ’itera’a ē, te mau mea māuiui i teienei, e’ita ïa e vai noa ē a muri noa atu. ’Ei hi’ora’a, tē tauturu nei te hiero ia tātou ’ia tūtonu i ni’a i te tau mure ’ore. ’Ua parau te peresideni Gordon B. Hinckley (1910‑2008) ē, i roto i te hiero « e ’ite ai [’outou] i te hō’ē hau ’o te ’ore e ’itehia ia ’outou i te tahi atu vāhi ».¹
Vaiiho noa i te mea ’aita tā ’outou i reira

Mai te peu e ’ohipa e fa’a’ore i tō ’outou hau ’e ’aita tā ’outou i reira, e nehenehe iho ā e tupu te mana’o tapineva ’aore rā te riri. ’Aita rā e ’āpī ’ia fa’aea noa i ni’a i te mau mea e’ita tā ’outou e nehenehe e taui. E ha’afātata maoti i te Fa’aora nō te ’ite mai i te hau roto noa atu ā e ’ere te orara’a i te mea ’ōhie roa nō ’outou. ’Ua parau mai ’oia e tono mai ’oia i te Fa’aa’o, te Vārua Maita’i (hi’o Ioane 14:26–27).
Fa’a’ore i te hapa a vetahi ’ē

Pinepine te mea pa’ari roa a’e e ha’apae i te hiti, ’o te mana’o ’ino’ino ïa nō te hō’ē ta’ata tei hape i ni’a ia ’outou. ʼUa haʼapiʼi rā Elder Dieter F. Uchtdorff nō te pupu nō te Tino ’Ahuru Ma Piti ’āpōsetolo : « E fāri’i tātou i te ’oa’oa nō te fa’a’orera’a hara i roto i tō tātou orara’a, ’ia hia’ai tātou i te hōro’a i teie ’oa’oa ma te ho’o ’ore ia vetahi ’ē… ’Ei mau hope’ara’a, e fa’a’ī te Vārua o te Fatu i tō tātou vārua i te ’oa’oa ma te ’āpe’ehia mai e te hau hanahana o te ferurira’a (hi’o Mosia 4:2-3) ».² Nā roto i te fāriura’a i ni’a i te Fa’aora e ti’a ia ’outou ’ia ora mai i te teimaha pae manava ’e ’ia ’ī i te hau.
Tātarahapa ’e tūru’i i ni’a i te Mesia

Noa atu ā te mau ’ohipa maita’i i roto i tō ’outou orara’a, e riro noa te amora’a i te hōpoi’a nō te hara i te haru mai i te hau. I te tahi taime, tītauhia tō tātou ’episekōpo nō te tauturu ia tatou ia tātarahapa hope roa. Tītauhia rā ’ia tātarahapa pinepine tātou ’e, nā roto i te tāra’ehara a Iesu Mesia, e riro ’ei mea mā i te mau mea ato’a e tāpe’a nei ia tātou ’ia riro rahi atu ā mai iāna te huru.

4 rāve’a nō tē tauturu ia vetahi ’ē ’ia ’ite i te hau

Fa’a’ite atu i te ’evanelia a Iesu Mesia

Mai tā tātou e nehenehe e ’ite mai i te hau nā roto i te rōtahira’a i ni’a i te Fa’aora, e nehenehe tātou e fa’atoro atu ia vetahi ’ē iāna ra, ’oia te « fa’ati’a i te hau » (Mosia 15:18). ’Ei hi’ora’a, e tāmata i et fa’a’ite i te hō’ē ’īrava ’aore rā i te hō’ē fa’ahitira’a parau o te ’āmuira’a rahi, tei tauturu ia ’outou ’ia ha’api’i rahi atu ā nō ni’a ia Iesu Mesia.
Riro ’ei taʼata faʼatupu hau

E tauturu i tō ’outou mau hoa ’aore rā mau taea’e ’e mau tuahine ’ia fa’a’āfaro i te mau fifi. Mai te mau Aneti-Nephi-Lehi i roto i te buka a Alama, e ti’a ia tātou ’ia huna i tā tātou mau mauiha’a tama’i i raro i te repo—te mau mauiha’a mai te ’ōhumu, te ’imira’a ’ia tāho’o ’aore rā te pipiri—’e ’ia taui te reira i te mau mauiha’a nō te hau : te parau-au-ra’a, te ha’apa’ora’a i te mau fa’auera’a a te Atua ’e te fa’a’orera’a i te hapa a vetahi ’ē (hi’o Alama 24:19).
Riro ’ei ta’ata fa’aro’o i tei parauhia mai

I te tahi taime, ’ua hina’aro te ta’ata i roto i te fifi ’ia parau hua i te mau mana’o i tōna ferurira’a ’e i tōna ’ā’au nō te ’ore e tāpe’a noa i roto iāna. ’Aita i tītauhia nā tātou e fa’a’āfaro i tā rātou mau fifi, e nehenehe rā tā tātou e toro atu i te tari’a i tō rātou mau māna’ona’ora’a, ma te fa’a’ite atu i te here huru Mesia ’e te mana’o ’apo.
Tāvini i te feiā i roto i tā ’outou pāroita ’e te huira’atira

E nehenehe tā ’outou e tāpa’o i tō ’outou i’oa i te hō’ē ha’apūra’a feiā ’ōvere, e tāvini ’ei tauturu pīahi ’aore rā e ’āfa’i i te tahi ma’a monamona i te hō’ē ’utuāfare tei tae ’āpī mai i tō ’outou vāhi. Tauturu i te ta’ata ’ia ’ite mai i te hau i roto i te mau mea iti ha’iha’i. E nehenehe te fāna’ora’a i te hō’ē vāhi pāpū nō te tāmā’a ’e nō te ta’oto, te fāna’ora’a i te hō’ē a’o tauturu ’aore rā te hō’ē noa tāpa’o pāpū ē, e ta’ata terā e tāu’a nei, e fa’atupu i te maita’i pāpū.

’Ua parau Iesu i teie mau parau tāmāhanahanara’a i te mau ta’ata ato’a e fifi i te ’ite mai i te hau : « E hau tā’u e vaiiho ia ’outou nei : e ’ere mai tā tō te ao nei hōro’a tā’u hōro’a ia ’outou. ’Eiaha e taiā tō ’outou ’ā’au, ’eiaha ho’i e mata’u » (Ioane 14:27). Mai te mea e ha’afātata tātou ia tātou iho ’e ia vetahi ’ē ia Iesu Mesia ra, e nehenehe tātou e ’ite mai i te hau noa atu ā te fifi o te orara’a.