Ti’aturi i te fa’aorara’a a te Fa’aora
Nā te peresideni Henry B.Eyring
Tauturu piti i roto i te Peresidenira’a Mātāmua
Nō roto mai i te hō’ē a’ora’a, « The Power of Deliverance », i te hō’ē purera’a tei tupu i Brigham Young University i te 15 nō Tēnuare 2008.
Maoti te tāra’ehara ’e te ti’afa’ahoura’a o te Fa’aora e mana tōna nō te ha’apūai ia tātou i roto i tō tātou mau fifi ’aore rā nō te fa’aora ia tātou nā roto mai i te reira.
Ha’apāpūra’a nō roto mai i Nō teie ’ōpuara’a ho’i au, nā Yongsung Kim, hōro’ara’a nā Haven Light
Nō tātou tei mo’e te tahi ta’ata tei herehia, e au te ’ē’a i mua ia tātou ’ei mea ’oto ’e te mo’emo’e—’ua hau atu ïa nō te ta’ata ’aita tōna ’ite ’e tōna ’itera’a pāpū nō te tāra’ehara ’e te ti’afa’ahoura’a o te Fa’aora ia Iesu Mesia. Tē ha’amana’o ra ’outou i nā pipi fē’a’a i ni’a i te ’ē’a nō Emausa. ’Ua ha’afātata atu te Fatu tei ti’afa’ahou ia rāua ma te ani ē, e aha tā rāua e ’oto ra. Teie te pāhonora’a a Luka nō tātou :
« ’Ua parau atura rāua iāna, Ia Iesu i Nazareta ra, e peropheta mana ïa i te parau ’e te rāve’a, i mua i te aro o te Atua ’e te ta’ata ato’a ho’i.
« ’E tō tātou mau tahu’a rarahi ’e te mau ha’avā, i te tu’ura’a atu iāna ’ia fa’autu’ahia ’ia pohe, ’e ’ua fa’asatauro ho’i iāna.
« ’Āre’a mātou nei mana’o ïa mātou ē, ’o te ta’ata ïa e ora ai ’Īserā’ela nei » (Luka 24:19-21).
E noa’a ia tātou te tāmāhanahanara’a nā roto mai i tō tātou ’ite ’e tō tātou ’itera’a pāpū ē ’o ’oia i ora ai ’Īserā’ela. ’O ’oia i « ’ōfati [ai] te mau tāpe’a o te pohe » (Mosia 15:23). ’O ’oia tei « riro ’ei mātāmua nō te feiā i ma’iri i te ta’oto ra » (1 Korinetia 15:20). ’O ’oia tei ha’amatara i te mau fafaura’a o te hiero e tā’amu ia tātou ē a muri noa atu i te feiā « tei herehia na e [tātou] »1
I teie nei tau Pāsa, tē hina’aro nei au e fa’a’ite ia ’outou i te hō’ē tuha’a nō te hō’ē a’ora’a tā’u i hōro’a ma’a matahiti i teienei, nō ni’a i te mana fa’aorara’a o te Fa’aora. ’Ua ha’apūai te reira iā’u i tō’u fa’aineinera’a i te reira ’e tō’u hōro’ara’a i te reira. Tē pure nei au, ’ia ha’apūai te reira ia ’outou ’a tai’o ai au i te reira.
Tē vai nei te ta’ata e pohe ’oi’oi, ’e pohe rā tātou pā’āto’a i te hope’a. E tāmatahia tātou tāta’itahi i te fa’arurura’a i te pohe o te hō’ē ta’ata tei herehia e tātou.
I te tahi mahana ra, ’ua fārerei au i te hō’ē ta’ata ’a tahi ra māua i fārerei fa’ahou ai mai te pohera’a tāna vahine. Te fana’o, ’ua fārerei māua i te hō’ē vāhi au nō te tau fa’afa’aeara’a. ’Ua ’ata’ata ’oia ’a ha’afātata mai ai ’oia iā’u. Nō tō’u ha’amana’ora’a i te pohe o tāna vahine, ’ua aroha atu vau iāna ma te ha’apa’o maita’i i tā’u mau parau : « E aha tō ’oe huru ? »
’Ua ’ore atura te mata ’ata’ata, ’ua rarirari ri’i tōna mata ’e ’ua parau marū mai ra, ma te feruri : « E mea maita’i. E mea pa’ari roa rā ».
E mea pa’ari mau, mai tā ’outou i ’ite ’e mai tā tātou pā’āto’a e ’ite i te tahi taime. Te tuha’a fifi roa i roto i terā tāmatara’a, ’o te ’itera’a ïa e aha te rave i te ’oto, te mo’emo’e ’e te mihi tā tātou e fāri’i e au ra ē, ’ua mo’e hō’ē pae o tātou. E nehenehe te māuiui e ho’i noa mai. ’E nō vetahi, e nehenehe ato’a e tupu mai te mana’o riri ’e te mana’o nō te hō’ē ’ohipa ti’a ’ore.
’Ua ’ite te Fa’aora i tō tātou māuiui
Maoti te tāra’ehara ’e te ti’afa’ahoura’a o te Fa’aora e mana ai tōna nō te fa’aora ia tātou mai roto mai i terā huru tāmatara’a. Nā roto i te ’ohipa i tupu nōna, ’ua ’ite mai ’oia i tō tātou pā’āto’a mau māuiui. ’Ua ti’a ho’i iāna ’ia ’ite i te reira nā roto i te fa’aurura’a a te Vārua, ’ua mā’iti maoti rā ’oia e ’ite i te reira nā roto i te rāterera’a ’oia iho i te reira. Teie te fa’ati’ara’a :
« E inaha, nā Maria iāna e fānau i Ierusalema, tei te fenua o tō tātou ra mau tupuna; e paretenia ’oia ; ’e tē fāri’i maita’i ’e te mā’itihia ho’i ; ’o te tamari’ihia ’e e tō ho’i nā roto i te mana o te Vārua Maita’i, ’e e fānau mai i te hō’ē tamaiti, ’oia ho’i te Tamaiti a te Atua.
« ’E e haere atu ’oia ma te fa’a’oroma’i i te māuiui, ’e te ’ati, ’e te mau huru fa’ahemara’a ato’a ra ; ’e e nā reira ’oia ’ia fa’ati’ahia te parau tei nā ’ō mai ra ē, e rave ’oia i te māuiui ’e te mau ma’i o tāna mau ta’ata iāna iho.
« ’E e fa’a’oroma’i ’oia i tōna pohera’a, i tātara ai ’oia i te mau tāpe’a o te pohe i ru’uru’uhia ai tōna ra mau ta’ata ; ’e e rave ’oia i tō rātou paruparu i ni’a iāna iho ’ia fa’a’īhia tōna ra ’ā’au i te aroha i au i te tino, ’ia ’ite ’oia nā roto i te tino i te rāve’a e fa’aora ai i tōna mau ta’ata i tō rātou paruparura’a ra » (Alama 7:10-12).
Ha’apāpūra’a nō roto mai i Te pure a te Fatu, na Yongsung Kim, horo’ara’a nā Haven Light.
E tāmata te mau ta’ata ’ati a’e ia ’outou i te māramarama i tō ’outou māuiui ’ia pohe te hō’ē ta’ata herehia. E tupu ato’a paha tō rātou mana’o māuiui. ’Aita te Fa’aora i māramarama noa ’e i ’ite i te māuiui, ’ua ’ite ato’a rā ’oia i roto iāna i tō ’outou māuiui ’o tā ’outou noa e fāri’i ra. ’E ’ua ’ite maita’i roa ’oia ia ’outou. ’Ua ’ite ’oia i tō ’outou ’ā’au.
Tītau manihini i te Vārua Maita’i
E ti’a i te Fa’aora ’ia ’ite i roto i te mau mea tā ’outou e nehenehe e rave, e aha te mea maita’i roa a’e nō ’outou ’ia tītau manihini ’outou i te Vārua Maita’i nō te tāmāhanahana ’e nō te ha’amaita’i ia ’outou. E ’ite ’oia i hea te mea maita’i roa a’e nō ’outou ’ia ha’amata. I te tahi taime, ’o te pure ïa. I te tahi taime, ’o te haerera’a ïa e tāmāhanahana i te tahi ta’ata. ’Ua mātau vau i te hō’ē vahine ’ivi e ma’i ha’aparuparu tōna tei fa’auruhia e haere e fārerei i te tahi atu vahine ’ivi. ’Aita vau i reira, ’ua pāpū rā iā’u ē, ’ua fa’auru te Fatu i te hō’ē pipi ha’apa’o maita’i ’ia toro i te rima ia vetahi ’ē, ’e ’ua ti’a a’era iāna ’ia tauturu ia rāua to’opiti.
E rave rahi rāve’a tā te Fa’aora nō te tauturu i te feiā māuiui, e mau rāve’a tano maita’i nō rātou. E nehenehe rā tā ’outou e pāpū ē, e ti’a iāna ’e e rave ho’i ’oia i te reira ma te rāve’a maita’i roa a’e nō te feiā e māuiui ra ’e nō te feiā ’ati a’e ia rātou. Hō’ē mea e tupu tāmau noa ’ia fa’aora te Atua i tōna mau ta’ata i te māuiui, ’oia ho’i e putapū rātou i te ha’eha’a mai te tamari’i i mua iāna. Hō’ē hi’ora’a rahi nō te mana o te ha’eha’a ’e te ha’apa’o maita’i, nō roto mai i te orara’a o Ioba (hi’o Ioba 1:20-22). Te tahi fa’ahou mea e tupu tāmau noa, tei ’ite-ato’a-hia e Ioba, ’o te fa’aro’o tāmau ïa i te mana o te ti’afa’ahoura’a o te Fa’aora (hi’o Ioba 19:26).
E ti’afa’ahou tātou pā’āto’a, ’e tae noa atu te feiā herehia e ’outou ’o tei pohe. E ’ere tō tātou fārereira’a ’e ’o rātou i te ’ohipa feruri-noa-hia, e fārereira’a tino rā, e tino e’ita roa atu e pohe, e’ita e ruhiruhiāhia, e’ita e ma’ihia.
I te fāra’a te Fa’aora i tāna mau ’āpōsetolo i muri mai i tōna ti’afa’ahoura’a, ’aita ’oia i tāmarū noa ia rātou i tō rātou māuiui, ’o tātou pā’āto’a rā o te māuiui i te hō’ē mahana. Mai teie tāna tāmarū ia rātou ’e ia tātou nei :
« ’Ia ora na ’outou…
« ’A hi’o mai na i ta’u rima ’e ta’u ’āvae ; ’o vau mau ā ; ’a fāfā mai na ’ia ’ite ; ’aita ’o te vārua e ’i’o ’e te ivi mai tō’u nei, tā ’outou e hi’o mai nei » (Luka 24:36, 39).
E ti’a i te Fatu ’ia fa’auru ia tātou ’ia toro i te rima i te mana nō te fa’aorara’a i tō tātou mau māuiui, i te rāve’a maita’i roa a’e e tano nō tātou. E ti’a ia tātou ’ia mā’iti e tāvini ia vetahi ’ē nō te Fatu. E ti’a ia tātou ’ia fa’a’ite pāpū nō te Fa’aora, nō tāna ’evanelia, nō te fa’aho’i-fa’ahou-ra’a mai o tāna ’Ēkālesia ’e nō tōna ti’afa’ahoura’a. E ti’a ia tātou ’ia ha’apa’o i tāna mau fa’auera’a.
E tītau manihini te reira mau mā’itira’a ato’a i te Vārua Maita’i. Nā te Vārua Maita’i e nehenehe e tāmāhanahana ia tātou i te rāve’a e tano ia tātou. ’E nā roto i te fa’aurura’a a te Vārua, e roa’a ia tātou i te hō’ē ’itera’a pāpū nō te ti’afa’ahoura’a nā reira ato’a te hō’ē hi’ora’a nō te fārereira’a hanahana e tupu. ’Ua tae mai terā mana’o tāmāhanahana ’a hi’o ai au i te ’ōfa’i mēnema o te hō’ē ta’ata tā’u i mātau—e ta’ata tā’u i ’ite e rave fa’ahou vau iāna i roto i tō’u rima ananahi. Nō tō’u ’itera’a i te reira, ’ua fa’aorahia vau i te māuiui, e ’ere noa rā terā, ’ua ’ī ato’a vau i te mana’o ’oa’oa.
’Āhani i ora mai teie tamāhine iti i tōna pa’arira’a, e tītau ’oia i te fa’aorara’a nō te tahi ’ē atu mau tāmatara’a. E tāmatahia ’oia nō te vai ha’apa’o-maita’i-noa-ra’a i te Atua nā roto i te mau tāmatara’a pae tino ’e pae vārua e ma’iri i ni’a i te mau ta’ata ato’a. Noa atu ā e hāmanira’a fa’ahiahia roa te tino, e tāmatara’a nō tātou pā’āto’a te tāpe’a-noa-ra’a iāna ’ia tere maita’i. Tātou pā’āto’a e fifi i te ma’i ’e i te pa’arira’a te matahiti.
« ’Ia ha’eha’a noa ’oe »
’Ua ineine te mana nō te fa’aorara’a i tō tātou mau fifi. E ’ohipa te reira mai te fa’aorara’a ia tātou i te fifi nō te fa’arurura’a i te pohe o tei herehia. ’Aita teie fa’aorara’a e fa’aherehere noa i te ora o tei herehia, e ’ere ato’a paha te fa’aorara’a nō te tahi atu mau tāmatara’a i te tātarara’a ia rātou. E’ita paha te Fatu e ha’amāmā ia tātou ē tae roa e fa’atupu tātou i te fa’aro’o e hina’arohia nō te rave i te mau mā’itira’a e hōro’a mai i te mana nō te Tāra’ehara ’ia ’ohipa i roto i tō tātou orara’a. ’Aita ’oia e tītau nei i te reira nō tōna ’āhīhī ’ore ia tātou, nō tōna rā here ia tātou.
’Ua hōro’ahia te hō’ē parau arata’i nō te fāri’i i te mana fa’aorara’a a te Fatu i te mau pāto’ira’a o te orara’a, ia Thomas B. Marsh, i terā tau ’o ’oia te peresideni nō te pupu nō te Tino ’Ahuru Ma Piti ’āpōsetolo. Tei roto ’oia i te mau fifi rahi, ’e ’ua ’ite te Fatu e riro ’oia i tē fa’aruru i te mau mea rahi atu ā. Teie te parau a’o iāna ’o tā’u e rave nei nō’u ’e ’o tā’u e pūpū nei ia ’outou : « ’Ia vai ha’eha’a noa ’oe ; ’e nā te Fatu tō ’oe Atua e arata’i ia ’oe nā tō ’oe rima ra, ’e e hōro’a atu ia ’oe i te pāhonora’a i tā ’oe mau pure » (Te Parau Ha’api’ira’a ’e te mau Parau Fafau 112:10).
Ha’apāpūra’a nō roto mai i Te māmoe mo’e, na Yongsung Kim, horo’ara’a nā Haven Light.
’Ua hina’aro noa te Fatu ’ia arata’i ia tātou i te fa’aorara’a nā roto i te rirora’a tātou e mea parau-ti’a atu ā. E tītau te reira i te tātarahapara’a. ’E e tītau te reira i te ha’eha’a. Nō reira, e tītau noa te ’ē’a nō te fa’aorara’a i te ha’eha’a ’ia ti’a i te Fatu ’ia arata’i ia tātou nā te rima i te vāhi ’ua hina’aro ’oia e ’āfa’i ia tātou nā roto i tō tātou mau pe’ape’a ē tae atu ai i te ha’amo’ara’a.
E nehenehe te mau fifi e fa’atupu i te ’ino’ino ’e te mana’o paruparu. Te ha’eha’a e tītauhia ia ’outou ’e ’iā’u nei nō te arata’i te Fatu ia tātou nā te rima, e tae mai nā roto i te fa’aro’o. E tae mai nā roto mai i te fa’aro’o ē, tē ora mau nei te Atua, ’ua here ’oia ia tātou ’e te mea tāna i hina’aro—noa atu ā te pa’ari o te reira—nō tō tātou noa ïa maita’i.
’Ua fa’a’ite mai te Fa’aora i te reira ha’eha’a. ’Ua tai’o ’outou nāhea ’oia i te purera’a i roto i te ’ō nō Getesemane, ’a mamae ai ’oia i te hō’ē tāmatara’a nō tātou, tei ni’a atu i tō tātou ’aravihi ’ia māramarama ’aore rā ’ia fa’a’oroma’i, ’aore rā ’ia fa’a’ite atu, nō’u iho nei. Tē ha’amana’o ra ’outou i tāna pure : « E tāʼu Metua, ’ia tiʼa ia ʼoe ra, e hōpoi ʼē atu i teie nei ’āu’a ; ’ia tupu rā tō ʼoe hinaʼaro ʼeiaha tōʼu » (Luka 22:42).
’Ua ’ite ’oia ’e ’ua ti’aturi i tōna Metua i te Ao ra, te Elohima rahi ra. ’Ua ’ite ’oia ē, e mana hope tō tōna Metua ’e te hāmani maita’i hope roa. ’Ua ani te Tamaiti here ma te parau ha’eha’a—mai te hō’ē tamari’i ri’i—i te mana fa’aorara’a nō te tauturu iāna.
E fa’aitoito ’e ia māhanahana
’Aita te Metua i fa’aora i tāna Tamaiti nā roto i te tātarara’a i te fifi. Nō tō tātou maita’i, ’aita ’oia i nā reira, ’ua fa’ati’a rā ’oia ’ia fa’aoti te Fa’aora i te misiōni tāna e haere mai e rave. Nō reira, e nehenehe noa tātou e fa’aitoito ’e ’ia māhanahana i te ’itera’a i te tauturu tā te Metua i hōro’a mai :
« ’Ua fā mai ra te hō’ē melahi iāna.
« ’E nō te mea tē rahi noa ra tōna māuiui ’oto, ’ū’ana roa atura tāna pure, e mai te toto pūtua ra tōna hou i te ma’irira’a i raro i te repo ra.
« E ti’a mai ra ’oia i ni’a i tāna purera’a ra, e tae mai ra i te mau pipi ra, ro’ohia mai te ta’oto ana’e ra i te ’oto,
« ’Ua parau mai ra ia rātou, e aha ’outou i ta’oto ai ? ’A ti’a, ’a pure, ’a ro’ohia ’outou e te ’ati » (Luka 22:43-46).
’Ua pure te Fa’aora nō te fa’aorara’a. Te mea tei hōro’ahia iāna, e ’ere ïa te orara’a i te fifi, ’o te tāmāhanahanara’a rā e nava’i nō te haere atu nā roto ma te hanahana.
’Ua riro tāna fa’auera’a i tāna mau pipi, tei tāmata-ato’a-hia, ’ei arata’i nō tātou. E ti’a ia tātou ’ia fa’aoti e pe’e i te reira. E ti’a ia tātou ’ia fa’aoti e ti’a mai ’e ’ia pure ma te fa’aro’o rahi ’e te ha’eha’a rahi. ’E e ti’a ia tātou ’ia pe’e i te fa’auera’a tei tu’uhia i roto i te buka a Mareko : « ’A ti’a, mai haere tātou » (Mareko 14:42).
Nō reira mai, e parau a’o tā ’outou nō te manuia i te mau hi’opo’ara’a pae tino ’e pae vārua o te orara’a. E tītauhia te tauturu a te Atua i muri mai i tō ’outou ravera’a i te mau mea ato’a e ti’a ia ’outou ’ia rave nō ’outou iho. Nō reira, ’a ti’a ’e ’a haere, e tītau ’oi’oi rā i tāna tauturu, te ’oi’oi roa e noa’a ia ’outou, ma te tīa’i ’ore i te tau ’ati nō te ani i te fa’aorara’a.
Ma te tura rahi, tē hōro’a nei au i tō’u ’ite ē tē ora nei te Atua te Metua ’e ’ua here ’oia ia tātou. ’Ua ’ite au i te reira. E mea maita’i roa tāna fa’anahora’a ’oa’oa, ’e e fa’anahora’a nō te ’oa’oa. ’Ua ti’afa’ahou Iesu, mai ia tātou ’āraua’e. ’Ua mamae ’oia ’ia ti’a iāna ’ia tauturu ia tātou i roto i tō tātou mau fifi. ’Ua ’aufau ’oia i te ho’o nō tā tātou mau hara ato’a ’e nō te hara o te mau tamari’i ato’a a te Metua i te Ao ra, ’ia ti’a ia tātou ’ia fa’aorahia i te pohe ’e te hara.
’Ua ’ite au ē, i roto i te ’Ēkālesia a Iesu Mesia, e ti’a i te Vārua Maita’i ’ia haere mai e tāmāhanahana ia tātou ’e e tāmā ia tātou ’a pe’e ai tātou i te Fatu. ’Ia fāri’i ’outou i tāna tāmāhanahanara’a ’e tāna tauturu i roto i tō ’outou mau taime e hina’arohia, i roto i te mau tāmatara’a ato’a ’e te mau fifi o tō ’outou orara’a.