Reykjavík, ’Itirane

Ma te mou’a Esja i ni’a mai iāna, tē fāri’i pōpou nei te ’oire pū ruperupe nō ’Itirane, ’o Reykjavík, ’e tōna nūna’a motu tei te 1 000 maile (1 609 km) te ātea i te fenua Europa. I te matahiti 874 i muri iho i te Mesia, ’o te mau Vikings tei ha’amau nā mua ia rātou i Reykjavík, te pū nō te ta’ere, nō te ’imira’a faufa’a ’e nō te fa’aterera’a o ’Itirane, ’oia ato’a ho’i hō’ē o te mau ’oire mā roa a’e ’e te matie roa a’e ’e te ata’ata ’ore roa a’e o te ao nei.

E piti nā ta’ata ’Itirane tei bāpetizo-mātāmua-hia, tei te matahiti 1851 ïa i Dānemaka. ’Ua ho’i rāua i ’Itirane ’e i te matahiti 1853 ’ua ha’amauhia te ’āma’a mātāmua. I teie mahana, fātata e 300 melo ’Itirane i roto e toru amaa, ’āma’a, hō’ē i Reykjavík, hō’ē i Akureyri, ’e hō’ē i Sellfoss. Te hiero fātata roa a’e, tei Lonedona (Peretāne) ïa, e 1 177 maile (1 894 km) te ātea ia Reykjavík.

Noa atu ā ’aita te mau melo i rahi roa, tē tāmau noa nei te ’Ēkālesia i te tupu i te rahi. Noa atu te mau fifi nō te āteara’a, nō te ’īritira’a i te mau mātēria a te ’Ēkālesia, nō te reva pāpū ’ore ’e nō te ta’ere, ’ua parau te mau feiā fa’atere ē, ’ia tae i te hō’ē mahana, e riro mai ’Itirane ’ei mōrī nō te tahi atu mau fenua. ’Ua tere te peresideni Gordon B. Hinckley (1910-2008) i ’Itirane ’e ’ua fa’aha’amana’o ’oia i te mau melo ē, e « nūna’a ‘pūai ’e te mana rahi ’e te ’aravihi’ nō te rave i te mau mea rarahi » (« Wonderful to Have Sweet, Good Land », Church News, 21 nō Setepa 2002, 10).

’Ua ha’amauhia te misiōni nō ’Itirane i te matahiti 1894, ’ua fa’aea rā te porora’a ’evanelia i te matahiti 1914. ’Ua riro mai ’Itirane ’ei tuha’a nō te misiōni nō Danemaka Copenhague i te matahiti 1975.
I te matahiti 1977, ’ei melo nō te pupu mātāmua o te Hitu ’Ahuru i terā tau, ’ua ha’amo’a ti’a Elder Joseph B. Wirthlin (1917-2008) ia ’Itirane nō te porora’a ’evanelia.
I te matahiti 1981 ra, ’ua pūharahia te Buka a Moromona nā roto i te reo ’Itirane—e reo ’aita e paraparauhia nei i te tahi atu vāhi ’ē o te ao nei.