’Ia tarapape ana’e ’outou

I roto i te orara’a, tē vai nei te taime au ’e te au ’ore. I te tahi taime, ’ia au ’ore ana’e tātou, e uiui tō tātou mana’o e aha tā te Atua e rave ra—nō te aha te hō’ē Metua here e vaiiho ai i te reira ’ia tupu ? E nehenehe te reira uiuira’a e tae roa i te uira’a ē : « Tē ha’apa’o ra ānei te Atua iā’u iho nei ? »

I roto i te reira mau taime, ’ua ’ite au e mea faufa’a roa teie mau pāpa’ira’a mo’a :

• Salamo 8:4-5: « E aha te ta’ata nei i mana’o mai ai ’oe iāna ? « I raro iti a’e ’oia i te mau melahi i tē hāmanira’ahia e ’oe ra, ’e ’ua fa’akorona ’oe iāna i te hinuhinu ’e te tura ».

• Ioane 10:14: I roto i tōna orara’a i ni’a i te fenua nei, ’ua parau Iesu iāna iho ’ei « tīa’i māmoe maita’i » ’a nā ’ō ai : « ’Ua ’ite au i ta’u [māmoe] ».

• Mose 1:39: Hō’ē teie o tā’u mau ’īrava au roa a’e, i reira tō te Fatu heheura’a i tāna ’ōpuara’a i te peropheta Iosepha Semita : « Inaha, ’o teie ho’i ta’u ’ohipa ’e tō’u hanahana ho’i, ’ia fa’atupu i te tāhuti ’ore ’e te ora mure ’ore o te ta’ata nei »—nā roto i te reira tē tūra’i nei ’oia i tōna māna’ona’ora’a ia tātou ’ei ta’ata hō’ē.

• Luka 7:11-16: Ta’a ’ē noa atu te ha’api’ira’a o teie fa’ati’ara’a ē, e mana tō te Fa’aora i ni’a i te pohe—e fa’aha’amana’ora’a tano maita’i nō teie tau Pāsa—nō’u nei, ’o te hi’ora’a maita’i roa a’e ïa nō tōna ’ite-maita’i-ra’a ia tātou tāta’itahi. I roto i te mau semeio ato’a a Iesu, ’aita i rahi mai teie ’ā’amu te auma’i ’e te aumihi i tōna aupurura’a i te vahine ’ivi nō Naina. Mai tā’u i fa’a’ite i roto i tā’u parau ve’a (hi’o i te ’api 12), tē fa’a’ite nei teie fa’ati’ara’a i te māna’ona’ora’a o te Fa’aora ’e tōna here ho’i ia tātou tāta’itahi.

Keith Wilson

’Orometua rahi, Brigham Young University