E’ita te hō’ē mata’i rorofa’i e tāpe’a a’e ia tātou

Koraima Santiago de Jesus

San Juan, Puerto Rico

Nō ho’i noa mai au mai tā’u misiōni, ’ua fāri’i au i te hō’ē anira’a e haere i te hō’ē ’orira’a. I reira, ’ua mo’e tā’u niuniu ’e ’ua nā ’ō mai te tahi taure’are’a tamāroa e tauturu ’oia iā’u ’ia ’imi i te reira. I te paraparaura’a māua tō māua ïa ’itera’a ē, e misiōnare māua tei ho’i mai ’e ’ua paraparau haere māua nō e rave rahi mana’o ’e mau fā.

’Ua rahi roa mai tō māua aura’a ia māua ’e ’ua mōmo’ahia māua. Tō māua moemoeā, ’ia tā’atihia ïa māua i roto i te hiero nō Washington D.C. hou te reira e ’ōpani ai nō te tahi fa’a’āpīra’a i te ’āva’e Māti 2018. I te ravera’a rā māua i te reira fa’aotira’a, ’ua tāmatahia māua. ’A tahi, ’ua ’ere au i tā’u ’ohipa ’e ’aita tā’u e rāve’a nō te fa’aherehere i te moni nō tō māua tere i te hiero. Hau atu, tē haere mai ra te hō’ē mata’i rorofa’i ’e e tā’iri ’oia ia Puerto Rico nā mua noa a’e i tō māua fa’aipoipora’a.

I te tā’irira’a mai te mata’i rorofa’i Maria, ’ua ehu roa tō mātou motu iti. ’Ua tāpiri te mau fare toa. ’Ua ’ere mātou i te uira ; ’ua varavara te pape, te mā’a ’e te tahi ato’a mau tauiha’a ri’i. ’Ua ’ere māua i te mau mea ato’a tā māua i fa’anaho e fa’a’ohipa nō te ’ōro’a fa’aipoipora’a. Tītauhia ’ia fa’a’ore i te ’ōro’a fa’aipoipora’a, ’e e au ē, tītau-ato’a-hia ’ia fa’a’ore i tō māua fa’aipoipora’a. ’Ua tā’ōti’ahia te mau tere i Puerto Rico, ’e ’aita te ta’ata i ’ite e aha te maoro. ’Ua ha’amata tō’u mana’o e paruparu ’e ’ua ’ī roa vau i te fē’a’a ’e te ta’a ’ore.

I te hō’ē pō ’ua paraparau māua tō’u hoa tamāroa nō ni’a i tō māua vaira’a. ’Aita i pāpū te tere, ’e e riro ē ’aita tō māua e ’ōro’a ’e e ’aita e ’ahu fa’aipoipora’a, ’ua ha’apāpū mai rā te Vārua ē, tītauhia ia māua ’ia tu’u i tō māua ti’aturi i ni’a i te Fatu. Te ’ohipa faufa’a roa a’e, ’o te tā’ātira’a ïa i roto i te hiero. ’Ua pure māua i te Metua i te Ao ra nō te tauturu.

I te ha’amata-fa’ahou-ra’a te mau fa’arevara’a manureva mai Puerto Rico atu, tītauhia ’ia fa’anaho i te tere ’āpī nō māua ’e te tai’o mahana tā’atira’a ato’a. ’Aita tā māua e rāve’a nō te tāniuniu e rave rahi hepetoma i muri mai i te mata’i rorofa’i, ’āua’a a’e ra tē tere ra te niuniu ’āfa’ifa’i a te tahi hoa. ’Ua hōro’a mai ’oia nō te tāniuniu i te hiero. ’Ua ti’a atura ia māua ’ia fa’anaho fa’ahou ā i te mau mea ’ia tā’atihia māua ! Ma’a hepetoma hou tō māua tere, ’ua hōro’a mai te mau fēti’i ’e te mau hoa i te tahi tia’a ’e te ’ahu ’e ’ua tauturu ato’a mai ’ia noa’a e rave rahi mea nō te fa’aipoipora’a.

I te tomora’a māua i roto i te hiero, ’ua vaiiho māua i tō māua mau pe’ape’a i muri. ’Ua tāpe’a māua i tō māua rima nō te tomo i roto i tō māua ananahi. E ti’a mau iā’u ’ia parau ē, ’ua putapū vau i te rima o te Fatu i te arata’ira’a ’e i te ha’apāpūra’a ia māua ē, mai te mea ē e vai noa tō māua ti’aturi i ni’a iāna, e tupu maita’i te mau mea ato’a. I teienei, ’ua ha’amaita’ihia māua i te hō’ē tamaiti iti nehenehe ’e ’ua tā’atihia tō mātou ’utuāfare nō te tau mure ’ore.