Roro uira noa
Te mā’itira’a : ’Ei hō’ē anoihi ’aravihi ’aore rā ’ei hō’ē metua vahine maita’i a’e ?
’Ua parau te mau ta’ata ato’a iā’u ē ’aita e ti’a ’ia ’aravihi i te hō’ē noa taime. Te reira mau rā ānei ?
Tē ha’amana’o nei au ē ’ua huru ’ē roa vau i tō’u ha’api’ira’a mai i te fare ha’api’ira’a i te orara’a o te mau anoihi ’aravihi. E au ra te feiā tei ha’amana’o-maita’i-hia ’e te fa’ahiahia ’ua riro mai rātou ’ei mau anoihi ’aravihi ma te tāu’a ’ore i tō rātou ’utuāfare ’e te fa’atusiara’a i tō rātou ea i te pae ferurira’a. Tē pēni ra te mau anoihi ’aravihi i te po’ipo’i o te Noera ’a tātara ai tā rātou mau tamari’i i te mau tao’a hōro’a. Hō’ē ’ua fa’aipoipo e ono taime. Te tahi ’ua tāpūhia tōna tari’a ’e ’ua hāponohia i tei herehia e āna. ’E te tahi ’ua tāparahi pohe i te hō’ē ta’ata ! ’Ua ha’amata vau i te uiui iā’u iho e nehenehe ānei e riro ’ei anoiho ’aravihi ma te riro ato’a ’ei vahine fa’aipoipo ’e ’ei metua vahine fa’ahiahia (ma te tāpe’a noa i tō’u ea i te pae ferurira’a)
’Ua ha’api’i mai tā’u mau ’orometua fare ha’api’ira’a ē mai te mea e hina’aro mātou ’ia riro mau ’ei mea ’aravihi, e ti’a ’ia mātou ’ia rave i te fa’atusiara’a nō te reira. ’Ia ha’a pūai hau atu i te tahi. ’Ia tu’u nā mua roa i te anoihi i roto i tō mātou orara’a. Tē uiui pinepine nei tō’u vārua : « Tera rā mai te mea e ha’apa’o te anoihi i te mau fa’auera’a, e hōro’a i te ti’ara’a mātāmua i te mau ’ohipa mātāmua, ’e mai te peu e arata’i te Vārua o te Atua i tāna mau ’ohipa, ’aita ānei rātou e riro mai ’ei mea ’aravihi ’e penei a’e e mea ’aravihi atu ā ? » ’Ua vai noa teie uira’a iā’u ra i te roara’a o tā’u ha’api’ira’a.
I te taime ’ua fāri’i tā’u tāne fa’aipoipo ’e o vau i tā māua parau tū’ite, e hō’ē ïa matahiti tō māua fa’aipoipora’ahia. ʼUa haere mai o Elder Russel M Nelson (e melo ’oia nō te Pupu nō te Tino ʼAhuru ma Piti ʼāpōsetolo i te reira tau) e paraparau i tā mātou hōro’ara’a parau tū’ite. ’Ua tupu te hō’ē tāmā’ara’a, ’e e 16 ana’e pīahi tei ani manihinihia ’ia haere atu. E mea ta’a ’ē mau, ’ua mā’itihia māua tā’u tāne ’ia haere atu. I te mātarara’a te tāu’ara’a parau nā roto i te mau uira’a ’e te mau pāhonora’a. ’Ua ’āfa’i au tō’u rima i ni’a, ma te hi’o ’ia Elder Nelson i roto i te mata ’e te fa’a’itera’a i tō’u ha’ape’ape’a ’ia riro ’ei anoihi ’e ’ei metua vahine. ’Ua rohi itoito vau nō te pātu i tā’u mau tāleni i te fare ha’api’ira’a, ’e tē hina’aro nei au e tāmau ā i te rohi itoito ’e ’ia fa’ananea, ’ua ’ite ato’a rā vau ē e ti’ara’a mātāmua te rirora’a ’ei metua vahine. E rāve’a ānei nō te rave nā mea e piti ? ’Ua ’ana’ana nā mata o Elder Nelson ’a pāhono ai ’oia ē, « ’oia mau ! » ’Ua fa’aitoito ’oia iā’u ’ia fa’ananea i tā’u mau tāleni ’e ’ia pure i tō tātou Metua i te Ao ra ’ia tauturu mai iā’u ’ia ’ite nāhea vau ’ia rave i nā mea e piti ’e nā muri iho iāna, e nehenehe au e rave i te mau mea ’o tā’u i mana’o nā ’aita e tāpae. ’Ua tāpe’a mai au i te reira a’o.
Fafau i tāna mau fā.
E maha tamari’i tā māua i teienei. ’Ua ha’api’i mai māua i te ’ori ’e te ’apo’apora’a i te ti’ara’a metua. I te ha’amatara’a, e ’ōmua vau fātata i te mau mahana ato’a, i te hora 4 i te po’ipo’i, nō te pēni hou tā’u mau tamari’i e ara mai ai. ’Ua tāmata vau e pēni e ono mahana i te hepetoma, noa atu i te tahi mau mahana e 30 noa minuti. ’Ua ha’amata vau i tā’u pēnira’a tāta’itahi nā roto i te pure, ma te ’ite ē ’aita vau i ātea i te tauturu a te Fatu. ’Aita vau i pure noa ’ia maita’i a’e i roto i tā’u anoihi, nō te ’ite ato’a rā e aha te mea faufa’a a’e i te reira mahana ’e e fa’aoti ’ia rave nā mua i te reira mau fā. ’Aita te nu’ura’a i mua i tae ’oi’oi mai, e mea tanotano rā.
Te nu’ura’a vitiviti e 12 matahiti ’ia tai’ohia i te mahana i roa’a ai tā’u parau tū’ite. ’Ua fāri’i au i te hō’ē taime tarapapera’a. E au ra ’ua ’ī roa te orara’a. ’Ua fifi hau atu te ti’ara’a metua vahine mai tei ’ore i mana’ohia. ’Ua pārahi au i mua i tā’u hōho’a pēni ma te ta’i, ma te uiui ē e riro mau ānei au ’ei anoihi ’aravihi mai tā’u i moemoeā noa nā. ’Ua māere au iā’u iho i te tātarara’a mai tā’u buka ’ā’amu i te pa’epa’e ’e ’ua huri au i te vāhi nō te 30 nō ’Ēperēra 2006, te mahana i muri iho i tō’u fāri’ira’a tā’u parau tū’ite. ’Ua mo’e-roa-hia iā’u tō’u ’itera’a fa’ahiahia e te peresideni Nelson ! Nō te hō’ē tumu ’aore rā nō te tahi, ’ua fātata roa te ’ōhura’a o te orara’a i te tūmā i te reira i roto i tō’u ferurira’a. Tē vai nei i mua iā’u te mau parau a te peropheta i teie mahana, « ’oia mau ! ». ’Ua fa’ahuru ’ē te mau roi mata ’ei mau ha’amāuruurura’a ’a hi’o ai au i muri i te mau mea tā’u i fa’aoti mai te reira mai ā tau, ’e tē vai ato’a rā tō’u ti’aturira’a nō ananahi.
Rave i te mea ’aita e nehenehe e rave
Tau ’āva’e i muri mai, ’ua niuniu mai te hō’ē pāpa’i hōho’a nō te ve’a Ensign iā’u, nō te ani mai e nehenehe ānei iāna e fa’a’ohipa i te hō’ē o tā’u mau hōho’a pēni ’ei tāpo’i roto nō te ve’a o te ’āmuira’a rahi nō Nōvema 2018. ’Ua māere roa vau ! I te pa’arira’a mai, te ’ohipa mātāmua tā’u i rave noa ’ia ho’ohia mai te mau ve’a a te ’Ēkālesia, o te hi’ohi’ora’a ïa nō te ’ite mai i te mau hōho’a pēni. I teienei, tē vai ra hō’ē o tā’u hōho’a pēni ! I muri iho, i tōna paraura’a mai e hina’aro rātou e tū’ati i tā’u hōho’a pēni i te mau parau a te peresideni Nelson, ’ua nehenehe iā’u ’ia ’ite i te rima o te Atua i te fa’aitoitora’a mai iā’u.
E mea ātea ā tō’u tere anoihi, ’ua māuruuru rahi rā vau nō te ti’aturira’a a te peresideni Nelson i te Fatu ’e ia tātou. ’Ua māuruuru vau nō tōna mana’o maita’i ’e tōna ti’aturi. ’Ua ’ite au ē mai te mea e fa’a’ohipa tātou i tō tātou fa’aro’o i te Fatu, e nehenehe tātou e rave i te mau mea rarahi, ’oia ato’a te mau mea tā tātou i mana’o ’aita e nehenehe. « ʼAore roa hoʼi e mea e ʼore e tiʼa i te Atua » (Luka 1:37).