E ’ite fa’ahou vau iāna

Nā Reyna I. Aburto

Tauturu piti i roto i te peresidenira’a rahi nō te Sōtaiete Tauturu

’Ua pa’ari au i Nicaragua. I tō’u na’ina’ira’a, e nā muri noa vau i tō’u tua’ane. Māua tē haere nā raro i te ha’api’ira’a. Māua tē haere i te fare toa. E ha’uti noa māua i roto i te ’āua i muri mai i tō mātou fare. E mea ’oa’oa māua.

Terā rā, i te ivara’a o tō’u matahiti, ’ua tupu te tahi ’ohipa ’oto. ’Ua pohe tō’u taea’e i roto i te hō’ē ’āueuera’a fenua. I te ha’amatara’a ’aita vau i ’apo roa ē ’ua reva ’oia. ’Ua feruri noa vau ē, e pātōtō mai ’oia i te ’ūputa o tō mātou fare. ’E e parau mai ’oia ē, mea nā te tahi vāhi mai ’oia. E hi’o noa vau i te ’ūputa ma te tīa’i i te reira ’ia tupu. ’Ua hina’aro roa ho’i vau e ’ite fa’ahou ā iāna.

I muri a’era, ’ua ’ōhie ri’i mai. Tē mihi noa ra vau i tō’u tua’ane, e tae rā iā’u ’ia ’oa’ao.

I terā ra tau, e ’ere vau i te melo nō Te ’Ēkālesia a Iesu Mesia i te Feiā Mo’a i te mau Mahana Hope’a Nei. I te pa’arira’a vau, ’ua ha’api’i au nō ni’a i te ’Ēkālesia ’e ’ua bāpetizohia vau. Hō’ē mahana, tē hōroi ra vau i te ’āu’a. E tau Pāsa terā taime. Tē feruri ra vau i te Tī’afa’ahoura’a ’e ’ua mana’o vau i tō’u tua’ane.

Tae mai nei te hō’ē mana’o i ni’a iā’u. ’Ua ha’amana’o vau i te hō’ē moemoeā tō’u i te ao, nō tō’u tua’ane. ’Ua feruri atura vau ē, e ’ere roa atu te reira i te ’ohipa ma’ama’a. Nō ō mai i te Vārua Maita’i, nō te tāmāhanahana iā’u ’e nō te arata’i iā’u. ’Ia tae i te hō’ē mahana, e ti’a pāpū fa’ahou mai tō’u tua’ane. ’E e ’ite fa’ahou mau ā vau iāna.

Mai te mea ’ua pohe te tahi ta’ata tā ’outou i here, e nehenehe e mihi iāna ’e e ’oto. E paraparau i tō ’outou ’utuāfare ’aore rā i te hō’ē ta’ata pa’ari ’ia ineine ’outou. E pure i te Metua i te Ao ra nō ni’a i tō ’outou mana’o. E ti’a iāna ’ia tauturu ia ’outou ’ia fāri’i i te mana’o hau.

Ta’a ’ē noa atu te ’ohipa, e ha’amana’o ra ē, ’ua here Iesu Mesia ia ’outou. I te Pāsa e ha’amana’o tātou i tāna tūsia nō tātou. Maoti ’oia, e ti’afa’ahou mai tātou pā’āto’a ’e e ti’a ia tātou ’ia ora fa’ahou ā e tō tātou ’utuāfare.

Mau tāreta tāmāhanahana

Tāpūpū i teie mau tāreta. E nehenehe e tūfetu nā rōpū ’aore rā e fa’a’ohipa ’ei tāpa’o tai’ora’a. Tāpe’a noa i roto i tā ’outou mau pāpa’ira’a mo’a ’aore rā i te hō’ē vāhi e hi’o atu ’outou i te taime e tae mai te mana’o ’oto ’e te ’ōtahi ’e te mata’u.

« E’ita vau e vaiiho ’ōtare noa ia ’outou, e ho’i mai ā vau ia ’outou nei ».

Ioane 14:18

« ’E nā te Atua e hōroi i tō rātou roimata ato’a ».

Apokalupo 21:4

« ’Ia ’oa’oa, ’e ’eiaha e mata’u, nō te mea tei pīha’i iho ïa vau, ’o te Fatu, ia ’outou na, ’e e ti’a noa ho’i i pīha’i iho ia ’outou na ».

Te Parau Ha’api’ira’a ’e te mau Parau Fafau 68:6