E tītaura’a manihini nō Ricardo

Martin Apolo Cordova

Paraná, Beresiria

’Ia fa’aro’o vau tē vai ra te hō’ē fa’a’oa’oara’a i te ’Ēkālesia, e ani tāmau vau e 10 ta’ata e ’ere i te melo nō te ’Ēkālesia ’ia haere mai. E rave rahi matahiti tō’u ravera’a i te reira. E hāmani au i te mau tītaura’a manihini ’e e tu’u vau i te reira i roto i te vehi rata ’uo’uo ’e e pure au ’ia arata’i mai te Vārua iā’u. ’Ei reira, e hōro’a vau i te mau tītaura’a manihini. E mea varavara te 10 e tae mai, hō’ē a’e e tae mai, e mana’o manuia tō’u.

E rave rahi matahiti i ma’iri, ’ua fa’aineine au i te mau tītaura’a manihini nō te hō’ē purera’a pae auahi nō te mau ta’ata fa’aipoipo. E iva tā’u i hōro’a i te ’ohipa, hō’ē terā e toe ra. ’Aita vau i ’ite e hōro’a ia vai ra. Tau minuti i muri mai, tē haere mai ra ’o Ricardo, e ta’ata ho’oho’o, nā pīha’i iho iā’u. ’Ua tae mai te fa’aurura’a e ani iāna, noa atu ā pa’i ’ua pāto’i ’oia i te anira’a a te hō’ē hoa ’ohipa ’ia haere i te hō’ē ’ōro’a i tāna purera’a. ’Aita vau i mana’o e ’ana’anatae ’o Ricardo.

Noa atu rā i tōna haere-fa’ahou-ra’a mai nā pīha’i iho iā’u nō te haere i rāpae, ’ua tae fa’ahou mai te fa’aurura’a. ’Ua vitiviti roa rā ’oia i te haerera’a i rāpae ’aita i roa’a iā’u ’ia paraparau atu iāna. ’Ua pure au ’ia ho’i mai Ricardo mai te peu nāna te tītaura’a manihini e hōro’a atu.

I te otira’a tā’u pure, ’ua ho’i mai Ricardo nō te ui mai i te hō’ē uira’a. I muri iho, ’ua nā ’ō atu vau : « E Ricardo, tē fa’atupu ra tā’u ’ēkālesia i te hō’ē ’ohipa nō te mau ta’ata fa’aipoipo. E paraparau mātou nāhea i te ora ma te ’oa’oa i te mahana tāta’itahi. I muri mai e fa’atupuhia te hō’ē ’orira’a. « Mai te mea e ani au ia ’oe ’ia haere mai, e haere mai ’oe ? »

« ’Pāpū roa ! » Tā Ricardo ïa i parau mai, ’aita rā vau i ti’aturi maita’i i tāna pāhonora’a.

’Ua mana’o rā vau ē : « ’Ua rave au i tā’u tuha’a ».

’Ua tae ’oi’oi māua tā’u vahine i te fa’a’oa’oara’a nō te fāri’i i te mau ta’ata e tae mai. I reira iho, ’ua ’ite au ia Ricardo ’e tāna vahine, ’o Regina. ’Ua fa’a’ite au ia rāua i ta’u vahine ’e i te tahi mau feiā i haere mai. I te roara’a o te ’āru’i, e au ē, ’ua au maita’i o Ricardo ’e o Regina. ’Ua māere roa vau i te paraura’a mai rāua e haere mai rāua i te purera’a sābati nō te ha’api’i rahi atu ā.

’Ua ha’api’i rahi mau ’o Ricardo, o Regina, ’e tā rāua e piti tamari’i. I te hope’a, ’ua tomo mai rātou i roto i te ’Ēkālesia. I muri a’e, ’ua tā’atihia rātou i roto i te hiero. I te hō’ē mahana, ’ua parau mai Ricardo ē, tē paraparau ra rāua tāna vahine nō te fa’ata’a ia rāua ’e ’ua arata’i a’era te Fatu ia Ricardo i ta’u piha tōro’a.

I terā taime ’ua ani au i te Atua ’ia fa’a’ore mai i tā’u hapa i te mana’ora’a ē, e’ita ’o Ricardo e fāri’i i tā’u anira’a. ’Ua ’apo mai au ē, e mea faufa’a rahi ’ia tītau manihini i te mau ta’ata. E’ita tātou e ’ite ’o vai tē fāri’i.