Lokol Pej
Fas Jeneresen Memba
Faswan long wan histri blong fet mo membasip insaed long Jos blong Jisas Kraes blong Ol Lata-dei Sent
Mi mi bin bon long Lenakel, Wes Tanna, Vanuatu long 1987. Papa mo mama blong mi, oli memba blong Jos blong Asembli blong God, mo papa blong mi, i bin wan lida blong jos blong olgeta long tetaem ia.
Papa mo brata blong mi, Sano, tufala nao faswan blong mitim ol misinari. From se hem i lida long wan nara jos, papa blong mi i no wantem long fas ples, be yangfala brata blong mi, we i bin gat 14 yia long tetaem ia, i gohed mo i putum apoenmen wetem ol misinari blong oli kam long haos blong mifala mo tijim famli blong mifala.
Afta long fasfala lesen abaot restoresen blong gospel, mi bin akseptem jalenj ia blong ridim mo prea from Buk blong Momon. Mi bin save se i tru.
I bin had long fas taem, be, wetem taem, papa blong mi i givim raet long mi, mo mi bin kasem baptaes long 27 Maj 2005. Mi mi faswan long famli blong mifala blong joenem Jos. Sista blong mi, Meri, i folem mi, mo i baptaes long namba 1 Mei 2005. Sikis manis afta, haf blong famli blong mi i joen i kam.
Blong stap wet blong papa blong mi i givim raet blong mi kasem baptaes, i bin had tumas long mi. Mi filim olsem se evri samting i agensem mi. Mi bin prea mo ridim ol skripja blong mi tu taem long wan dei, mo mi save se, sapos mi mekem hemia, bae mi gat blesing. Papa blong mi i glad tumas long fet blong mi mo fasin blong mi blong stap strong, we i tekem gospel i kam insaed long famli blong mi.
Mi mi faswan blong mekem plante samting insaed long famli blong mi, mo insaed long branj blong mi. Mi faswan insaed long famli blong mi blong go long wan misin; mi bin go mekem seves long Oklan, Niu Silan misin. Mi mi faswan tu, insaed long branj blong mi, blong oli singaotem i go long wan fultaem misin. Sista blong mi i folem mi, mo brata blong mi; tufala i gi long misin afta we mi mi kambak hom.
Mi bin go long BYU Hawae olsem wan memba blong I-WORK Program, mo mi bin stadi long politik saens blong fo yia. Blong trifala yia we mi bin stap longwe, mi miwan nomo, mi bin wan studen we i stap long BYU Hawae, we mi mi blong Vanuatu. Taem mi stap longwe yet, mi finisim wan intansip blong sikis manis wetem Yunaeted Nesen long Niu Yok Siti, mo mi bin save mit wetem ol top pipol we oli stap mekem polisi long wol.
Afta we mi graduet, mi kambak long Vanuatu, blong mi helpem ol pipol blong mi, mo Jos blong mi. Mi bin luk plante blesing tumas i kam insaed long laef blong mi tru long gospel, mo mi bin wantem blong helpem ol narawan blong oli faenem semfala sakses. Tu yia i pas, mi bin go long Fiji mo faenem wan gudfala man blong Fiji. Mitufala i mared long 10 Jun 2016 long Fiji, mo afta, mitufala i muv i gobak long Vanuatu. Mitufala i gat tu pikinini: Peni Hathviliasis Tikoisuva mo Belarin Nalam Tikoisuva.
Laef blong mi i gat fulap blesing. Mi save se evri gudfala samting ia we oli bin hapen long laef blong mi, oli ol blesing we oli kam long Papa long Heven. Hem i stap oltaem, i stap blesem yumi folem hamas yumi stap obei long olgeta komanmen mo folem hamas wok yumi stap mekem wok blong Hem. Hasban blong mi mo mi, naoia mitufala i holem wok insaed long Tanna Distrik, mo mitufala i traem blong mekem gud ol koling blong Jos blong mitufala. Hasban blong mi i fas kaonsela long branj presidensi, mo tu, hem i asisten klak blong Tanna distrik, mo wan indipenden laef speselis. Mifala i stap wokbaot wetem ol fultaem misinari blong mifala insaed long eria blong mifala blong faenem ol pipol blong tijim gospel blong Jisas Kraes.
Hem i isi oltaem blong kam fas wan. Mi no gat ol brata o sista, o papa o mama o famli o bubu we oli bin go long ol misin, o oli bin stap insaed long Jos. Mi no bin gat ol testemoni blong olgeta blong mi hang long olgeta blong mi save gat wan blong miwan. Mi hop se hasban blong mi mo mi i save stap olsem stamba blong fet long ol fiuja jeneresen blong mitufala, mo bae fet mo seves blong mitufala bae i stat blong wan histri blong fet mo membasip insaed long gudfala Jos ia.
Oltaem nomo bambae mi talem tangkyu from mi mi wan memba blong Jos blong Jisas Kraes blong Ol Lata dei Sent. Mi save se yumi gat wan profet we i stap laef, we God i singaotem hem blong lidim yumi long ol las dei ia. Mi save se Buk blong Momon i wan narafala testeman blong Jisas Kraes.