Lokol Pej
Stap Helpem Ol Yangfala Ni-Vanuatu blong Oli Gat Sakses long Skul mo long Laef
Sam lida blong Jos blong Jisas Kraes blong Ol Lata-dei Sent, Elda Ian S. Ardern, Sista Bonnie H. Cordon mo Sista Joy D. Jones oli bin visitim wan ekstra klas blong Inglis mo Matematik we Jos i stap ranem long Port Vila, Vanuatu, long Tiusdei 13 Novemba 2018.
Oli bin luk long ae blong olgeta, olsem wanem oli mekem ol klas ia.
Ol visit lida ia oli sapraes wetem spid we ol matematik studen oli bin save mekem ol bigfala matematik problem.
Elda mo Sista Collette, we tufala i blong Albuquerque, Meksiko long YSA, oli jes aot afta we oli bin spendem 18 manis misin long Jos. Tufala i bin tijim ol ekstra klas ia.
Elda Collette i bin eksplenem long ol visita olsem wanem oli wok kolosap wetem skul kurikulom, mo traem blong tijim sam samting bifo oli lanem long klas long skul. “Hemia i help blong mekem ol studen oli gat tras long olgetawan,” hem i talem.
Hem i leftemap tingting blong ol pikinini we oli bin faenem ansa blong ol problem blong matematik long klas, blong oli faenem wan nara pikinini mo helpem olgeta blong oli andastanem olsem wanem oli kasem ansa—hem i wan kaen fren stadi sistem.
Matematik klas i wan klas we i laef mo ol studen oli naes be oli save kompit tu. Tufala Collette i lukluk long ol pikinini ia mo givim olgeta ol helti lokol frut afta long klas. Ful eksperiens ia i mekem se, blong lanem samting, i wan gudfala samting.
Stat long taem we oli statem program ia, i bin gat bigfala jenis long ol mak long skul, mo i gat moa pikinini oli pasem eksam blong olgeta wetem ol gudfala mak.
Elda Ardern, we hemwan i wan foma prinsipol blong hae skul, i givim ol gudfala toktok afta hemia blong Sista Cordon mo Sista Jones, mo i eksplenem olsem wanem blong kasem wan gudfala edukesen i impoten—be, blong kasem edukesen long saed blong spirit, mo tu, long saed blong skul blong wol ia.
Sista Collette i talem: “Blong pat long wok ia, hem i givim gudfala praes long mi. Oli no fosem ol pikinini blong kam long ekstra klas ia, be tu taem long wan wik, oli kam blong wan aoa. Mi kam blong lavem ol pikinini ia olsem se oli stret pikinini blong mi. !Oli laekem tumas blong lanem samting!”
Olgeta we oli tekem ples blong Elda mo Sista Collette, oli ol lokol volontia blong Jos we bae oli wok blong gohed blong helpem olgeta smat maen ia blong kipim spid wetem skul kurikulom blong olgeta.