Savali faaleautaitai i le eria
Auaunaga i Vaitau Taitasi
Ua toe oo mai foi i o tatou luga le vaitau o le Kerisimasi. O mea feilafi ma moli emoemo ua faatumulia ai luga o laau lanumeamata, ua tumu le ea i pesepesega, ua tutumu faleoloa laiti ma faleoloa tetele i tagata e foliga mai o loo fiafia i mea o latou faamoemoe atu i ai i se Aso Kerisimasi olioli. O aso ia e faia ai manatuaga ma o lea sa ou tu ai e manatunatu po o a ni manatuaga o le a ou fesoasoani e faia mo i latou o siomiaina a’u. E tatau lava ona sili atu nai lo se meataalo uga, se ofutino fou, se tusi faitau mataina po o se meaai e fiafia i ai. O manatuaga tumau o [manatuaga] ia e pai atu i lou agaga ma agaga o isi.
I a’u faigamalaga i le Pasefika atoa, na ou lagona ai e taumafai le toatele ia faia aso uma o se Aso Kerisimasi. Ou te vaai i tagata o le Ekalesia o e faaopoopoina le olioli i olaga o isi ao latou auauna atu ia i latou i se auala sili ona maualuga ma sili ona paia. Ua kukaina meaai, moaina le vao, uuina ia lima, ma tuuina atu ni faamautinoaga ma faapea ona faamanuiaina ai olaga. I lenei vaitau o auaunaga, e manaia le toe tomanatu i le fautuaga a Elder Dieter F. Uchtdorf o le na aoao mai ia i tatou ni mataupu faavae faigofie e uiga i le auauna atu i isi i vaitau taitasi. O mataupu faavae nei e lima na i ai se aafiaga ia te a’u:
1. Aoao e uiga ia i latou e te auauna atu i ai.
Na aoao mai Peresitene Ezra Taft Benson, “E le mafai ona e auauna lelei atu ia i latou e te le iloaina lelei.” Afai e te lei iloaina i latou ua tofia oe e te auauna atu i ai, o le vaitau tonu lava lenei. Afai e te manatu ua e iloaina lelei i latou, ia naunau ina ia iloa lelei atili atu i latou.
2. Faaalu faatasi se taimi.
O se mafutaga e alu ai se taimi e atiina ae o lea ia asiasi soo atu ia i latou ua tofia oe e te auauna i ai. Faaaoga soo se auala e talafeagai—e pei o se imeli, Facebook, Instagram, Twitter, Skype, valaau i le telefoni, po o le auina atu o se kata e faafesootai ai. O fesootaiga patino e le manaomia ona uumi, ae e manaomia ona faamaoni.
3. Fesootai atu ma le alofa.
O le fausiaina o fesootaiga anoa e manaomia ai le fefaasoaai o lagona, talitonuga, sini, ma popolega. O le fefaasoaai o gaoioiga o aso taitasi ma luitau o le olaga ma le tasi ma le isi e pei ona taitaiina ai e le Agaga, tatou te maua ai le talisapaiaina mo le tasi ma le isi.
4. O le faalogo o se vaega taua tele o le fesootai atu e te alofa.
A e faalogo ma le totoa, o le a faateleina ou avanoa e fesoasoani atu ai i isi ia o mai ia Keriso. Ao e mauaina le malamalama ma se vaaiga i o latou manaoga o le a latou lagonaina le alofagia, malamalama, ma le saogalemu.
5. Auauna Atu
A lagona e i latou tatou te auauna atu i ai lo tatou alofofa faamaoni e ala atu ia tatou faatinoga o le auaunaga, e mafai ona faamaluluina loto ma faateleina le alofa ma le faatuatuaina. E maeu lo’u agaga faafetai mo na faatinoga laiti o le auaunaga lea na faia mo a’u. Atonu e foliga laiti i le e foai, i le avea ai ma tagata e taliaina sa musuia ma faamalosia ai a’u. Ao avatua e a tatou auaunaga isi i sauniga o le perisitua, tatou te faamanuiaina o latou olaga.
I le Mataio mataupu 25 tatou te faitau ai:
“Ona fai atu ai lea o le Tupu i e o i lona itu taumatau, O mai ia, o outou ua faamanuiaina e lo’u Tama, ia fai mo outou tofi le malo ua saunia mo outou a o lei faavaeina le lalolagi:
“Aua na ou fia’ai, ona outou avane ai lea ni mea ou te ‘ai ai; na ou fia inu, ona outou avane ai lea ni vai ou te inu ai; sa fai a’u ma tagata ese, ona outou talia lea o a’u:
“Na ou le lavalavā, ona outou faaofuina lea o a’u; na ou ma’i, ona outou asiasia mai lea o a’u; na ou i le fale puipui, ona outou o ane ai lea ia te a’u.
“Ona tali mai ai lea ia te ia o e amiotonu, e faapea mai, Le Alii e, o anafea na matou iloa ai oe ua fia’ai, ma matou fagaina oe? Po o fia inu, ma matou avane e te inu ai?
“O anafea foi na matou iloa ai oe o le tagata ese, ma matou talia oe: o le le lavalavā, ma matou faaofuina oe?
“O anafea foi na matou iloa ai oe ua ma’i, po o i le fale puipui, ma matou o atu ai ia te oe?
“Ona tali atu ai lea o le Tupu, e faapea atu ia te i latou, E moni, ou te fai atu ia te outou, aua na faia e outou i le tasi o e aupito itiiti o o’u uso nei, o a’u lea na outou faia i ai” (Mataio 25:34–40).
O la’u tatalo i lenei vaitau fiafia e faapea ina ia faamanatu mai ia i tatou a o tatou vaavaai solo uma atu, e tofu uma lava i tatou ma manaoga ma o le tele o na manaoga o le a tauia ao avea i tatou ma auauna faamaoni i isi. E moni lava o le tuuina atu o i tatou lava o se lesona maoae lea a lo tatou Faaola i lenei vaitau o le Kerisimasi aua na Ia tuuina mai Lona ola ina ia tatou maua ai le ola e faavavau.
Manuia le Kerisimasi i tagata uma.