Faamanatuina o le Kerisimasi i le Salafa o le Pasefika

I le eria atoa o le Pasefika, ua maua e tagata o Le Ekalesia a Iesu Keriso o le Au Paia o Aso e Gata Ai ni auala tulaga ese ma musuia e aumai faatotonugalemu ai Keriso i le faamanatuina o a latou Kerisimasi.

O nisi nei o a latou tala.

“Faamalamalama Le Lalolagi”

Waireka Collings

O tu ma aga masani ua matou amatalia i lo matou aiga na maua mai i le polokalama o le “Faamalamalama le Lalolagi”.

I le tausaga muamua, sa matou auai ai ona na faalogoina e malie. Sa matou manatu faapea, “ia tatou o e faataitai pe faapeī.”

Na amata ona ou fuafuaina ni mea laiti e mafai ona matou faia ina ia

1. Auauna atu ai i o matou tuaoi ma i latou o siomiaina i matou.

2. Faia le Kerisimasi ma mea sili ona anoa i tamaiti, ia faaitiitia le taulai atu i mea e mafai ona latou mauaina i le Kerisimasi ae ia sili atu e uiga i mea e mafai ona latou foai atu.

Na matou tilotilo mo ni auala ia maua ai le agaga o le Kerisimasi mo sina taimi. O le polokalama o le Faamalamalama le Lalolagi na avea ma tali mo i matou. E ui lava i le na o le lua tausaga o le faatinoga, ua tele tu ma aga masani ua talanoa i ai le fanau e pei lava ua leva ona i ai i lo matou aiga. Ou te ofo i le mana ma aafiaga ua faia ia i matou.

I le aluga o taimi lea na matou mulimuli ai i le polokalama o le Faamalamalama le Lalolagi sa mafai ona matou foai atu ni meaai i le fale na teu ai meaai ma faasoa atu le agalelei i luga o a matou faitotoa o ala faasalalau faaagafesootai. Na matou faia ni mea e pei o le ave o se keke i se tuaoi faatoa siitia mai po o le ave o se ato o ni meaai mamā i le nofoaga autu o le soifua maloloina i le lotoifale e fesoasoani atu ia i latou o e o gasegase pe o mafatia.

O le aga masani e sili ona matou fiafia i ai o le Po o le Vaeluaga o le Kerisimasi. O i matou te toe fatuina ai le tala o Iesu ma faaaluina le po i Peteleema. Matou te ofuina laei e pei ona latou laeiina. Matou te taumafai e ‘aai i meaai na latou taumafaina, ma e matou te talanoa e uiga ia Iesu ma po o le a se ituaiga o soifuaga na Ia soifua ai.

E faigofie le talanoa e uiga i mea maoae na faia e Iesu. I le po o le vaeluaga o le Kerisimasi matou te taumafai e talanoa e uiga i mea faigata na Ia feagai ai. Ma le leai o se fale mautu, sa Ia faalagolago pea e le aunoa i le fesoasoani a tagata ese. Na matou talanoa e uiga i le auala e mafai ona avea ai i matou ma tagata ese lea na aapa atu ma siitia isi o e manaomia la matou lagolago.

I le Aso o le Kerisimasi, nai lo o se fale Falaoa Sinamoni, na tuufaatasia e tamaiti se falepovi falaoa sinamoni o loo i ai Maria, Iosefa ma le pepe o Iesu. Ou te manatu o se mea lelei mo tamaiti le iloa ma malamalama o le tagata sili na soifua i lenei lalolagi na amata mai o se pepe ma aoao mea uma na Ia iloaina e pei lava o i latou. E le gata na Ia amata o se pepe, ae na Ia afio mai i le lalolagi i tulaga sili ona maualalo ma faatauvaa.

E matuai taulai atu lava tamaiti i lagona o le agaga. E foliga mai latou te malamalama atoatoa i nei mataupu. E matuai tauia ai lava nei taimi faaleaoaoga.

O le Kerisimasi o se taimi matagofie i lo matou aiga. O loo i ai se migao faapitoa, ma i le taimi nei, ua faamoemoe le fanau e faataunuu nei aga masani i tausaga taitasi. Ou te tulimatai atu i se aso o le a mafai ai ona matou auai i nei lava aga masani i fale o la ma fanau pe a matutua. Ou te faamoemoe o le a mafai ona latou tomanatu ma le faamamai i manatuaga e pei o nei mea lea ua faamauina ai a latou molimau ma le malamalama i le moni o le soifua mai ma le soifuaga a lo tatou Faaola ma lana auaunaga paia i le lalolagi.

Meaai Mamā, Teuteuga ma Faamanatu i Aso Taitasi

Paula Matenga

A o laiti lava le ma fanau, sa matou amatalia se tu ma aga masani o le Kerisimasi lea na alua’i ai lava i le tele o tausaga. O se kalena na faitauina [agai i le kerisimasi] ma sa i ai Keriso i le ogatotonu. O le faalauiloaga, o se seti faigofie e luasefulu fa faatagata na ou faia mai se fasilaau.

E amata Tesema o loo gaogao le moega vaovao i luga o le ofutele. O aso taitasi e auauai ai le fanau e pikiina le isi fasi mea o le seti, ma faatulaga ma ‘ai le meaai mamā lea e o faatasi ai.

O le faalauteleina o le vaaiga o le fanau mai o Iesu i ni faatagata e 24 o lona uiga ua faaopoopo ai nisi mamoe ma kamela, peitai ua tofu ia faatagata taua ma se mau o loo tusia i tua. E faitau ma talanoaina le mau e tusa ai ma le taua o le faatagata na filifilia. O agelu, le au makoi, leoleo mamoe ma le fetu ma, ioe, o Maria, Iosefa ma Iesu.

O le faatulagaina o le vaaiga o le fanau mai o Iesu i lea vaega ma lea vaega lea na faasoaina atu ai le tala o le fanau mai o Keriso i le masina atoa o Tesema. O aso uma, i le vevesi ai ma le pisi i faafiafiaga o le Kerisimasi, sa faamanatu maia ia i matou le uiga moni o le Kerisimasi.

Ina ua oo i le taeao o le Kerisimasi, sa i ai iina i le ogatotonu o a matou faafiafiaga, le Vaaiga atoa o le fanau mai o Iesu, ma lona uiga atoa.

E le o ese a tatou fanau i nei tu masani. E tumau ma’i i latou e oo lava i lo latou matutua. Latou te le talanoa i meaalofa na latou mauaina a o tuputupu ae, ae o le taimi na faaaluina faatasi o se aiga ma aga masani e mafai ona latou faamoemoe atu i ai i tausaga uma. Talu ai ona latou te tulimatai atu i lenei lava aga masani, sa oo ai ina ou auina atu se seti laitiiti i la’u fanau tama i a latou misiona ina ia mafai ai e i latou ma a latou soa ona mauaina sina vaega o le aiga i le taimi o le Kerisimasi.

Ua tofu la’u fanau ma o latou foi aiga i le taimi nei, o lea sa ou faia ai se kalena e faitauina [agai i le fanau mai o Iesu] mo i latou taitoatasi ina ia mafai ona latou faaauauina lenei aga masani ma a latou lava fanau.

E tatau ona malie ma fiafia le Kerisimasi mo le fanau. E tatau ona malie ma fiafia le talalelei, ia tumu i le olioli ma le fiafia. O aga masani o le Kerisimasi ua fiafia i ai le lalolagi e mafai ona faatotonugalemu ia Keriso pe afai tatou te sogasoga. O le foai atu ma le mauaina o meaalofa e le faapea ia avea o ni mea faitino. E suitulaga i le meaalofa na tuuina mai e le Tama Faalelagi ia i tatou uma; o le meaalofa o lona Alo o Iesu Keriso ma mea uma e faatatau i ai.

O Se Meaalofa mo Iesu i le Aso Kerisimasi

Sophia Grey

Ina ua pe a ma le lima po o le ono o o’u tausaga sa ou maua ai se manatu o le tuuina atu o se meaalofa ia Iesu i le Kerisimasi. Ou te manatua lo’u iloaina lelei, o Iesu o lo tatou uso/tuagane. Sa ou manao e faaaofia o Ia i mea sa matou faia o se aiga, e pei ona mafai e se tamaitiiti ona faia.

O le foai atu o ni meaalofa o se vaega tele o le Kerisimasi. Sa ou faaiuina faapea ona o Iesu Keriso o se meaalofa Lava Ia, o le mea e tatau ona tatou faia o le filifili po o le a se mea o le a tatou faia e avea ma se meaalofa mo Ia.

Na ou maua se pusa ma se tapuni, ua afifiina i pepa Kerisimasi ma se lipine, ma tusi ai i luga o se tamai pepa le savali: “Mo Iesu, mai le Au Greys.”

Na ou fai i lo’u aiga e tusi se mea o le a latou faia e avea ma se meaalofa mo Iesu i le tausaga a sau. O mea e pei o le “O le a ou taumafai e faamagalo atili atu isi mo oe,” po o le “O le a ou taumafai e avea ma se tasi e tausia le filemu mo oe,” pe oo lava i le “O le a ou taumafai e faia mea mo tina ma tama e aunoa ma le tau faatonuina.”

Ou te le manatuaina ni meaalofa tonu lava na tusia, aua e pe a ma le 20 tausaga ua tuanai na matou amatalia ai, peitai o loo tumau pea le agaga o na meaalofa.

I le taeao o le Kerisimasi, ao lei tatalaina meaalofa, matou te faitau mai le Luka, tatala le meaalofa mai le pusa a Iesu ma faitau i le tasi ma le isi mea o le a matou tuuina atu ia te Ia i lena tausaga.

O lenei aga masani faigofie na aumaia Keriso ia matou Kerisimasi aua na matou lagona ai e pei o i ai o Ia iina. A o laitiiti, sa ou fiafia lava aua o loo Ia mauaina se meaalofa e pei lava o i matou, e pei lava o se tasi o lo matou aiga. Na faamanatu maia ia i matou mea na sili ona taua, ma o Ia o lo tatou uso/tuagane! Tatou te alolofa ia te Ia e pei lava o so tatou tino ma aano faaleaiga, aisea la o le a tatou le faaaofia ai o Ia i o tatou taimi sili ona fiafia?

A o o’u tuputupu ae ina matua, ua ou malamalama o le tatalaina o meaalofa i le Kerisimasi e le manaomia ona faaataata a luga. Ua uma ona tuuina mai ia i tatou uma e le Faaola le meaalofa o le Togiola, o le [meaalofa] sili i meaalofa uma. E tatau ona ou taliaina lenei meaalofa ma le naunautaiga o se tamaitiiti o loo tatalaina se meaalofa i le taeao o le Kerisimasi.

Taeao o le Kerisimasi i le Misiona i le Aai o Aukilani: O se aga masani mo le 30 tausaga o auaunaga faaKeriso

Argentina Fatialofa

Ua matuai faamanuiaina lo’u olaga. Na matou maua le talalelei i le amataga o le vaitau o le fitusefulu ma ua faamanuiaina o matou olaga i soo se auala e talafeagai ai.

I la’u galuega, ou te vaaia le tele o le faanoanoa. O aiga ua malepelepe, fatu ua nutimomoia. Pe a ou mafaufau i oa ma faamanuiaga ua aumaia e le talalelei i lo’u olaga ua ou iloa ai e tatau ona ou toe avatua se mea, aemaise lava mo i latou o e e lei mauaina le talalelei e pei ona ou mauaina.

I le amataga o le vaitau o le valusefulu, sa matou sailiili ai ma la’u fanau mo ni avanoa faaleauaunaga o se auala e faaalia atili ai le agaga faafetai mo mea ua matou maua i le taimi o le Kerisimasi. Na amata i se tasi tausaga ao matou laulauina atu se taumafataga mo e ua leai ni aiga ma aiga e le tagolima, i le faletele i le taulaga. O iina sa masani ona faia ai. Sa o se aafiaga manaia ma faaleagaga lea na matua taua lava ia i matou o se aiga.

Talu mai lena uluai aofiaga, na ou taumafai ia aua lava nei misi se tausaga. O loo ma auauna atu nei i le Misiona a le Aai o Aukilani ma ua toeitiiti atoa le tolusefulu tausaga o loo faia pea. I le aluga o tausaga e toatele tagata eseese o aiga ua o mai e auai ma i matou; o uso/tuagane/tuafafine, o tei, e fuafua lava po o ai o i ai po o o latou tulaga i le taimi.

Mo a’u ma la’u fanau, o le aga masani o lenei Kerisimasi ua aoaoina i matou ia lotomaualalo. Ua aoao maia i matou ina ia talisapaia le mea ua tuuina mai e le Togiola ia i matou. O mea uma ua matou maua ua matou nofo aitalafu ai i le Togiola a le Faaola. A ou vaai i le tele o mea i luga o lo matou laulau ma le tele o mea i lalo o le laau i le taimi o le Kerisimasi, ou te iloa ai ona o faamanuiaga o le talalelei lea ua faamanuiaina ai o matou olaga.

E alofa Iesu Keriso i tagata uma. Na ou lagonaina lena lava agaga alofa mo i latou o e o mai i le taumafataga o le aoauli o le Kerisimasi a le Misiona a le Aai. Po o lava tulaga po o ituaiga, matou te taliaina tagata uma o e ulu mai i na faitotoa, e pei lava ona faia e le Faaola. Ou te fiafia e vaai ia i latou ma taulimaina i latou e pei o se aiga, aemaise lava i latou o e e i ai ni manaoga faapitoa pe leai ni aiga.

Na amoina e le Faaola le satauro e aunoa ma se faitio. Na Ia mafatia i le tiga mo a’u agasala ma e lei i ai se taimi na ia faapea mai ai ua le mafai ona Ia faia, pe na Ia faavaivai. O le iloaina na Ia mafatia ma puapuagatia mo a’u e tatau ai ona ou toe avatua se mea ia te Ia e ala i le auauna atu i isi o e le tagolima.

O le a ou tausia pea lenei aga masani po o le a lava le umi ou te mafaia ai. Ou te le iloa po o le a le umi o le a i ai lena mea, ae e lei faavaivai lava Keriso i mea na Ia afio mai i lenei lalolagi e fai mo a’u. Sei vagana ai ua manaomia a’u e le Alii i se isi mea ae o le a e mauaina lava a’u o loo auauna atu i le Alii ma Ana fanau i le Misiona a le Aai o Aukilani i lenei Kerisimasi ma le tele o Kerisimasi mulimuli mai.

Sauniuni mo le Kerisimasi e ala i le Tausiga ma le Faasoaina Atu

Siteki a Perth, Australia Southern River

E faitau afe tamaiti Ausetalia o le a le maua se meaalofa i le vaitau o aso malolo ia Tesema a sau talu ai e le gafatia e o latou aiga ona o le mativa. Na aoina talu ai nei e tamaitai mai le Aualofa o le Siteki a Perth Australia Southern River ni meaalofa e foai atu i le Talosaga mo le Kerisimasi a le Aiga o Samita mo i latou e le tagolima.

O se tasi o faamoemoega autu o le faalapotopotoga a le Aualofa o le “galulue ma le lotogatasi e fesoasoani atu ia i latou e le tagolima”. Faatasi ai ma lena manatu i le mafaufau, na uunaia ai tamaitai o le Au Paia o Aso e Gata Ai (mai le 18 tausaga ma matutua atu) e faatau se meaalofa mo se tamaitiiti e tusa ai ma taiala a le Aiga a le Au Samita ma aumai i le gaoioiga o le “Kerisimasi ia Iulai” e tuu i lalo o le laau Kerisimasi. O meaalofa na aoina o le a fesoasoani i le faalapotopotoga e ausia ai a latou sini ina ia tilivaina le silia ma le 75,000 meataalo fou ma le 50,000 tusi fou i tamaiti e le tagolima i Ausetalia atoa.

O le a auai volenitia e sotaina, utaina ma tilivaina meaalofa ina ia saunia mo le taeao o le Kerisimasi.

Na saunoa mai Sue Noney, o le Peresitene o le Aualofa a le Siteki faapea, “E talitonu uso na auai i le gaoioiga i le mataupu o loo i ai i le Tusi a Mamona e faasino i le Mosaea 2:17, e faapea ‘pe a outou auauna atu i o outou uso a tagata, ua na o lo outou auauna atu lava lea i lo outou Atua’.”

O le a saunia e lenei gaoioiga faatino se avanoa e aumaia ai se ‘ataata i foliga o se tamaitiiti i lenei Kerisimasi.