ចាបក្រដាសពណ៌ក្រហម
អ្នកនិពន្ធរស់នៅរដ្ឋ អៃដាហូ ស.រ.អា ។
អ្វីដែលអេវ៉ាអាចគិតនោះគឺ រឿងសប្បាយៗដែលមិត្តរបស់នាងនឹងមាន ពេលនាងមិននៅ ។
« យើងបានឈឺ ហើយអ្នករាល់គ្នាបានមកសួរយើង » ( ម៉ាថាយ ២៥:៣៦ ) ។
អេវ៉ាចូលចិត្តរដូវកាលបុណ្យគ្រីស្ទម៉ាស់ ។ ព្រឹកនេះនៅសាលារៀន នាងបានចំណាយពេលផាត់ពណ៌លើកាត និងស្តាប់តន្ត្រីសប្បាយៗ ។
អ្នកគ្រូហ្គ្រូនីកបាននិយាយថា « ឥឡូវដល់ម៉ោងអានសៀវភៅហើយ ។ ប្រសិនបើប្អូនៗបានបញ្ចប់ការអាននៅថ្ងៃនេះ និងថ្ងៃស្អែក នោះប្អូនៗនឹងគ្មានកិច្ចការសាលារៀនធ្វើនៅផ្ទះត្រូវធ្វើនៅថ្ងៃឈប់សម្រាកទេ » ។
ក្មេងៗទាំងអស់នៅក្នុងថ្នាក់របស់អេវ៉ាបានស្រែកហ៊ោរឡើង ។ ប៉ុន្តែអេវ៉ាមានអារម្មណ៍ពុំសូវរីករាយទេ ។ នាងញ័រដៃបន្តិចពេលនាងទាញសៀវភៅរបស់នាងមកអាន ។ នាងមានអារម្មណ៍រងារណាស់ ហើយបំពង់ករបស់នាងឈឺ ។ ភ្នែករបស់នាងក្រហម ពេលនាងសម្លឹងមើលអក្សរនៅលើទំព័រសៀវភៅ ។ ពេលចប់ម៉ោងរៀន អេវ៉ាមានអារម្មណ៍ថាឈឺពោះផងដែរ ។
ទីបំផុតវាដល់ម៉ោងដើរត្រឡប់ទៅផ្ទះវិញជាមួយបងប្អូនប្រុសស្រីរបស់នាងគឺ ធីម និង វីលម៉ា ។ ជាទូទៅពួកគេមានភាពរីករាយពេលដើរតាមផ្លូវទៅផ្ទះវិញ ។ ពួកគេនឹងលេងជាមួយគ្នា ឬធ្វើមនុស្សទឹកកក ។ ប៉ុន្តែថ្ងៃនេះ អ្វីៗដែលអេវ៉ាគ្រាន់តែចង់ធ្វើនោះគឺទៅផ្ទះ ហើយដេក ។
ពេលអេវ៉ាទៅដល់ផ្ទះ ម៉ាក់បានស្ទាបថ្ងាសរបស់នាង ។
ម៉ាក់បាននិយាយថា « កូនក្តៅខ្លួនហើយ ។ កូនត្រូវញ៉ាំទឹកឲ្យបានច្រើន ហើយគេងឲ្យបានច្រើនដែរ » ។
អេវ៉ាបានឡើងលើគ្រែ ហើយបានគេងភ្លាម ។ នៅព្រឹកបន្ទាប់មក គ្រប់គ្នានៅក្នុងគ្រួសារនាងរវល់រៀបចំខ្លួនសម្រាប់ថ្ងៃនោះ ។ ប៉ុន្តែម៉ាក់បាននិយាយថា អេវ៉ាឈឺពុំអាចទៅសាលាបានទេ ។
បន្ទាប់មកអេវ៉ាបានចាំពីអ្វីមួយដែលធ្វើឲ្យនាងពិបាកចិត្ត ។ ថ្ងៃនេះគឺជាថ្ងៃជប់លៀងបុណ្យគ្រីស្ទម៉ាស់នៅសាលារៀន ! ពួកគេត្រូវបញ្ចប់គម្រោងសិល្បៈរបស់ពួកគេ ហើយច្រៀងចម្រៀង និងញ៉ាំនំ ។ នាងត្រូវ តែ ទៅរៀន !
ប៉ុន្តែម៉ាក់ពុំផ្លាស់ប្តូរចិត្តគាត់ទេ ។
ម៉ាក់បាននិយាយថា « ម៉ាក់ស្តាយណាស់ កូននឹងខកខានចូលរួមពិធីជប់លៀងហើយ ។ ប៉ុន្តែសុខភាពរបស់កូនគឺវាសំខាន់ជាង » ។
អេវ៉ាបានចាប់ផ្តើមយំ ។ ម៉ាក់បានព្យាយាមជួយនាងឲ្យមានអារម្មណ៍ល្អដោយញ៉ាំសម្លរដ៏ឆ្ងាញ់ ។ ប៉ុន្តែអ្វីដែលអេវ៉ាអាចគិតឃើញនោះគឺរឿងសប្បាយៗដែលមិត្តរបស់នាងនឹងមាន ពេលនាងមិននៅ ។
នៅពេលរសៀល ធីម និង វិលម៉ាបានត្រឡប់មកពីរៀនវិញ ។ ថ្ពាល់របស់ពួកគេឡើងក្រហមដោយសារតែពួកគេបានលេងព្រិល ។
វិលម៉ាបាននិយាយថា « ពិធីជប់លៀងនៅសាលារៀនសប្បាយណាស់ ។ យើងបានធ្វើចាបក្រដាសពណ៌ក្រហមទុកព្យួរនៅផ្ទះ » ។
ធីមបានទាញអ្វីមួយចេញពីហោប៉ៅគាត់ ។
« មើលនែ—អ្នកគ្រូហ្គ្រូនីកបានផ្ញើអំណោយពិសេសមួយតាមពួកយើងមកឲ្យឯង ។ ដូច្នេះឯងអាចធ្វើចាបក្រដាសពណ៌ក្រហមមួយបានផងដែរ ! » ។
អេវ៉ាបានញញឹម ។ « តើបងអាចបង្ហាញខ្ញុំពីរបៀបធ្វើវាបានទេ ? »
ធីម និង វិលម៉ាបានបង្ហាញអេវ៉ាពីរបៀបកាត់តាមក្រដាសចុចៗ ហើយបត់វាឲ្យបានត្រឹមត្រូវ ។ ពួកគេបានជួយនាងចងខ្សែជារង្វង់ ។
« ម៉ាក់មើលនែកូនធ្វើវាណា ! អេវ៉ាបាននិយាយ ដោយបង្ហាញគ្រឿងតុបតែងបុណ្យគ្រីស្ទម៉ាសថ្មីដែលនាងចូលចិត្ត ។
អេវ៉ាបានគិតពីទឹកចិត្តល្អរបស់អ្នកគ្រូហ្គ្រូនីក ដែលចាំពីនាងពេលនាងឈឺ និងរបៀបដែលធីម និង វិលម៉ា បានជួយនាងផងដែរ ។ ឥឡូវពេលណាអេវ៉ាក្រឡេកមើលទៅចាបក្រដាសពណ៌ក្រហមរបស់នាង នោះនាងទទួលអារម្មណ៍នៃសេចក្តីស្រឡាញ់ច្រើនណាស់ ។
ធ្វើចាបក្រដាស !
-
កាត់ក្រដាសនេះ ហើយបិទទំព័រនេះជាប់នឹងក្រដាសក្រហម ។ បន្ទាប់មកកាត់រូបចាប និងស្លាបវាចេញ ។
-
សូមចោះប្រឡោះមួយតាមបណ្ដោយខ្សែបន្ទាត់ដាច់ៗនៅលើចាបដោយប្រុងប្រយ័ត្ន ។ ដាក់ស្លាបចុះតាមប្រឡោះនោះ ។
-
ចោះប្រហោងមួយខាងលើស្លាប ហើយចងខ្សែមួយជារង្វង់កាត់តាមប្រហោងនោះដើម្បីព្យួរវាឡើង ។