Pagpigil sa mga Silakbo ng Iyong Damdamin: Paano Iayon ang Seksuwal na mga Ideya at Damdamin sa mga Inaasahan ng Panginoon

Agosto 2020

Digital Lamang: Mga Young Adult

Pagpigil sa mga Silakbo ng Iyong Damdamin: Paano Iayon ang Seksuwal na mga Ideya at Damdamin sa mga Inaasahan ng Panginoon

Ng Liahona staff at Family Services

Hindi ang pagwawaksi sa angkop na mga seksuwal na damdamin ang ninanais ng Ama sa Langit para sa atin. Nais Niyang matuto tayong kontrolin ang mga ito para maghatid ang mga ito sa atin ng kagalakan sa halip na kalungkutan.

Marahil ay hindi mo na naaalala kung paano matutong lumakad. Sa simula, maaaring maraming beses kang natumba. Ngunit nang matumba ka, hindi ka pinagalitan. Malamang ay itinayo ka ng isang taong nagmamahal sa iyo at paulit-ulit kang hinikayat na subukan itong muli! Sa paglipas ng panahon, naging mas natural na ang paghakbang nang paisa-isa. Maiiwasan mo ngayon ang karamihan sa mga sitwasyong makakatisod sa iyo.

Kung maaari lamang na matiyaga nating pakitunguhan ang ating sarili na tulad noong natututo tayong pamahalaan ang iba pang mga aspeto ng ating pisikal na katawan, pati na kung paano kontrolin ang seksuwal na mga damdamin.

Paano Natin “Pipigilin ang Silakbo ng Ating Damdamin”?

Karamihan sa atin ay nakararanas ng seksuwal na mga damdamin bilang bahagi ng ating mortal na karanasan. Bagama’t ang mga damdaming ito na bigay ng Diyos ay mahalagang bahagi ng Kanyang plano para sa ating kaligayahan, marami sa atin ang nakadama na ng pagnanais na gamitin ang mga ito sa paraang hindi naaayon sa Kanyang mga utos.

Noong tinedyer pa tayo hanggang sa maging young adult tayo, marami sa atin ang nakaranas na ng mga hamon na nagmumula sa pag-aaral kung paano iaayon ang ating seksuwal na mga damdamin na nagmumula sa isang mortal na katawan sa mga inaasahan ng Panginoon kung paano natin gagamitin ang kaloob na ito.

Inuubos ng ilan sa atin ang maraming espirituwal na enerhiya natin sa pagsisikap na iwaksi pati na ang angkop na seksuwal na mga damdamin. Ngunit hindi ang pagwawaksi sa mga ito ang ninanais ng Ama sa Langit para sa atin! Sa halip, nais Niyang tulungan tayo na matutong kilalanin at kontrolin ang ating seksuwal na mga ideya at pag-uugali. Ang pagkakaroon ng kakayahang ito ay makakatulong sa atin kapwa bago at matapos ang kasal.

Itinuro ni Alma, “Pigilin … ang iyong [mga] silakbo ng damdamin, upang mapuspos ka ng pagmamahal” (Alma 38:12). Hindi sinabi ni Alma kailanman na alisin ang mga silakbo ng iyong damdamin—dahil hindi naman maituturing na masama ang mga silakbo ng damdamin. Sa halip, hinikayat niya tayong pigilin o kontrolin ang mga ito para mapuspos tayo ng pagmamahal.¹

Kaya paano natin mapipigil ang mga silakbo ng ating damdamin? Narito ang ilang bagay na makakatulong sa iyo habang natututo kang “lumakad” sa mahalagang paglalakbay na ito.

Unawain ang mga Impluwensya

Una, makakatulong na maunawaan ang ilan sa mga kadahilanang umiimpluwensya sa kakayahan mong kontrolin ang iyong seksuwal na mga pagnanasa. Ang pag-unawa sa mga kadahilanang ito ay makakatulong sa iyo na siyasatin ang iyong seksuwal na mga damdamin:

Biolohiya: Bawat katawan ay lumilikha ng iba’t ibang antas ng ilang kemikal na nakakaapekto sa seksuwal na pagnanasa. Dahil dito, maaaring magkakaiba ang tindi ng pakikibaka ng bawat tao.
Mga gawi: Kung nakagawian mo nang isagawa ang iyong seksuwal na mga ideya at pagnanasa, maaaring mas mahirap magbago. Matagalang pagsisikap ang kailangan bago mapalitan ng mga positibong gawi ang mga gawing ito. Kailangan mong patuloy itong subukan kahit mabigo ka—at patawarin ang iyong sarili—habang ginagawa mo ang prosesong ito. Sa ilang pagkakataon, matutulungan ka ng isang pinuno ng Simbahan o mental health professional na madaig ang iyong masasamang gawi.
Mahihirap na emosyon: Isinasagawa ng ilang tao ang seksuwal na mga ideya at pag-uugali para labanan ang stress, kalungkutan, o depresyon. Matutong kilalanin ang mga emosyong iyon. Sa halip ay isiping mag-ehersisyo, sumulat sa journal, magpa-therapy, o iba pang positibong paraan ng paglaban sa mga damdaming ito.
Mababang pagtingin sa sarili: Ang mga damdamin ng mababang pagpapahalaga sa sarili ay madalas magpahina ng iyong determinasyon. Isiping maglingkod at gumawa ng iba pang mga aktibidad na nagpapaganda sa pakiramdam mo sa iyong sarili.
Kunwa-kunwariang mga kaugnayan: Hindi mapapalitan kailanman ng isang kunwa-kunwariang kaugnayan ang pangangailangan mo sa isang tunay na koneksyon. Sa halip, paghusayin ang iyong mga kasanayang makipag-ugnayan at magkaroon ng mabubuting kaibigan. Maghanap ng magagandang oportunidad na makipagkaibigan o magkaroon ng mga libangan. Ang pakikipag-ugnayan sa iba ay isang susi sa tagumpay.

Matuto mula sa Halimbawa ng Tagapagligtas

Pagkatapos Niyang mag-ayuno nang 40 araw, tinukso ni Satanas si Jesus na gawing tinapay ang mga bato. Ang itinugon lang Niya ay: “Nasusulat, Hindi sa tinapay lamang mabubuhay ang tao, kundi sa bawa’t salitang lumalabas sa bibig ng Dios” (Mateo 4:4).

Hindi nilabanan ng Tagapagligtas si Satanas sa pamamagitan ng pagsasabi na hindi Siya gutom, o na hindi Niya gusto ng pagkain. Sa halip, hinarap Niya ang tuksong ito sa pagsasabi ng mas mataas at mas dakilang dahilan para sa kawalan ng pagnanais na kumain: ang paghahangad na mamuhay ayon sa bawat salita ng Diyos. Nakita Niya na ang Kanyang misyon ay mas mahalaga kaysa mga pisikal na pagnanasa.

Kung sisikapin mong kumbinsihin ang utak mo na wala kang seksuwal na mga damdamin, ipapaalala sa iyo ng katawan mo na mayroon ka nito, na maaaring magparamdam sa iyo ng pagkagapi, stress, at pagkahapo.

Ngunit kung haharapin mo ang iyong seksuwal na mga pagnanasa na tulad ng pagharap ng Tagapagligtas sa pagnanais sa pagkain, mas mapipigil mo ang iyong mga damdamin. May mas malaking dahilan ang Tagapagligtas na mangilin kaysa patangay sa tukso, at gayon din ikaw! Pinangakuan tayo ng napakaraming pagpapala sa buhay na ito at sa kawalang-hanggan kapag sinusunod natin ang mga kautusan at ang “pagsunod sa batas ng kalinisang-puri ay nagdudulot ng ilan sa pinakamalalaking pagpapala sa kalalakihan at kababaihan sa mortalidad: lubos na kumpiyansa sa espirituwalidad sa harap ng pamilya, mga kaibigan, mga kasamahan sa Simbahan, at, sa huli, sa harap ng Tagapagligtas.”²

Dapat Mong Malaman na Kaya Mong Magtagumpay

Ang mga utos ng Panginoon ay magpapala sa buhay mo kung susundin mo ang mga ito. Ang kautusang kontrolin ang mga silakbo ng iyong damdamin ay kabilang dito: ang mga pagsisikap mong sumunod ay magdudulot ng walang-hanggang kagalakan. Ang pagkontrol sa iyong seksuwal na mga damdamin ay maaaring isang panghabambuhay na pag-aaral, ngunit naroon ang Ama sa Langit para tulungan kang magtagumpay! Kung makagawa ka ng mga pagkakamali, magsisi at subukang muli. Huwag sumuko. Bahagi iyan ng nagpapadalisay na proseso sa mortalidad.

Ang Ama sa Langit ay isang mapagmahal na Ama na nagmamalasakit at handang tumulong sa atin, lalo na sa sagradong bahaging ito ng mortalidad. Huwag kalilimutan kailanman na nagtanim Siya ng angkop na seksuwal na mga damdamin sa iyong kalooban, at matutulungan ka Niyang malaman kung paano mo magagamit ang mga ito para sa ikabubuti ng iyong buhay anuman ang iyong sitwasyon ngayon sa pamamagitan ng pagtulong sa iyo na makipag-ugnayan sa iba sa mabubuting paraan, pagbibigay sa iyo ng determinasyon at tibay, paggabay sa iyo na magkaroon ng kamalayan sa sarili mo, pagmamahal sa sarili mo, at pagtanggap, at higit kang inilalapit sa Tagapagligtas bawat araw.

Tandaan, nais ng Diyos na lumigaya ka. Si Satanas ang nagnanais na maging miserable ka at nagpapahina ng loob at nanlilinlang para ihiwalay ka sa Diyos. Ang pagpapatangay sa mga seksuwal na tukso sa labas ng kasal ay maglalayo sa iyo sa mga pagpapala ng walang-hanggang kaligayahan at maghahantong sa iyo sa kalungkutan. Ngunit ang mga pagsisikap mong maunawaan, maituon, at makontrol ang iyong seksuwalidad, kahit isa itong panghabambuhay na pagsisikap, ay maaaring maghantong sa iyo sa kaligayahan, kapakumbabaan, at pagkakawanggawa sa lahat, pati na sa sarili mo.

Paano Patatagin ang Iyong Espirituwalidad, Kaisipan, at Pag-uugali

Espirituwalidad:

Patatagin ang iyong kaugnayan sa Ama sa Langit at sa Tagapagligtas. Magagabayan at mabibigyan ka Nila ng karunungan, tapang, at kapangyarihang magtagumpay.
“Punuin ng mga positibong mapagkukunan ng lakas ang inyong buhay. Hindi sapat ang sikapin lamang na paglabanan ang kasamaan o alisin ang lahat ng kasalanan sa ating buhay. Kailangan din nating punuin ng kabutihan ang ating buhay. Kailangan tayong maging abala sa mga aktibidad na nagbibigay ng espirituwal na lakas” (Mga Turo ng mga Pangulo ng Simbahan: Ezra Taft Benson [2014], 262).
Pag-aralan ang plano ng kaligtasan at ang batas ng kalinisang-puri. Alamin ang mga pagpapalang ipinangako sa atin mula sa matwid na paggamit ng kapangyarihang ito.
Ituon ang sarili mo sa mga banal na kasulatan araw-araw, ipagdasal na magkaroon ng lakas at patnubay, mag-ayuno, gampanan ang iyong tungkulin, maglingkod, dumalo sa templo, pag-aralan ang iyong patriarchal blessing, at humingi ng mga basbas ng priesthood. Ang maliliit na espirituwal na gawing ito ay maaaring pagmulan ng mahalagang lakas (tingnan sa Alma 37:6). Ipinangako ni Pangulong Russell M. Nelson na “sa mapanalanging pag-aaral ng Aklat ni Mormon araw-araw, makagagawa kayo ng mas maiinam na desisyon—sa araw-araw” (“Ang Aklat ni Mormon: Ano Kaya ang Buhay Ninyo Kung Wala Ito?” Liahona, Nob. 2017, 62).
Kung gumawa ka ng desisyon na hindi naaayon sa mga kautusan, dapat mong malaman na hindi nawala ang lahat ng pag-unlad na nagawa mo na. Kapag taos-puso mong hinangad na magsisi, maaari mo itong subukang muli (tingnan sa Mosias 26:29–30). Huwag mong hayaang ipadama sa iyo ng iyong mga pakikibaka na nawalay ka sa Diyos. Mahal ka Niya. Hindi mo kailangang tumugon sa isang panukat ng pagkamarapat para manalangin sa Kanya at mahalin ka Niya.

Kaisipan:

Kapag pumapasok ang seksuwal na mga bagay sa iyong isipan, putulin ito kaagad. Matutong ituon ang iyong isipan sa mabuting paraan sa pamamagitan ng paggamit sa modelong ito: harapin, hamunin, at baguhin. Kapag dumating ang isang di-angkop na ideya, harapin mo ito sa pamamagitan ng pagtukoy rito. Hamunin ito sa pamamagitan ng pag-iisip kung saan ka ihahantong nito kung patuloy mo itong iisipin. At pagkatapos ay baguhin ang iniisip mo at gawin itong positibo.
Huwag magpadaig sa bagay na sinisikap mong baguhin. Magtuon sa magagawa mo ngayon (tingnan sa 2 Nephi 28:30; Mosias 4:27).
Gandahan ang iyong pananaw. Isipin ang magiging pakiramdam mo at kung ano ang magiging buhay mo kapag mas may kontrol ka.
Magkaroon ng higit na pag-unawa tungkol sa mga damdamin mong pinagmumulan ng tukso. Mas mahina ka ba kapag nadarama mo na ikaw ay tinanggihan, nag-iisa, malungkot, balisa, bigo, stressed, pagod, o gutom? Paano mo higit na mapipigil ang mga damdaming ito?
Huwag maniwala na dapat ka nang tumigil sa pagsubok kapag nabigo kang minsan. Mas magtatagumpay ka sa pagtatanong ng, “Ano ang maaari kong gawin sa ibang paraan para maging mas mabuti sa susunod?” Hati-hatiin ang iyong mga mithiin at pag-unlad sa maliliit na bahagi na hindi kasinghirap ng pag-abot sa minimithi.

Pag-uugali:

Mula sa mapagkakatiwalaang mga pagmumulan, alamin ang iba pa kung paano gumagana ang iyong katawan.
Huwag hayaan ang iyong mga pagkakamali na idikta kung sino ka o maging tanging pokus ng buhay mo. Alalahanin na ikaw ay anak ng Diyos at hindi ka nakatadhanang paulit-ulit na gawin ang iyong mga pagkakamali. Kung nagkamali ka, tuklasin kung ano ang nagsanhi nito at gumawa ng mga plano na tumutulong sa iyo na madaig ang mga hamong kinakaharap mo.
Maging responsable at tapat sa iyong sarili.
Ibahagi ang iyong mga pakikibaka sa isang taong pinagkakatiwalaan mo na tutulong sa iyo na maging responsable sa iyong plano. Ibalita sa kanila nang regular kung ano ang iyong kalagayan.
Huwag ilagay ang iyong sarili sa mga sitwasyon kung saan mas malamang kang makagawa ng pagkakamali. Iwasan ang media, mga tao, o mga kapaligiran kung saan mahihirapan kang magkaroon ng angkop na seksuwalidad o naghihikayat ng di-angkop na seksuwal na mga ideya at pag-uugali.
Kilalanin ang iyong seksuwal na mga damdamin kapag nadarama mo ang mga ito at pagkatapos ay piliing gumawa ng ibang bagay. Mag-ehersisyo, kausapin ang isang kaibigan, o magkaroon ng isang mabuting libangan.
Hangaring magsisi at lumago at umunlad sa lahat ng aspeto ng iyong buhay habang sinisikap mong daigin ang hamong ito. Alalahanin ang mga salita ni Elder Ulisses Soares ng Korum ng Labindalawang Apostol: “Kung patuloy tayong magsisikap na malampasan ang ating mga pagsubok, pagpapalain tayo ng Diyos ng mga kaloob na pananampalataya upang gumaling at ng paggawa ng mga himala. Gagawin Niya para sa atin ang hindi natin magagawa para sa ating sarili” (“Pasanin ang Ating Krus,” Liahona, Nob. 2019, 114).