Mga Young Adult

Pagkatutong Ituring ang Seksuwalidad Bilang Isang Sagradong Kaloob

Bilang mga miyembro ng Simbahan, itinuturo sa atin na ang seksuwal na intimasiya sa loob ng kasal ay isang napakagandang bahagi ng plano ng ebanghelyo. Maaari itong maging isang sagrado, maganda, at masayang bahagi ng ating buhay na humahantong sa higit na pakikipagkaisa sa ating asawa at sa Diyos. Pero paano naman ang damdaming seksuwal bago ikasal? Ang ating likas na pagiging seksuwal ay hindi nagsisimula sa kasal—binigyan na tayo ng Diyos ng damdaming seksuwal na isang malusog at mahalagang aspeto ng pagiging tao. Subalit kung minsan sumasama ang ating pakiramdam, nahihiya tayo, o nakakaramdam ng kasalanan dahil sa ating mga maling pagkaunawa tungkol sa ating damdamin at likas na pagiging seksuwal.

Ang ilan sa atin ay hindi naturuan tungkol sa positibong mga aspeto ng seksuwalidad—masasamang bunga lamang ng paglabag sa batas ng kalinisang-puri [ang naituro]. O siguro ay wala man lang naituro talaga sa atin na anuman tungkol sa kadalisayang seksuwal. At dahil karamihan ng natututuhan natin tungkol sa seksuwalidad ay nagmumula sa media, ang mga hindi tumpak na mensahe, na hinaluan ng kawalan ng pagkaunawa tungkol sa pananaw ng Diyos sa seksuwalidad, ay makadaragdag sa di-matitinong relasyon, paggamit ng pornograpiya, at pag-abuso sa kalayaan ng iba, tulad ng seksuwal na pag-atake. Kaya paano tayo matututong ituring ang seksuwalidad bilang isang sagradong kaloob, isang mahalagang bahagi ng ating likas na pagkatao na bigay ng Diyos? At paano natin kokontrolin ang ating seksuwalidad ayon sa sukdulang layunin nito sa walang-hanggang plano ng Diyos?

Nasasaisip ang mga tanong na ito, nabuo namin ang bahaging ito sa buwang ito para tulungan kayong maragdagan ang inyong pagkaunawa sa pananaw ng Diyos tungkol sa angkop na seksuwalidad. Umaasa kami na sa positibong pananaw na ito, magiging mas determinado kayong sundin ang batas ng kalinisang-puri, makasusumpong kayo ng layunin at pag-asa sa inyong indibiduwal na mga sitwasyon, magiging handa kayong magkaroon ng matatag at kasiya-siyang pag-aasawa, at aanyayahan ninyo ang kapayapaan ng Tagapagligtas sa inyong buhay. Sa pamamagitan ng inyong mga pagsisikap na sundin ang mga utos ng Diyos tungkol sa seksuwalidad, ang inyong “pagtitiwala [ay] lalakas sa harapan ng Diyos” (Doktrina at mga Tipan 121:45).

Pagpalain nawa kayo,

Mga tauhan ng Liahona young adult section

Mga kabatiran …

Mula sa mga young adult

tungkol sa mga pagpapala ng pagsunod sa batas ng kalinisang-puri

“Binibigyan ako nito ng dagdag pang kalakasan na manatiling nakatuon sa ebanghelyo at kay Jesucristo.”

—David Mikaelson, Taiwan

“Kapayapaan ng isipan; seguridad sa aking mga pakikipag-ugnayan.”

—Heidi Thorpe, Utah, USA

“Kalayaan! Malinaw na isipan at kamalayan. Higit na pagtutuon ng pansin sa mahahalagang bagay.”

—Sicily Wilcock, Arizona, USA

“Natulungan ako nitong iwasan ang maraming sakit ng kalooban na naranasan ng marami sa aking mga kaibigan.”

—Isle Marie Ahlström, Sweden

Mula sa mga pinuno ng Simbahan

“Pinangakuan din tayo na, kapag tinahak natin ang landas ng kabanalan, ‘ang Espiritu Santo ang [ating] magiging kasama sa tuwina’ (D at T 121:46. Dahil dito, ang pagsunod sa batas ng kalinisang-puri ay nagdudulot ng ilan sa mga pinakamalalaking pagpapala sa kalalakihan at kababaihan sa mortalidad: lubos na kumpiyansa sa espirituwalidad sa harap ng pamilya, mga kaibigan, mga kasamahan sa Simbahan, at, sa huli, sa harap ng Tagapagligtas. Ang kagustuhan nating mapabilang ay naisasakatuparan sa kabutihan habang lumalakad tayo sa liwanag nang may pag-asa.”

Elder David A. Bednar ng Korum ng Labindalawang Apostol, “Naniniwala Kami sa Pagiging Malinis,” Liahona, Mayo 2013, 44.

Ano ang ginagawa mo para maging mabuting katiwala ng mundo na nilikha ng Ama sa Langit para sa atin? (tingnan sa 1 Nephi 17:36). Ipadala sa amin ang iyong sagot sa liahona.ChurchofJesusChrist.org bago sumapit ang Agosto 31, 2020.

Ibahagi ang Iyong Kuwento

May karanasan ka bang maibabahagi? O may mga artikulo ka bang nais makita tungkol sa ilang paksa? Kung gayon, nais naming makarinig mula sa iyo! Maaari mong ipadala ang iyong mga artikulo o feedback sa liahona.ChurchofJesusChrist.org.