មានវិធីជាច្រើនដើម្បីសិក្សាព្រះគម្ពីរ

ដោយ ម៉ារីស្សា វីដឌីសុន

ទស្សនាវដ្ដីសាសនាចក្រ

សូម្បីតែបងប្អូនមិនចូលចិត្តអានក៏ដោយ ក៏មាននូវវិធីជាច្រើនដើម្បីសិក្សាព្រះគម្ពីរផងដែរ ។

ខ្ញុំស្រឡាញ់ការហៅបម្រើរបស់ខ្ញុំនាពេលបច្ចុប្បន្នជាអ្នកលេងព្យាណូនៅថ្នាក់កុមារ ។ កាលពីពីរបីសប្ដាហ៍មុន ពួកកុមារកំពុងហាត់ច្រៀងចម្រៀងមួយ ។ ខ្ញុំបានទទួលអារម្មណ៍ពីព្រះវិញ្ញាណ កាលដែលពួកគេបានច្រៀង ៖

ស្វែងរក គិត និង​អធិស្ឋាន
គឺ​ជា​អ្វី​ដែល​ខ្ញុំ​ត្រូវ​ធ្វើ ។ 
ព្រះវិញ្ញាណ​នឹង​ដឹកនាំ​ដក់​ក្នុង​ចិត្ត
ខ្ញុំ​ដឹង​ថា​ព្រះគម្ពីរពិត ។១

ប៉ុន្តែក៏មានសំណួរមួយលេចឡើងក្នុងគំនិតខ្ញុំផងដែរ ។ ចុះបើបងប្អូនមិនចូលចិត្តអាន—ដូចជាវគ្គទីមួយនៅក្នុងចម្រៀងបានប្រាប់ថា—« ខ្ញុំចូលចិត្តអានគម្ពីរបរិសុទ្ធ » វិញនោះ ? ខ្ញុំគិតថា ប្រធានបទនៃការអានបានមាននៅក្នុងគំនិតខ្ញុំថ្មីៗនេះ ដោយសារមានមិត្តភក្ដិច្រើនជាងម្នាក់បានចែកចាយថា ពួកគេជួបការលំបាកជាមួយនឹងការមិនមានលទ្ធភាពអាន ។ ហើយមនុស្សជាច្រើនដែលខ្ញុំស្គាល់គឺមិនរីករាយក្នុងការអានតែម្ដង ! តើមានរបៀបមួយដែលពួកគេអាចនៅតែមានបទពិសោធន៍ដ៏មានអត្ថន័យមួយជាមួយព្រះគម្ពីរ ហើយអភិវឌ្ឍ « ទីបន្ទាល់ថាជាការពិត » ដែរឬទេ ?

មនុស្សហាក់បីដូចជារៀនបានល្អបំផុត នៅពេលព័ត៌មានត្រូវបានបង្ហាញនៅក្នុងរបៀបខុសៗគ្នាជាច្រើន ដូចជាទាំងដោយការមើលឃើញ និងដោយការនិយាយផ្ទាល់មាត់ និងមេរៀនត្រូវបានធ្វើឡើងម្តងហើយម្តងទៀត ។ ដោយគិតដល់រឿងនេះក្នុងចិត្តខ្ញុំបានព្យាយាមគិតអំពីវិធីខុសៗគ្នាក្នុងការសិក្សាព្រះគម្ពីរឲ្យបានច្រើនតាមដែលខ្ញុំអាចគិតឃើញ ។ មែនហើយ មិនមែនអ្វីៗគ្រប់យ៉ាងនៅក្នុងបញ្ជីនេះនឹងរាប់ទុកថាជា ការសិក្សាព្រះគម្ពីរដោយផ្ចិតផ្ចង់ និងស៊ីជម្រៅ ដែលពួកព្យាការីបានបង្រៀនថាជាការចាំបាច់ដល់ទីបន្ទាល់របស់យើងនោះទេ—វិធីមួយចំនួនគឺគ្រាន់តែជាគំនិតឆាប់រហ័ស សប្បាយៗ—ប៉ុន្តែខ្ញុំគិតថា យ៉ាងហោចណាស់វាអាចនឹងបំផុសជាគំនិតថ្មីៗរបស់បងប្អូនខ្លះ ។ ចូរយើងផ្ដល់ការប្រឹងប្រែងបំផុតដល់ការសិក្សាដំណឹងល្អ ដើម្បីយើងអាច ហើយដូចជាចម្រៀងនោះថា « នឹងមានការយល់ដឹង » ជាមួយគ្នា ។

គំនិតសម្រាប់ការសិក្សាព្រះគម្ពីរ

រកមើលពាក្យទាំងឡាយដែលត្រូវបានលើកឡើងច្រើនដងនៅក្នុងពររបស់លោកអយ្យកោរបស់បងប្អូន ហើយរកមើលពាក្យដូចគ្នានោះនៅក្នុងព្រះគម្ពីរ ។
ពេលបងប្អូនសិក្សា សូមគូររូបអំពីគំនិតរបស់បងប្អូននៅក្នុងកំណត់ហេតុការសិក្សាមួយ ឬនៅក្នុងរឹមសៀវភៅសិក្សា ចូរមកតាមខ្ញុំ របស់បងប្អូន ។
ធ្វើជាគំរូតុក្កតាតូចៗអំពីរឿងមួយចេញពីព្រះគម្ពីរ ។
ទូរសព្ទទៅសាច់ញាតិដែលរស់នៅឆ្ងាយ ហើយអានជាមួយគ្នាតាមទូរសព្ទ ។
សូមសរសេរទុកនូវបញ្ជីមួយនៃសំណួរដែលបងប្អូនមានសម្រាប់ព្រះ ហើយបន្ទាប់មករកមើលចម្លើយពេលបងប្អូនអាន ។
មើលវីដែអូមួយចេញពីគេហទំព័រ BookofMormonVideos.org ឬ BibleVideos.org ។
បើកព្រះគម្ពីរទៅជំពូកណាក៏បាន ហើយចាប់ផ្ដើមអាន ។
ច្រៀងទំនុកតម្កើងមួយ បន្ទាប់មកមើលបទគម្ពីរដែលមានរាយនៅចុងបញ្ចប់នៃចម្រៀងនោះ ។
សូមទៅកាន់គេហទំព័រ topics.ChurchofJesusChrist.org ហើយសិក្សាអ្វីដែលបងប្អូនចាប់អារម្មណ៍ ។
មើលរូបគំនូរនៅលើអ៊ិនធើរណិតដែលពិពណ៌នារឿងក្នុងព្រះគម្ពីរដែលបងប្អូនកំពុងសិក្សា ។
អានតែក្បាលជំពូក និងក្បាលកណ្ឌនៃគម្ពីរមួយ ។
ចាក់តន្ត្រីលួងលោមជាភ្លេងសុទ្ធ ពេលកំពុងអានឮៗ ។
រកមើលរបៀបនានាដែលជំពូកនីមួយៗនៃព្រះគម្ពីរទាក់ទងទៅនឹងព្រះវិហារបរិសុទ្ធ ។
ប្រសិនបើតាមធម្មតា បងប្អូនសិក្សាព្រះគម្ពីរជាឌីជីថល សូមសាកល្បងព្រះគម្ពីរដែលបោះពុម្ព ឬបើបងប្អូនជាធម្មតាសិក្សាព្រះគម្ពីរដែលបោះពុម្ព សូមសាកល្បងព្រះគម្ពីរជាឌីជីថលវិញ ។
ផាត់ ឬគូររូបពីឆាក ឬរឿងមួយពីព្រះគម្ពីរ ។
ធ្វើដូចជាបងប្អូនត្រូវបានចាត់តាំងឲ្យនិយាយអំពីប្រធានបទមួយនៅព្រះវិហារ ហើយសិក្សាសម្រាប់ការឡើងនិយាយនោះ ។
បន្ទាប់ពីអានជំពូកដ៏ចូលចិត្តមួយក្នុងព្រះគម្ពីរ សូមសរសេរឡើងវិញជាពាក្យសម្ដីផ្ទាល់របស់បងប្អូន ។
តាមបទគម្ពីរយោងនៅក្នុងខដែលចូលចិត្តមួយ បន្ទាប់មកតាមបទគម្ពីរយោងនៅក្នុងខទាំងនោះដែលនាំបងប្អនមកដល់ ហើយបន្ទាប់មកតាមបទគម្ពីរយោងទាំងនោះទៀត ។ ល ។
ដាក់វេនគ្នាអានខទាំងឡាយឲ្យឮៗជាមួយមិត្តភក្ដិ ហើយនិយាយអំពីអ្វីដែលបងប្អូនអាន ។
ប្រើប្រាស់ សេចក្ដីណែនាំដល់បទគម្ពីរទាំងឡាយ ដើម្បីសិក្សាពាក្យមួយ ឬប្រធានបទមួយ ។
រកមើលបទគម្ពីរទាំងអស់នៅក្នុងកំណត់ចំណាំនៅចុងនៃសុន្ទរកថាសន្និសីទទូទៅមួយ ។
ដាក់បទគម្ពីរមួយនៅកន្លែងណាដែលបងប្អូនមើលឃើញជារៀងរាល់ថ្ងៃ ហើយព្យាយាមទន្ទេញវានៅសប្ដាហ៍នេះ ។
សរសេរកាតជូនដល់មនុស្សដោយភ្ជាប់ជាមួយនឹងបទគម្ពីរដែលលួងលោមចិត្តនៅខាងក្នុង ។
ប្រើប្រាស់ បណ្ណាល័យដំណឹងល្អ ដើម្បីស្ដាប់តាម ពេលព្រះគម្ពីរអានឮៗ ។
គូរបន្ទាត់ពេលវេលានៃព្រឹត្តិការណ៍ទាំងឡាយ ពេលបងប្អូនអានព្រះគម្ពីរមរមន ។
ស្វែងរក « ពួកម៉ាកព្រះគម្ពីរ » ម្នាក់ ហើយផ្ញើសារទៅគ្នាទៅវិញទៅមកនូវខមួយជារៀងរាល់ព្រឹក ។
ចាប់ផ្ដើមពីជំពូកចុងក្រោយនៃព្រះគម្ពីរមរមន ហើយអានទៅដើមដំបូងវិញ ។
អានព្រះគម្ពីរដែលបញ្ចូលទីបន្ទាល់មួយ រួចហើយសរសេរទីបន្ទាល់របស់បងប្អូនទុក ។
ប្រសិនបើបងប្អូនលេងឧបករណ៍តន្ត្រីមួយ ព្យាយាមសរសេរចម្រៀងមួយដែលចាប់យកអារម្មណ៍នៃខមួយ ។
សួរដល់សមាជិកគ្រួសារ ឬមិត្តភក្ដិអំពីខគម្ពីរដែលពួកគេចូលចិត្ត ។
ពេលបងប្អូនអាន សូមគូររូបនូវកម្មវត្ថុដែលត្រូវបានពិពណ៌នានោះ ដូចជាធ្នូដែលបាក់របស់នីហ្វៃ ។
អាន ហើយទន្ទេញខទាំងឡាយដែលត្រូវបានប្រើប្រាស់ដើម្បីបង្រៀនមេរៀនអ្នកផ្សព្វផ្សាយសាសនា ដែលមានក្នុងជំពូកទីបីក្នុង ប្រកាសដំណឹងល្អរបស់យើង ។
អានគម្ពីរមួយក្នុងព្រះគម្ពីរប៊ីប ដែលបងប្អូនមិនដែលបានអានពីមុនមក ។
ស្រាវជ្រាវពីជីវិតរបស់វីរបុរសម្នាក់នៅក្នុងព្រះគម្ពីរ ហើយសរសេររបាយការណ៍ជីវប្រវត្តិមួយ ។
សម្ដែងរឿងពីព្រះគម្ពីរមួយជាផ្នែកនៃរាត្រីជួបជុំក្រុមគ្រួសារ ឬសកម្មភាពសាសនាចក្រផ្សេងទៀត ។
ស្វែងរកការដកស្រង់ពីថ្នាក់ដឹកនាំសាសនាចក្រម្នាក់ ដើម្បីឲ្យវាសមស្របជាមួយនឹងជំពូកនីមួយៗដែលបងប្អូនអានចប់ ។
អានជំនួយសិក្សាព្រះគម្ពីរ ដូចជា បុព្វកថាចំពោះព្រះគម្ពីរមរមន ឬ សេចក្ដីណែនាំដល់បទគម្ពីរទាំងឡាយ ។
ចំណាយពេលនៅក្នុងធម្មជាតិ ហើយគិតថាតើអ្វីដែលបងប្អូនឃើញទាក់ទងនឹងដំណឹងល្អយ៉ាងដូចម្ដេច បន្ទាប់មកស្វែងរកខមួយអំពីអ្វីដែលបងប្អូនបានរៀន ។

មានគំនិតខ្លួនឯងឬ ? សូមចែកចាយវាជាមួយមិត្តភក្ដិរបស់បងប្អូន !